Yohani

11 Kpadjo, ddikpa ke ró dho ngʉe Lazaro, ri ngʉe Betania nǎ ke, ná føri ngʉe Maria ma, ndidhi vena Marta ma na ngʉ adi di nǎ ná bba. 2 Føri i kʉ Bboke djo ddongʉe ché ná Maria ndirigoti le njʉngʉe ke kó ronga ndi djoká na; ri kʉ ledhi djona Lazaro i dhe ngʉ nji ri. 3 Føri dho, ke vei chongʉe i imba Yesu dho: “Bboke, bbo ni jirie ná ke kʉ dhe na.” 4 Ro, Yesu rrngʉe fø lo ro, ke pongʉeri: “Fø dhe dhó lo nga kʉ ndi tso d’ø ke hwidha djo ri, ro ri kʉ ndiro Mungu ba madha d’e, ndirigoti Mungu Ddù ba madha ri chulu d’e.”

5 Yesu jingʉe Marta ma, ndidhi vena ma, Lazaro ma na ji. 6 Nì mai ri kʉ fø ro, ke rrngʉe Lazaro dhe nji nari ro, ke ki dingʉe ndi ngʉe ná fø ngana ddo aro vi. 7 Føri goti ke pongʉeri ndi unakpa dho: “Ako ki ra Yudea na.” 8 Ke unakpa pongʉeri ke ni: “Rabi, Yudea nǎ ndrŭ e rine ndima bú ni dju na, nari goti nzá ddo ro d’e da thɨ maddi ri, ro i ni riji ni ki rá følu?” 9 Yesu ngʉngʉe logoti: “Ddikpa dyi nǎ saa e 12, ri ká nga fø ri? Njati ddikpa ke bbí dyina ró, fø ke kó ka ndi b’ɨ ná ritsi ro nga kʉ ri, dhonalo ke i dz’ dzá kadha njanja. 10 Ro, njati ddikpa ke bbí kuna ró, fø ke kó ritsi ka ndi b’ɨb’ɨ dhonalo ke nǎ nga kʉ kadha ro ri.”

11 Fø lo ke po nari goti ke pongʉeri ki: “Kodhi kau Lazaro ddoddo, ro ma ra følu ndiro ma rá ke che ddo nǎ ro d’e.” 12 Føro ke unakpa pongʉeri: “Bboke, rie ddo ke ddo ri ró, ke si ndi mbu bblo nì.” 13 Yesu ngʉ loti ke dhedhe nari djo, ro ke unakpa ngʉ riddi ke loti ddo ke ddo ro ke ndi ronga chʉ nari djo. 14 Føro Yesu pongʉeri kpa dho pʉlʉpʉlʉ: “Lazaro dhedhe, 15 ndirigoti ma kʉ hwè na nidhi lo dho dhonalo ma nga e føga ri, ndiro ni uri u d’e. Ro, akora ke kʉ ná ngana.” 16 Føro Tomas, Zʉ* ndrŭ ngʉ adi nzǐ ná ke pongʉeri Yesu una nja kpa dho: “Ko ma rá ddi, ndiro ko cheni ddinga ke ma na d’e.”

17 Yesu singʉe nari ngʉe b’lo Lazaro nji ddo tho kabuli* nǎ ri. 18 Betania ngʉe Yerusalemu nǎ ro chøchø kilometre gbo.* 19 Bí kʉ ná Wayaudi singʉe Marta ma, Maria ma na dhi ngana nja ndima pɨ ndrŭ iso kpadhi djona dhe nari dho d’e. 20 Marta rrngʉe Yesu si nari ro, le rangʉe ndima ra nju ke na d’e; ro Maria i mangʉe ma abba. 21 Føro Marta pongʉeri Yesu dho: “Bboke njati ni ée iga ró madhi djona ro nzá ka ndi dhee ri. 22 Føro mai kpadjo ma churi chu nari kʉ, ni nzi Mungu tso ná ritsi krʉ ke si bbʉbbʉ ni dho.” 23 Yesu pongʉeri le dho: “Nidhi djona si gaga.” 24 Marta pongʉeri: “Ma churi chu ke si ga nì nga sini ná dyi sie ná gadha nǎ.” 25 Yesu pongʉeri le dho: “Ma kʉ gadha ndirigoti shinga. Njati ddikpa le dhǒ udha ma nǎ, ro i fø le dhedhe ma ró, le ki si ngʉ shi vi; 26 ndirigoti ddikpa le é shi ro i le dhǒ udha ma nǎ ró, fø le ro nzɨ dhe pá maddi ri. Ni ká u fø lo u?” 27 Le ngʉngʉe logoti: “Uo, Bboke, ma uri u nari kʉ ni kʉ Kristo, Mungu Ddù, dz’ djo ngʉ si ná ke.” 28 Fø lo ndi rr nari goti Marta rangʉe ndidhi vena Maria nzi ɨ ndi ripo ro: “Mwalimu kʉ iga ndirigoti ke ni nzǐ.” 29 Fø lo ndi rr ro le dangʉeni tse ndirigoti le rangʉe ke dhi ngana.

30 Yesu nzá d’engʉe tsu go fø vilaje nǎ ri, ke ngʉe go Marta na ndima njungʉe ná ngana. 31 Maria ma bba singʉe le ma isopɨdha dho ná Wayaudi njangʉe le dani tse ndirigoti le nga bbi tso nari ro, kpa rangʉe le ulu dhonalo kpa ngʉ rid’yá kabuli* djo le ra dzz ri. 32 Maria singʉe Yesu kʉ ná ngana nari goti, le njangʉe Yesu ro, le kongʉeni ke kó tsena ɨ ndi ripo ro: “Bboke njati ni ée iga ró madhi djona ro nzá ka ndi dhee ri.” 33 Yesu njangʉe Maria ma, le goti mbangʉe ná Wayaudi ma na dzz ndima dzz ro ná saa na, ke mbungʉe ndi* che bbo ndirigoti ke djolu vodha tɨngʉeni tɨ. 34 Føro ke dhungʉeri: “Ni ká la ke ngbaga?” Ro, ndrŭ pongʉeri: “Bboke asi ni nja ri d’e.” 35 Føro Yesu bbangʉeri ndi nyodda rara. 36 Føro Wayaudi ngangʉe ri podha tso: “Aninja ngbabø ma ke jingʉe Lazaro nari!” 37 Ro, nja kpa ngʉ ripo: “Fø ke kloe nzɨ nyǒ nganja ná ke nyǒ tso maddi, ná ke ká ka ndi lieri nzá nzɨ Lazaro dhe?”

38 B’lo ke mbu ndi ki che bbo nari goti Yesu rangʉe kabuli* djo, ri ngʉe dju nǎ kʉ ná bbù ndirigoti ri tso ró ngʉe dju. 39 Føro Yesu pongʉeri: “Anitu dju ri tso ró ro.” Ro, dhe dhengʉe ná ke dhi vena Marta pongʉeri: “Bboke kpadjo ke ka ndi é ngø ndi ngø ro, dhonalo ke dhe ná nga djó ro ddo da 4 b’lo.” 40 Yesu pongʉeri le dho: “Ma ká poeri ni dho nzá nari kʉ, njati ni uri u ró ni sie Mungu dhó kadha nja?” 41 Ri tso ró dju kpa tu nari goti, Yesu ngbengʉe ndi nyǒ røna ro, ke pongʉeri: “Baba, ma mbai po ni dho ni rr e ma rr nari dho.” 42 Bbʉbbʉ dhé, krʉ ddo ró ni adi ma rrrr, ro ma poe fø lo ma kuso lu tøni ná birobiro kʉ ná i ndrŭ djotsina; ndiro kpa churi chu nari kʉ, ri kʉ ni i chongʉe ma ri.” 43 Fø lo ndi po nari goti ke jøngʉe nga bbò ndi chu na ɨ: “Lazaro, asi arugu!” 44 Dhe dhengʉe ná fø ke singʉe arugu ndɨ le ndɨ ndi kó ma, ndi thó ma na ronga tso ro, ndirigoti ke nyǒ djó nga tso maddi le ndɨngʉe kitambala na. Føri goti Yesu pongʉeri: “Aniklo fø ritsi ke ró ro ndirigoti anibbari ke rá.”

45 Føro Maria ma dhi ngana singʉe ndirigoti nja njangʉe fø lo ná bí kʉ ná Wayaudi ungʉe ke u. 46 Ro, kpa kana nja kpa rangʉe Bbafarisayo dhi ngana ndirigoti kpa d’rangʉe Yesu nji ná fø lo kpa dho. 47 Føro Bbakuhani djó bbobbonga ma, Bbafarisayo ma na njungʉe ndima tso Sanhendrini na ndirigoti kpa ngʉ riti: “Ko ká rinji ngbǎ dhonalo fø ke bí kʉ ná ddù kpari nji ró? 48 Njati ko bbari fø ke rá anzi ndi nji ná fø lo na ró, ndrŭ krʉ si ndima dhó udha li ke djo. Ndirigoti Waroma si si nari goti kpa si kobbá nga* ma, kobbá ndrŭ bbu ma na dhʉdhʉ. 49 Ro, kpa kana bbò kuhani ngʉe fø cho nǎ ná ke, Kayafa pongʉeri kpa dho: “Ni nzá chu ddikpa lo ro maddi ri, 50 ndirigoti ri kʉ bblo ddikpa ke dhe ndrŭ djotsina, Wayaudi krʉ saéni nari rɨngana ná føri kʉ nidhi faida dho nari ro nzá ni famu ri.” 51 Ke ngʉ po ná fø lo nzɨ ngʉ si ke nganga dhó ro ri, ro ke ngʉe bbò kuhani fø cho na nari dho, ke d’rangʉeri unabi chulu nari kʉ Yesu dho ringʉngani ndi dhe Wayaudi krʉ dhi lo dho, 52 ro nga Wayaudi dhi lo dho kpali ri, ro nja ndi gbá Mungu dzá pli nanga plini ná nzø tso maddi ddikpa ngana d’e. 53 Føri dho, fø dyi nga djó ro kpa kpengʉeri ndima hwi ke hwi.

54 Føri dzá lo dho Yesu ki ro nzɨ ngʉ adi bbí pʉlʉpʉlʉ Wayaudi kalu ri, ro ke rangʉe fø bba ro ngødja kuso kʉ ná eneo nǎ Efraimu le nzǐ ná ddikpa vile na. 55 Wayaudi dhó Pasaka ngʉe chøchø ndirigoti bí kʉ ná ndrŭ djingʉe nga tsotso lu ngʉe ná bba gʉ lu ro Pasaka njí Yerusalemu na ndiro ndima liri ndima tsetse kpa bbá desturi nzingʉeri nari bbai d’e. 56 Ndrŭ ngʉ Yesu ne, ndirigoti hekalu nǎ ndima tøni ro ndrŭ ngʉ riti ndima kana: “Ni ká riddi ngbǎ? Ke ká ka ndi si fete dhi ngana nzá?” 57 Ro, bbakuhani djó bbobbonga ma, Bbafarisayo ma na jangʉeri ndrŭ dho nari kʉ njati ddikpa ke d’i Yesu kʉ ná nga utso ró, ke dho ringani ndi d’rari d’ra, ndiro ndima lø ke lø d’e.