Yohani

12 Yesu singʉe Betania na ddo aza ri gʉ ma Pasaka dho ro, ná føri ngʉe ga ke gangʉe ná Lazaro ma bbá nga. 2 Følu ndrŭ ka ngasdjó nga dhi nyo ri Yesu dho ndirigoti Marta ngʉ nyo bbʉ ndrŭ dho. Fø nyo Yesu ma ngʉ nyo na ddinga ná ndrŭ kana ddi ri ngʉe Lazaro. 3 Føro Maria dzingʉe djuu ngø ná ché chøchø demi litre,* ná føri ngʉe nardo le nzǐ ná tsó kpali na le thɨ ná ché, bbo ndi ró dzi kʉ ro, ná ri le ddongʉe Yesu kó djo føri goti le njʉngʉe Yesu kó ronga ndi djoká na, ná fø ché dzi chingʉe adzanga gble. 4 Ke unakpa kana ke nanga ka ndi sie dzi ná ke Yuda Iskariote pongʉeri: 5 “Djuu ngø ná fø ché nanga ká le dzie dinari* 300 ró nzá addudho ndi mbø le ndo njedha dhi ndrŭ dho d’e?” 6 Fø lo nzá ke pongʉe ndi nanga njedha dhi ndrŭ dhi lo d’o nari dho ri, ro ri kʉ ke ngʉe gbʉ dhi ke ndirigoti ke dhó i ngʉe mbø le ngʉ adi li na ná kess ndirigoti ke ngʉ adi mbø d’ud’u ri nǎ ro nari dho. 7 Yesu pongʉeri: “Abba fø le nidhó ro ndiro fø le tayarisha ma, ma d’ødha dhi ddo dho d’e.” 8 Dhonalo njedha dhi ndrŭ sie nì dhé ni kana, ro ma nga sie ni kana krʉ ddo ró ri.

9 Wayaudi kana birobiro kʉ ná ndrŭ d’ingʉe ri utso Yesu kʉ føga ná saa na, ndrŭ nzá singʉe Yesu ró dhé ri, ro ndrŭ singʉe ndima nja bʉ ndrŭ kana ro ke gangʉe ná ke Lazaro maddi d’e. 10 Føri dho, bbakuhani djó bbobbonga kpengʉeri ndima hwi Lazaro ma hwi ddi. 11 Dhonalo ri kʉ ke djotsina i bí kʉ ná Wayaudi ngʉ si føga ndirigoti kpa ngʉ Yesu u ri.

12 Bbʉdyi fete dhi ngana singʉe ná birobiro kʉ ná ndrŭ rrngʉeri Yesu ngʉ si Yerusalemu na nari ro, 13 ndrŭ d’rɨngʉe ché tsu bɨ nari na ndrŭ rangʉe ke mo ɨ ndima ndima nanga jø ro: “Ko rinzi, agø ke! Yova* ró dho na si nari kʉ le ronga leni ná ke, bbʉbbʉ dhé, Israeli bbá Pi!” 14 Ddikpa kana dzá ngba ro ndi si ro, Yesu djingʉe ri djo ndi ndini ná i lo pongʉeri nari bbai: 15 “Nzɨ nji do Sioni nǎ singba. Anjari! Nidzá pi si kana dzá ngba djó ndi dji ro.” 16 Anziro nzɨ ke unakpa ngʉ fø lo ro famu ri, ro ke mani nari goti kpa nongʉe ringa nari kʉ fø lo ndingʉeni ke djo ndirigoti ri njingʉeni ke dho.

17 Lazaro ke nzingʉe kabuli* nǎ ro ndirigoti ke gangʉe ke bʉ ndrŭ kana ro ná saa na ngʉe føga ná birobiro ngʉe ná ndrŭ rangʉe anzi dhé fø lo dzá bbʉbbʉnga ndima d’ra nari na. 18 Ri kʉ føri dzá lo dho i birobiro kʉ ná ndrŭ rangʉe nju ke na ri dhonalo ndrŭ rrngʉeri ke nji fø ddù. 19 Føro Bbafarisayo ngʉ riti ndima kana ɨ: “Ni nji ná lo nǎ ro nzá ni ba faida ro ddikpa maddi ri. Aninja! Ndrŭ krʉ ra ke ulu.”

20 Fø fete dhi ngana singʉe madha bbʉdha dho ná ndrŭ kana nja ri ngʉe Wagiriki. 21 Fø ndrŭ singʉe Galilea nǎ Betsaida nǎ ke Filipo dhi ngana ndirigoti ndrŭ ngangʉe ri nzidha tso ke tso: “Bboke, ko jiri ko nja Yesu.” 22 Føro Filipo rangʉe ripo Andrea dho. Ndirigoti Andrea ma, Filipo ma na rangʉe ripo Yesu dho.

23 Føro Yesu ngʉngʉe kpadhó logoti: “Saa ka b’lo ndiro ndrŭ Ddù ba madha d’e. 24 Bbʉbbʉ dhé, ma ripo ni dho, njati ngano kpa d’e dz’ djo, ro ri dhedhe nzá ró ri adi má ddikpa dhé, ro ri dhedhe ró ri adi ndi kpa ó bí. 25 Njati ddikpa ke é bbo ndi chini ndidhó shinga* na ro ró, fø ke si ri vivi, ro ddikpa ke é ndro ndi ndro ndidhó shinga i dz’ djó ro ró, fø ke si ri ronga b’o cho ró nŭnŭ di ná shinga* dho. 26 Njati ddikpa ke é ma dho ndi njínji ro ró, ke si ma ulu, ndirigoti ma dho njínji ná ke sie ma kʉ ná ngana. Njati ddikpa ke jiri ndi njinjí ma dho ró, Baba si ke mama. 27 Kpadjo ma* djǒ nanga ngbʉni ngbʉ, ma dho ká ringani ma pori ngbǎ? Baba, agø ma i saa nǎ ro. Ro, ri kʉ føri dho i ma tso sie kpø i saa djo ri. 28 Baba aliri ni ró dho mani.” Føri goti ddikpa lechu singʉe ra nǎ ro: “Ma lingʉeri ri mani b’lo ndirigoti ma si rili ri ki mani vi.”

29 Føga ngʉe ná birobiro ngʉe ná ndrŭ rrngʉe fø lechu rr ndirigoti ndrŭ ngʉ ripo, ri kʉ vo ta ri. Ndirigoti nja ndrŭ ngʉ ripo ɨ: “Ri kʉ ddikpa malaika tilo ke dho ri.” 30 Yesu ngʉngʉe logoti ɨ: “Fø lechu nzá si madzá bblonga dho ri, ro nidhi lo dho. 31 Kpadjo lod’ini i dz’ djo ndirigoti kpadjo le si i dz’ djó pi bu bbaidjo. 32 Ro, ma si ngbeni dz’ djó ro ró, ma si ndrŭ drr ma ro njonjo kʉ ná ndrŭ kana ro.” 33 Bbʉbbʉ dhé, ke ngʉ fø lo po ndiri na ndi dhǒ ngbaribbai ma ndi si dhe nari d’e. 34 Føro birobiro kʉ ná ndrŭ ngʉngʉe logoti: “Ko rrngʉeri Yadha nǎ ro nari kʉ, Kristo si ma theinga dho. Nde, ni ká ripo ndrŭ Ddù si ngbeni ngbe ngbaribbai? Fø ndrŭ Ddù ká kʉ ie?” 35 Føro Yesu ngʉngʉe logoti: “Kadha ro kʉ go ni kana sese saa dho. Anibbi go kadha ro kʉ ro ndiro nzɨ tɨtɨnga dzá kpakpanga si ni djolu ró. Dhonalo njati ddikpa ke di bbi tɨtɨnga nǎ ró, fø ke nzɨ adi ndi ra ná nga ro chu ri. 36 Go kadha kʉ ni kana ro anidho udha kadha nǎ ndiro ni ngʉ kadha dzá nzø d’e.”

Fø lo ndi po nari goti Yesu rangʉe ra kpa kuso ro ndirigoti ke rungʉeni ru kpa ró. 37 Ngbà mai ke njingʉe bí kʉ ná ddù kpa nyǒ djó ro, kpa nzá dhé ungʉe ke ro ri, 38 ndiro nabi Isaya pongʉe ná i lo njini d’e: “Yova,* kodhó ro kpa rrngʉe* ná lo ká ie ungʉe? Ndirigoti Yova* kù ká dhongʉeni ie dho?” 39 Kpa ungʉe ri nzá dho nari kʉ Isaya pongʉe ki ná i lo: 40 “Ke dya kpa nyǒ tso dya ndirigoti ke liri kpa thí ngʉ kpakpa ndiro nzɨ kpa nyǒ njanga ndirigoti nzɨ kpa thí famu lo ndiro nzɨ kpa leni nja nzɨ ma gø ndima d’e ró.” 41 Isaya pongʉe fø lo dho nari kʉ, ke njangʉe kedzá kadha nja ndirigoti ke tingʉelo ke djo. 42 Bbobbonga kʉ ná kpa kana bí kʉ ná kpa ma ungʉe Yesu ddi, ro Bbafarisayo dhi lo dho nzɨ kpa ngʉ ridho pʉlʉpʉlʉ ri ndiro nzɨ le di ndima sinagogi nǎ ro ró. 43 Dhonalo kpa jingʉe ndrŭ dhó ro si ná madha Mungu dhó ro si nari djolu.

44 Føro Yesu pongʉeri bbò ndi chu na: “Njati ddikpa ke u ma ró fø ke nzá u ma dhé ri, ro ke u cho chongʉe ma ná ke maddi; 45 ndirigoti ddikpa ke nja ma ró, fø ke nja cho chongʉe ma ná Ke maddi. 46 Ma singʉe kadha bbai dz’ djo, ndiro nzɨ u u ma ná ke di tɨtɨnga nǎ ró. 47 Njati ddikpa ke rr ma po ná lo, ro ke njinjí ri na nzá ró, fø ke djo nzɨ ma d’i lo ro ri dhonalo ma nzá singʉe lod’i dz’ djó ndrŭ djo ri, ro dz’ djó ndrŭ gødha dho. 48 Ddikpa ke di ma be pá ndirigoti ke rr ma po ná lo nzá ró, fø ke djo lod’i ná ke kʉ nì. Ma po ná fø lo i si lod’i ke djo ngasini ná saa na. 49 Dhonalo ma nzɨ loti ma nganga dhó ngaddidha ró ro ri, ro cho chongʉe ma ná ke Baba dhé jangʉe ringani ma po ná lo ma, ringani ma ti ná lo ma na. 50 Ndirigoti ma churi chu nari kʉ, kedhó yadha na mana kʉ cho ró nŭnŭ di ná shinga. Føri dzá lo dho, ma ti ná lo krʉ ma ti Baba d’rangʉeri ma dho nari nganga bbai.”