ISOMO 42
Biblia Byatenda Kikizi ku Kabamba ka Kusongana nu Kutasongana?
Ku bumba bwa bantu bamozi, bekukengelaga buno muntu ntenaba na mbogimbogi ndi ntasongana. Tondo, ta bantu bansania basongana u bekubezaga na mbogimbogi aba ta bantu bansania betekusongana u betekubezaga na mbogimbogi. Biblia byalosya buno kutasongana aba kusongana kuli lukaso kutuka ku Yehowa.
1. Kutasongana kuli na mutali mukizi?
Biblia byatenda bunee: “Na muntu na muntu wasongana nti akita busoga, tondo wozo utasongana nti akita busoga nunse.” (Soma 1 Bakorinto 7:32, 33, 38, NWT.) Mu nzila nkizi wozo muntu utasongana nti “akita busoga nunse?” Bakristo betasongana tabekubezaga na mizangozango za kukunga ungo. Ukinsa, beli na bukandulwa nunse. Anga, bamozi beli na kiziki kya kukita byeingi mu mulimo wa Yehowa, benakumukila mu ingo nsi kwa kusambala musagu musoga. Kya mutali nunse, beli na nkungu neingi za kugugumania bwida bwabo gamozi na Yehowa.
2. Kusanzya ndoba kuli na mutali mukizi?
Kusongana nuko kuli na mutali anga kutasongana. Biblia byatenda buno “buli busoga ndi babili bakita gamozi kutinga kuba umozi.” (Musambazi 4:9) Bubo buligo nunse ku Bakristo bekulemba kanuni za Biblia mu ndoba zabo. Ba mukazi n’iba basongana bulingilingi na milembe za mbulamatali, nti balagana kutundana, kulosyana lwanzo nu kukungana. Kukita bubo kwabakasye kuba na bulangi nunse kutinga ba mukazi n’iba b’ungwana kulama gamozi kuteli kusanzya ndoba. Nu ndoba zikukasya kukuzya bana busoga mu kikanga.
3. Buni buli makengelo ma Yehowa ku ndoba?
G’alingizizye ndoba itangi, Yehowa atendile bunee: “Wamulume ekasiga isi nu nina nu kulandana na mukazi wage.” (Kulinga 2:24) Yehowa ekutunda buno ba mukazi n’iba batundane nu basigale gamozi bindi binsania bya kalamo kabo. Ekwitabizya kwita isonga ndi umozi kubo ita meiga. Mu lukita lulo, Yehowa akasa bukandulwa ku wozo uteli na katati kwa kusombola ndi ite isonga aba kilo.a (Matayo 19:9) Yehowa ntitabizya buno Bakristo babe n’idombe.—1 Timoteo 3:2.
TUMENYININE
Lola buni b’unaba na mbogimbogi nu b’unatananizya Yehowa—ibe use wasongana—aba ntusongana.
4. Kambya busoga kutasongana kwobe
Yesu amonaga kutasonga kuli lukaso. (Matayo 19:11, 12) Soma Matayo 4:23, nu kusila ibuzye luno lubuzya:
Buni bwakambizizye Yesu lukaso lwa kutasongana kwa kukambela Isé nu kukasya bango?
Anga Yesu, Bakristo benamona mbogimbogi kwa kukambya lukaso lwabo lwa kutasongana. Lola VIDEO, nu kusila ibuzye luno lubuzya lwalemba.
Bakristo benakambya lukaso lwabo lwa kutasongana mu nzila nkizi za mponga?
Ndi wamenyile?
Biblia tabyatendela miaka kishembe zatunganana muntu kusongana kuzo. Tondo, Biblia byalosya buno bwatunganana muntu “atinge nkungu za bukinga [aba za busikila, NWT],” mu nkungu zezo, muntu ekubezaga nunse na makengelo ma kujama gamozi n’ungo, nu mamo makengelo menakita bube bubibu kweli kukata bulamuzi busoga.—1 Bakorinto 7:36.
5. Sombola busoga muntu wa kusongana nage
Kusombola muntu wa kusongana nage buli bulamuzi bumozi gesamba bulamuzi bwa mutali b’unakata. Soma Matayo 19:4-6, 9, nu kusila ibuzye luno lubuzya:
Kabamba kakizi Mukristo atunganana kukengela nunse lwabusio lwa kukata bulamuzi bwa kusongana?
Biblia binakukasya kumenya nkumu nsoga za muntu wa kusongana nage. Kya mutali nunse, sombola muntu wa kusongana nage wozo watunda Yehowa.b Soma 1 Bakorinto 7:39 nu 2 Bakorinto 6:14. Kusila ibuzye zeno mbuzya:
Kabamba kakizi Mukristo atunganana kusongana tugu na munyage Mukristo?
Ku makengelo mobe, Yehowa enajungwa buni ndi Mukristo asongana na muntu uteli Mukristo?
Ndi nyama ibili zengukana nunse zaswekwa gamozi, nti zababalwe. U buligo ku Mukristo wasongana na muntu uteli Mukristo, nti babe na tubebe tweingi
6. Ube na makengelo anga ma Yehowa ku kabamba ka ndoba
Wakalazi mu nkungu za Baisraeli, bamulume kishembe bitaga masonga mabo ku kabamba ka mutali wabo bobeinyene. Soma Malaki 2:13, 14, 16, nu kusila ibuzye luno lubuzya:
Kabamba kakizi Yehowa ekusomba kwita isonga mu nzila zitatunganana na masanzo?
Kwita meiga nu kwita isonga kukwinia nunse mutima wa wozo uteli na katati nu bana
Lola VIDEO, nu kusila ibuzye luno lubuzya lwalemba.
Ndi wasongene na muntu utekukumbamina Yehowa, unakita kikizi kwa kuba na mbogimbogi mu isonga lyobe?
7. Kambya kanuni za Yehowa ku kabamba ka ndoba
Muntu atunganana kwidindika kukambya kanuni za Yehowa ku kabamba ka ndoba.c Nu Yehowa ekukasaga mponga babo bekukitaga bubo. Lola VIDEO.
Soma Baebrania 13:4, nu kusila ibuzye zeno mbuzya:
Ndi ukukengela buno kanuni za Yehowa ku kabamba ka ndoba zili za mutali? Ku kabamba kakizi?
Yehowa ekutunda Bakristo basanzye ndoba zabo nu kulonda mikanda za kwita isonga anga bukusegwa na mbulamatali mu nsi neingi. Soma Tito 3:1, nu kusila ibuzye luno lubuzya:
Ndi use wasongana, watitikizia buno ndoba zobe zise zasanzwa ku mbulamatali?
MUNTU ENAKUBUZYA BUNEE: “Kabamba kakizi nisanzye ndoba? Ndi bantu tabenungwana tugu nu kulama gamozi?”
Unamwakula buni?
MAKENGELO MANENE
Kusongana aba kutasongana kuli lukaso kutuka ku Yehowa. Babo basongana nu betasongana, bansania benamona mbogimbogi ndi bakita bubo kwa kulemba kanuni za Yehowa.
Mbuzya za kwikengelesya
Buni bunakambya muntu lukaso lwage lwa kutasongana mu nzila nsoga?
Kabamba kakizi Biblia byatenda buno Mukristo atunganana tugu kusongana na munyage Mukristo?
Biblia byatenda buno muntu en’ita isonga ku kabamba kakizi kamozi tugu?
LONDA LINGO
Kusongana mu “Mukota tugu” kuli na bwisulilwa bukizi?
“Mbuzya za Basomi Beitu” (Munara wa Mulinzi, 1 Mwezi wa 7, 2004)
Lola video isatu zinakukasya kukata bulamuzi busoga ku kabamba ka kwandwa aba kwanda nu kukita ndoba.
Lola kabamba kakizi mubuto umozi amona buno kikyo kyamukasile Yehowa kili kya mutali nunse kutinga binsania byasigile.
Muntu atunganana kukengela bikizi lwabusio lwa kwita isonga aba kulekanuka?
“Kutya Kikyo ‘Kyakulumanizizye Kalaga’” (Munara wa Mulinzi, Mwezi wa 12, 2018)
b Ku bumba kishembe, babuti bekusombolelaga bana babo bantu ba kusongana nabo. Mu lukita lulo, babuti beli na lutundo, tabekusombolaga muntu uli na bikulo aba wozo wamenywa nunse, tondo mukikulu aba wamulume watunda Yehowa.
c Ndi ukulama na muntu u utasongene nage, ugwenyene unasombola kusigala aba kulekanuka nage.