Bi 12

Yesu ddingʉe ndima kana nga kʉ chøchø ndi unakpa na nari chembø ró rø ná ke ma kana nga e chøchø ndidhó chembø na nari na. (Yoh. 10:14) Føri kʉ bbʉbbʉ kʉ ná loroji. Chembø churie ndi ró rø ná ke chu ndirigoti chembø adi ke chu rr rr. Ddikpa bbibbi ná ke njangʉe fø di lo ro b’lo. Ke pongʉeri: “Ko ngʉ bbi na ná kpa jingʉe ndima lø nja chembø ró ji ndirigoti kpa ngʉ riji ri si chøchø ndima kuso. Ro ri ro nzá singʉe kodhi ngana ri dhonalo ri nzá famu ngʉe kodho sauti ro ri. Føri goti chembø ronga b’o ná kpetsi ngba singʉe ndirigoti ke nzingʉe chembø ná saa na ri rangʉe thei ke ulu.” Bbibbi ná ke po ná fø lo ngano ko dho nari kʉ Yesu pongʉe ndidhó chembø djo ná lo, føri kʉ ke unakpa. Ke pongʉeri: “Kpa si ma chu rr.” Yesu kʉ ra nǎ, ro nde ko ká ka ko rr ke chu ngbaribbai? Kodhi Bboke chu ko ka ko rr kedhó mafundisho na ko njínji kodhó maisha nǎ nari chulu.​—Mt. 7:24, 25. w21.12 16 §1-2

Mutume Paulo ngʉe bbo ngʉ Wakristo nzá anziro ná ke. Luti, ke rangʉe ri famu nari kʉ ndi ngʉ nji nari kʉ chelo, ro ke øngʉe ndidhó nganjadha ma, ndidhó nyi ma na thika ø. (1 Ti. 1:12-16) Yova dhó le tsotsokodha chulu Paulo ngʉngʉe jidha na, zølo na ndirigoti nyenyenga na kʉ ná muzee. Ke vʉngʉeri ndi li ndi thí Yova dhǒ ndi dho ná zølo djo ndi njingʉe anziro ná lo djo ndi lie ndi thí nari rɨngana. (Ro. 7:21-25) Ke nzɨ ngʉ adi rine ndi é kaka ná ke ri. Føri rɨngana, ke ngʉ kpakpanga nji ndiro ndidhó nyi é bblo Wakristo dhó nyi e nari bbai d’e. Ndirigoti nyenyenga na ke ngʉ ndi thí li Yova dhó le tsotsokodha djo ndiro ndi njí kedzá njí d’e. (1 Ko. 9:27; Flp. 4:13) Wazee dhó nzá le bbʉrie daraka kpa kaka nari dho ri. Nì mai ri kʉ føro, Yova adi riji kpa u ndima dhó kosa tso u ndirigoti kpa ø ndima dhó nyi thika ndi é Wakristo dhó nyi bbai d’e. (Efe. 4:23, 24) Muzee di Biblia zø nari ka ndi kó ke tsotso ndiro ke chu ndi ka ndi ø thika ná lo d’e. Føri goti Yova si ke tsotso ko ndiro ke é hwè na ndirigoti bblo kʉ ná muzee d’e.​—Yak. 1:25. w22.03 29-30 §13-15

Kodho ká ringani ko njiri ngbǎ njati ko rá ri utso d’i ko adi lod’i ko lai Mukristo djo ró? Kodho ringani ko no nga nari kʉ, ringani ko ji ko djoi ji. (Yak. 2:8) Kodho ringani ko di nganzɨ bí ina Yova tso, ko ddoniddo ke ró ndiro ke kó ko tsotso ko bbá nja ndrŭ djo ko lod’i nari tso d’e. Ko ka ko nji kpakpanga ndiro ko njiri sala nǎ ko nziri nari bbai ndiro ko di loti bblo d’idhé djo ko e loti ná le na d’e. Ko ka ko nzɨri ko rá lo ro ma d’ra le ma na inga ko ka ko nzɨ le ro nyo dho ma. Bblo ko riji ko chu kodhi djona ná føri na ko ka ko dyø Yova ma, Yesu ma na kedhó bblo lo ko ne ko nja nari chulu. Føri chulu ko ridho ko ngarr bblo rø miya ró ná ke dhó yadha dho, føri kʉ ko bba nja ndrŭ djo ko lo d’i nari tso. Ddiddi chembø adi ndi ró rø ná ke chu rr nari bbai, Yesu unakpa ma adi ke chu rr føi. Njati ko é “nga kʉ bí ná miya” ma inga “nja chembø” ma ró, ko ka ko rá anzi bblo rø miya ró ná ke chu ko rr nari na.​—Lu. 12:32; Yoh. 10:11, 14, 16. w21.12 19 §11; 21 §17-18

Rehoboamu ngʉngʉe Izraeli nǎ pi ná saa na, kedhó pidhinga tsena ndrŭ singʉe ke dhi ngana ke kó ndima tsotso d’e. Ndrŭ nzingʉeri ke ngʉ ndima djó le dzá baba Sulemani bbʉngʉe ná yadha nanga. Bbo thonga ná lo kʉ, Rehoboamu rangʉe Izraeli nǎ wazee dhi ngana ndiro ndi chu ngbaribbai ma ndi ka ndi ngʉ fø ndrŭ dhó logoti nari d’e. Wazee bbʉngʉe pi dho ná shauri ngʉe, njati ke njiri ndrŭ rinzi nari bbai ró, ndrŭ ka ndima rrnga ke dho krʉ ddo ró. (1 Fa. 12:3-7) Ri njani nari kʉ, Rehoboamu nzá bangʉe hwè fø shauri dho ri nari bbai, føri dho ke rangʉe ngadhu ddinga ndima dhi na ná kpa tso. Kpa bbʉngʉe ná shauri ngʉe ke ndrɨ yadha ki vi ndrŭ djo. (1 Fa. 12:9-11) Rehoboamu ka ndi dhuenga Yova tso ndiro ndi chu ngbá shauri na ma ndi ka ndi njinjí nari d’e. Fønga rɨngana, ke vʉngʉeri ndi njinjí jadda kpetsi kpa po ná lo na. Føri bbʉngʉe chelo Rehoboamu ma dho Izraeli nǎ ndrŭ ma na. Krʉ ddo ró ko ba ná shauri nga ka ndi é ji ko ji ko rr nari dhé ri. Ro, njati rie ngbà ri dyʉ ndi Mungu dzá lo ró ri ró, ringani ko uri u. w22.02 9 §6

Nyenyenga na ndirigoti kiasi na kʉ ná le nzá ka ndi li ndi nyǒ jadda kpa chulo bbo nzá nari djo ri, ro kpadhó kpakpanga djo. Le nzá ka ndi di kpa ddi nja ndrŭ na ri, ro ringani kpa di jadda kpa nja ndima lai njí dhi kpa bbai. Ngó ndrŭ adi jadda kpa nja Yova dhó ro si ná kado bbai ndirigoti kpa adi mbai po kpa nji ná lo dho. Ngó ndrŭ ró klø di sini si ná saa na, kpa adi mbai po jadda kpa nji kutaniko nǎ ná njí dho. Naomi kʉ bblo kʉ ná loroji Biblia nǎ, le ngʉ adi mbai po jadda kʉ ná le ndi tsotso kó nari dho. Ya kwanza, Naomi pongʉeri ndidzá mule Ruta ngʉ ndi abbá ndrŭ kana. Nì mai ri kʉ føro, Ruta pongʉeri ndi ra ngo Naomi ulu Betelehemu nǎ ná saa na, le ungʉe Ruta tso u. (Rut. 1:7, 8, 18) Fø isɨ ndrŭ bangʉe ledha bbo! (Rut. 4:13-16) Nyenyenga dzá lodho Ruta dyøngʉe Naomi dhó loroji. w21.09 10-11 §9-11

Kodhi ra nǎ Baba churi chu ko krʉ nzá ka ko njí ritsi ddiddi ri. Njaro ni ka ni njí ritsi ji ni ji ná chu ni churie ná bí kʉ ná ndrŭ djolu maddi. Inga ni nzá ka ni njí ritsi nja kʉ ná ndrŭ na ddiddi ri, njaro nidhó cho ma, ni dhe nji nari ma, inga ni nidhó familia tsotso ni kó nari dzá lo dho ma. Ro nzɨ bbari ni thí bʉni. (Gal. 6:4) Yehova nzɨ vi nidzá njí nga ro ri. Njati ni di njínji ke dho ni thí nǎ ro krʉ bblo kʉ ná lo ni cho ri dho ro ró, ke adi hwè ba føri dho. Yova churie ko adi ji ko njí ná lo chu. Ke jiri ni é hwè na ndirigoti ni nanga jini ji ni ka ni bbʉ ndi dho ná madha dho. Kpadjo ko kʉ ngoi na dhonalo, ko churi nari kʉ Yova adi ndidzá ndrŭ tsotso kó ko kpakpalo nǎ kpa kʉ ná saa na. (Isa. 41:9, 10) Bbʉbbʉ dhé, ko ka ko má kodhi jidha dhi Baba hwè na dhonalo kʉ, ke kaka “ndi ba kadha ndirigoti madha” krʉ ndi no ná ritsi dhó ro!​—Ufu. 4:11. w22.03 24 §16; 25 §18

Ko adi riji ko dyø Yesu dhó loroji, ro kodho ringani nzɨ ko d’i ji njati rie nzɨ ma ko Yesu dyø kaka nari bbai ró. (Yak. 3:2) Achuri nari kʉ mwanafunzi nga e ddiddi ndidhó mwalimu na ri. Ro mwanafunzi di somo ba ndi nji ná kosa nǎ ro ndirigoti ke di ndi thí li ndidhó mwalimu ddi ná lo djo ndirigoti ke di mwalimu dhó loroji dyø ró, ke ka ndi thɨ ndidhó lo thika thɨ. Føri bbai, njati ko njínji ko zø Biblia nǎ ro ná lo na ndirigoti ko di kodhó lo thika øø ró, ko si Yesu dhó loroji dyø bblo pli. (Zb. 119:59) Njʉ bí kʉ ná ndrŭ nzá jirie ndima lai ndrŭ ro ri. Ro Yova dzá ndrŭ e njonjo fø ndrŭ ró ro. Yesu ngʉ adi ndrŭ tsotso kó ná føri adi ko nyǒ tho bbo ndirigoti ko adi rivʉ ko dyø kedhó loroji. (1 Pe. 2:21) Ko adi kpakpanga nji nja ko dyø Yesu nari bbai, ko sie hwè na ko Yova nyǒ tho ná lo nji nari dho. w22.02 24 §16; 25 §18

Yova adi chutso ddá ndidzá ndrŭ dho Biblia chulu. Njati ko di saa ba ko ddinga Yova ji ndi ddi ko dho ná lo djo ngbà ró, ri ka ndi kaka ko dho ko dyø kedhó chutso ddadha, ndirigoti ko nji lod’radha dhi njí. (1 Ti. 4:15, 16) Yova adi chutso ddá ko dho “nyodyu dhi chí njí dhi noke” chulu maddi. (Mt. 24:45) Nja saa na, ko nzá ka ko famu fø noke bbʉ ná chutso ddadha bblo ri. Loroji na, njaro ko ka ko ba pekee kʉ ná lojadha chʉ adi nga ba ná kpakpalo dho le ka le tayarisha le nari djo, ro ko ka ko di riddi fø lo nzá ka ndi njini kodhó eneo na ri. Ri ká ngani ko njiri ngbǎ njati ko di riddi ko dho le ja nari nga kʉ dyodyu dhi lo ró? Adi ngaddi Biblia nǎ ro ni zørie ná lo djo. Nja saa na, Mungu dzá ndrŭ adi ba ná chutso ddadha ka ndi njani nzá na le ka le njinjí nari bbai. Ro ri ka ndi gø ndrŭ dhó shinga gø.​—Amu. 7:7; 8:10. w22.03 18-19 §15-16

Kodhó njʉnga dhi andiko nǎ kʉ Yesu pongʉe ndi thí nǎ ro krʉ ná lo. Yesu chungʉeri nari kʉ Yova si rili ndi di shi ndirigoti ke chungʉeri nari kʉ ndidzá Baba si ndi ngano nì. Yesu dhó lo nǎ ro ká ko ka ko ba ngbá somo? Atøni chi Yova dho rie hatari dhi lo kana ma ró. Fø ni njiri ró, ni ka ni dhori ni li ni “thí lu Yova djó.” (Mez. 3:5) Akonja Joshua dhó loroji, 15 ndidhó cho ngʉe ro, ke ró ngʉe nzɨ sini ná dhe. Ke gʉngʉe nzá gbani Yova dhó yadha na ná chulu le ndi tunza nari gʉ. Ke dhe nari nji, ke pongʉeri ndidzá mama dho: “Mama, Yova si ma ronga b’ob’o. . . . Mama, ma ripo ni dho: Ma churi nari kʉ, Yova si ma gaga. Ke chu madhó ngaddidha ndirigoti ma ma mbu nari maddi, ma ji ke ma thí nǎ ro krʉ.” Ko kana nja le ka ndi dhuri ndi tsó, ‘Njati rie madhó udha ka ndi li mbudha kana ná lo tso ró ma hwini ri ró, ma ká ka ma bbá madhó shinga bbʉbbʉ Yova dho na ndirigoti ma ká ka ma uri ke si ma ngano ni?’ w21.04 12-13 §15-16

Yova adi kpakpanga bbʉ ndidzá ndrŭ dho lod’radha dhi njí chulu. Ko di Biblia nǎ lod’ra ró, ko adi ko mbu bblo njati ndrŭ rr kodhó lo rr ma inga nzá ma ró. Nja ndrŭ bani na ná kpakpalo dzá lo dho, ndrŭ ka ndima ddiri ndima nzá ka ndima njí lod’radha dhi njí bbo ri. Njati rie fø ni adi ni mbu ri ró, achuri nari kʉ Yova adi ni nji ná lo nja mana na bbo. Ko jiri ko d’ralo ná føri Yova adi nja mana na bbo njati rie nzá ma ri ka ndi ka ko vʉ lod’ra dho abbá ro ri ró. Yova ka ndi liri ko d’ralo dawa djó ko ronga b’o ná ndrŭ dho ma inga wanganga dho ma. Njati ko ddi i ddo ró ko nji ná njí anziro ko ngʉ nji na njí na ró, ri ka ndi bʉ ko thí bʉ. Ro njati ko chu Yova adi ko tsotso kó ná chu ngbà ró, ri ka ndi liri ko ba kpakpanga ndirigoti ko ve kpakpalo tso hwè na. Ko nzá chu lo ko d’ra dho ná ndrŭ kana ro ká ie ma ka ndi si ngʉ Mukristo nari ro ri.​—Muh. 11:6. w21.05 24-25 §14-17

Tamaa lingʉeri Pi Daudi vi Yova nji ndi dho ná lo nga vi, Yova bbʉngʉe mali ma ke dho, ke chungʉeni bbo ndirigoti bí ina ke ngʉ adi sisi ndidhó mbubai djolu. Daudi chungʉeri nari kʉ Yova nji ná lo kʉ bí “nzá nanga le ka le zø nanga tsi!” (Zb. 40:5) Ro ddikpa saa na, Daudi vingʉe Yova nji ndi dho ná lo nga vi. Nì mai Daudi bbá isɨ ndrŭ ngʉe bí ro, ke jingʉe d’i ke bbá le. Fø le ró dho ngʉe Bath-sheba, ndirigoti le bbá ke ró dho ngʉe Uria, Hiti nǎ ke. Daudi njingʉe uzinifu le na ndirigoti le bangʉe linga. Daudi njingʉe ná lo ngʉe che bbo ndirigoti ke njingʉe nja lo ki maddi, ke lingʉeri le hwi Uria hwi! (2 Sa. 11:2-15) Daudi ká ngʉ ngbá lo ddi? Ke ká ngʉ riddi Yova nzá nja fø lo ri? Ngbà mai Daudi njingʉe njí Yova dho cho bí ro, ke bbangʉe tamaa tsu ndi na, føri bbʉngʉe njedha bbo ke dho. Hwè dhi lo kʉ, luti Daudi lengʉeni le ndidhó chenga nǎ ro, ke bangʉe hwè bbo dhonalo Yova njingʉe ke zø nji!​—2 Sa. 12:7-13. w21.06 17 §10

Njaro ko ka ko ddiri nari kʉ ko nga kʉ uwezo na ko ddi Biblia nǎ longa ndrŭ dho ri. Njaro ko ka ko ddiri nari kʉ, kodho ringani ko chulo bbo inga ko é ufundi na bbo nja ko ddi longa bblo ndrŭ dho d’e. Njati rie fø ni adi ni mbu ri ró, anja gbo kʉ ná lo nari ka ndi kó ni tsotso ndiro ni u nari kʉ, ni ka ni ddi Biblia nǎ longa ngbà nja ndrŭ dho. Ya kwanza, Yova adi ni nja ngbà ka ndi ddi longa ná mwalimu bbai. Ya pili, Yesu kʉ ‘bbonga na ra nǎ ndirigoti dz’ djó,’ ke jari ni ddi longa ndrŭ dho. (Mt. 28:18) Ndirigoti ya tatu, ni ka ni uri nari kʉ nja ndrŭ ka ndima kó ni tsotso ngbà. Yesu lingʉe ndi thí ndidzá Baba ddingʉe ndi d’ra ná lo djo ndirigoti ni ma ka ni njiri føi. (Yoh. 8:28; 12:49) Føri djolu pli ni ka ni neri nidhó lod’radha dhi kikundi adi ongoza ná ke ma, bblo chu njí ná painia ma, ni kʉ uzoefu na ná muhubiri ma na kó ni tsotso nja ni ddi Biblia nǎ longa ndrŭ dho d’e. Nja ni ngʉ bblo longaddi ná ke d’e, ringani ni di fø wahubiri goti mba longa ndima ra ddi ndrŭ dho ná saa na. w21.07 6 §12

I dz’ dzá mwisho kʉ chøchø nari bbai, ringani ko li ko thí Yova dhó chutso ddadha djo anzinga djolu pli. Ká addudho? Bbo mbudha dhi saa na, ko si ba ná nja lojadha si njani nzá ka nari bbai inga nga kʉ d’ʉ nari bbai. Bbʉbbʉ dhé, Yova nzɨ si loti ko dho ndindiro ri. Ro ke si loja ko dho vʉ ndi vʉ chutso ddadha dho ná kpa chulu. Føri nga sie rɨ le nanga rɨni chutso ddadha djo ná saa ri. Inga ɨ le ridhu ná saa ri: ‘Fø chutso ddadha ká si Yova dhó ro bbʉbbʉ, inga chutso ddá ná le-djoi djǒ nǎ ro?’ Nde ndrŭ dhó historia nǎ, kpakpa si e ná fø lo djolu ká ni sisi ngbaribbai? Fø logoti ko ka ko ba ngbaribbai ma ko adi tengenezo dhó chutso ddadha nja kpadjo nari nǎ ro. Njati rie nì, ni adi ni thí li njʉ ko ba ná chutso ddadha djo ndirigoti ni e tayari ngarrdha dho ri ró, bbo mbudha dhi saa djo ma ni si rinji fø ddi. w22.02 6 §15

Yova kongʉe Gideoni ma tsotso ko ndidhó 300 kʉ ná kpa ma na ndirigoti føri ka ndi lieri kpa é nodha na. Efraimu nă kpa nzá singʉe mbai podha dho ri, ro kpa singʉe ndiro ndima gʉni gʉ ke na, ndima nzá ke nzingʉe vita dho ri ná lo dho. (Amu. 8:1) Gideoni pongʉeri kpa dho nari kʉ Yova kongʉe kpa tsotso ndiro kpa njí bbo lo d’e. Føri kpa rrngʉe ná saa na kpa “thí jo tso kongʉe ko.” (Amu. 8:3) Gideoni vʉngʉeri ndi é nyenyenga na ndiro ndi li ngoi Mungu dzá ndrŭ kana d’e. Efraimu nǎ kpa dhó lo nǎ ro ko ba ná somo kʉ, nzɨ ko di madha ne ko dho, ro ko di madha bbʉ Yova dho. Dza bai ma, wazee ma na ka ndima ba somo Gideoni dhó lo nă ro. Njati ddikpa ke nanga kani ka ko nji ndi ró ná lo dho ró, akoneri ko chu addudho ma fø lo kani ke lu nari. Ko ka ko po mbai ke nji ná bblo lo dho. Nja ko njiri fø d’e ringani ko é nyenyenga na. Ro ri kʉ bblo ko kana nga é chøchø ko djoi ma na kodhó haki ko ne nari djolu. w21.07 16-17 §10-12

Yova bbʉ heshima ko dho ndi no ko ndi ró ji na nari chulu. Ko Mungu no ndi ró ji na ná lo dho, ko ka ko di kedhó njonjo kʉ ná sifa dhǒ. Loroji na, jidha ma, zølo ma, chi le tøni nari ma, chølo ma na. (Zb. 86:15; 145:17) Ko di njonjo fø sifa dhǒ ró, føri na ko madha bbʉ Yova dho ndirigoti ko ridho ko mbai ngʉ nì ke dho. (1 Pe. 1:14-16) Njati ko di kodhi ra nǎ baba nyǒ tho ná lo nji ró, ko ka ko è hwè na ndirigoti ko iso ka ndi pini pi. Yova no ko ndi ró ji na ná føri na ke dhori nari kʉ ke jiri ko é ndidzá familia nǎ ndrŭ. Yova thɨngʉe dz’ djó nga bblo ko dho. Ndrŭ ndi no nari njí Yova thɨngʉe dz’ djó nga ndrŭ dho. (Yob. 38:4-6; Yer. 10:12) Yova kʉ nì ngaddi ko djo ná ke ndirigoti ritsi adi bbʉ ná ke ná lo dho ke bbʉ bí kʉ ná bblo ritsi ko dho ndiro ko ba hwè d’e. (Zb. 104:14, 15, 24) Ke ddingʉenga ndi no ná ritsi djo nari goti, ke “njangʉeri ri kʉ bblo.”​—Mwa. 1:10, 12, 31. w21.08 3 §5-6

Ko krʉ dhó le bbʉ lod’radha ndirigoti longaddidha dhi njí. (Mt. 28:19, 20; Ro. 10:14) Ni ká ka ni jiri ni thɨ nidhó lo thika nzá fø bblo kʉ ná njí kana? Ali muradi ni nji ndiro nizø broshua Kufundisha ndirigoti ni njinjí ri nǎ lo na d’e. Nzɨ vi bblo kʉ ná muradi ni li ni nji nari nga dhonalo ri ka ndi bbʉ hwè Yova thí dho. (Kol. 3:12; 2 Pe. 1:5-8) Ko krʉ ka ko vʉri ko njinjí Yova dho bbo kpadjo ko ri nji nari djolu. Paradiso nǎ ko si njínji Yova dho kaka ná ngatsi. Nzá fø ddo d’e si go ro, njati ko njí Yova dzá njí kpakpanga na ró, kodhó hwè ka ndi ndrini ndri ndirigoti føri ka ndi liri nzɨ ko thí bʉni. Føri djolu pli ko ka ko bbʉ madha kodhi “hwè dhi Mungu” Yova dho. (1 Ti. 1:11) Føri dzá lodho akonji hwè ko kʉ na ná pendeleo dho! w21.08 25 §18-20

Njati rie ni dhingʉe Yova dzá Dimu bbá ró, ni chungʉe lo bbo Yova djo sese nga djó ro. Ni dho le ddingʉeri nari kʉ, ke kʉ Ngano ná ke, ke kʉ bblo kʉ ná sifa na ndirigoti ke riji ndi ngʉ dz’ djó nga paradiso. (Mwa. 1:1; Mdo. 17:24-27) Ro bí kʉ ná ndrŭ nzɨ adi Mungu kʉ nì nari u ri inga ke no krʉ kʉ ná ritsi nari u ri. Fønga rɨngana kpa adi ri u nari kʉ shinga singʉe ndi ro, føri goti ri lengʉeni le kpø ri ngʉ bbobbo shi di ná ritsi ná ngadjo. Fø lo adi u ná nja ri kʉ bbo nji darasa ná ndrŭ. Kpa adi ripo nari kʉ sayasi adi ridho Biblia nǎ kʉ kali ndirigoti Ngano ná ke djo ndima dhó udha li nari kʉ nga dhó akili kʉ ná kpa, nzá zø darasa bbo ná kpa inga lele adi lo u ná kpa. Rie bicha ma ko kʉ Yova dzá Dimu inga ø ma ko kʉ bbʉbbʉlo kana ri ró, ringani ko li kodhó udha kpakpa. Njati ko njiri fø ró, ndrŭ di ripo Biblia nǎ lo kʉ kali ró, ko nzá ka ko shani ri.​—Kol. 2:8. w21.08 14 §1-3

Abeli ma, Noa ma, Abrahamu ma, Yobu ma na ngʉ adi heshima bbʉ ndirigoti kpa ngʉ adi jidha dhǒ Yova dho ndima dhó ngarrdha ma, udha ma, ndirigoti bbʉdha ma na chulu. Kpa ngʉ adi madha bbʉ Yova dho ndima thí nǎ ro krʉ, ná føri dho Yova ngʉ adi kpadhó madha tso u u. Føri goti Yova bbʉngʉe yadha Abrahamu nǎ gø dho Musa chulu. Fø yadha nǎ le d’rangʉe bí kʉ ná lo ngbaribbai ma Yova ngʉ riji le má ndi nari djo. Yesu dhe ndirigoti ke ga nari goti, Yova nzá nzingʉeri ki le bbʉ madha ndi dho Musa dhó Sheria ngʉ rinzi nari bbai ri. (Ro. 10:4) Wakristo ngangʉe ø yadha ndima dyø nari tso, ná føri ngʉe “Kristo dzá yadha.” (Gal. 6:2) Ringangʉeni kpa rrnga fø “yadha” dho, nga ndima rrnga liste djó le kpe ná yadha dho ri, ro ndima dyø Yesu dhó loroji ndirigoti ndima dyø kedhó mafundisho. Njʉ maddi Wakristo adi kpakpanga nji bbo ndiro ndima dyø Kristo nja ndima bbʉ hwè Yova thí dho ndirigoti ndima “ba klø” d’e.​—Mt. 11:29. w22.03 20-21 §4-5

Yova adi ndidzá nzø rr rr. Ke rrngʉe ndidzá Ngba dhó sala dz’ djó ke ngʉe ná saa na. Yova rrngʉe kedhó sala bbo na mana kʉ ná lo nanga ke ngʉ vʉ ná saa na, føri ngʉe ke una 12 kʉ ná kpa ke ngʉ vʉ ná saa. (Lu. 6:12, 13) Ndirigoti ke rrngʉe Yesu dhó sala kpakpalo kana ke ngʉe ná saa na maddi. Yesu nanga Yuda dzi nari nji, ke nzingʉe nga ndidzá Baba tsó føri goti ka ndi dae ná lo djo. Yova nzá rrngʉe kedhó sala dhé ri, ro ke chongʉe malaika ndiro ndi li ndidzá ji dhi Ngba kpakpa d’e. (Lu. 22:41-44) Njʉ maddi Yova adi ndidzá njí dhi kpa dhó sala rr rr, ndirigoti ke adi kpadhó sala goti ngʉ ngbà thonga ná saa na ndirigoti ngbà thonga nari bbai. (Zb. 116:1, 2) Akonja ngbaribbai ma Yova ngʉngʉe Inde nǎ ddikpa le-ve dhó sala goti nari. Le ngʉ nzani ndi thí ró lo kʉ bbo nari dho ndirigoti le ngʉ adi nganzi ndi thí nǎ ro krʉ fø lo djo. Le ndiri: “2019 nǎ, bi 5 nǎ JW Télediffusion nǎ programu tingʉe lo ko ka ko njí ná lo djo rie lo le nanga d’o ri ró. Føri chulu madhó sala goti ngʉngʉe ngʉ.” w21.09 21-22 §6-7

Ni ká ddinga karne ya kwanza na ngʉe ná Wakristo bbangʉe ndima dhó ritsi krʉ, ndirigoti kpa ngangʉe ø maisha tso nari dho kpa ka ndima baeni na ná kpakpalo djo ngbà? Kpa dho ringʉngani ndima é udha na, ndima churi nari kʉ Yova ka ndi si ndima tsotso ko ngbà ndima dhó lo u ná ritsi na. Ro kpa tsotso ka ndi koe ná nja lo ma ngʉe ddi. Cho mbʉ anzi, Waroma d’e Yerusalemu ronga tso nari njí, mtume Paulo bbʉngʉe bbo nǎ mana kʉ ná shauri Waebrania dho: “Nidhó maisha nǎ, nzɨ ni bba mbø ni ji nari ddá chutso ni dho, aniba hwè nidhó kʉ ná ritsi dho. Dhonalo ke pori ɨ: ‘Ma nzɨ si ni ro bba ri, ma nzɨ si ni ro bu pɨpɨnanga ri.’ Føri dho nga ró do ro, ko ka ko po ri: ‘Yova kʉ ma tsotso kó ná ke; ma nzá ka ma nji do ro ri. Ndrŭ ká ka ndima njí addu ma ró?’” (Ebr. 13:5, 6) Paulo dhó shauri na njingʉe njí ná ndrŭ dho ringʉe sʉsʉ ndima ba hwè ndima dhó sese ngʉe ná ritsi dho. Kpa ungʉeri u Yova si ndima dhó loji ná ritsi tso gba nì. w22.01 4 §7, 9

Njati ko di ngaddi zølo dhi ke djo ró, føri adi ngano ko dho nari kʉ bblo loti ndrŭ na ná ke, bbo ngaddi ndrŭ djo ná ke ndirigoti nì ritsi bbʉ ndrŭ dho ná ke. Ko ka ko ddinga Yesu d’rangʉe ná bblo kʉ ná Musamaria dhó loroji djo. Fø ke dhongʉe “zølo bbo” bbabandi njingʉe ná ddikpa Muyaudi dho. Musamaria, fø Muyaudi dzá “ri zø njingʉe bbo” ndirigoti ke løngʉe mupango ndiro ke ronga b’oni bblo d’e. (Lu. 10:29-37) Fø loroji longaddi ko dho Yova dhó bblo kʉ ná sifa djo, føri kʉ zølo. Yova adi zølo dhǒ ko dho ndidzá jidha dzá lo dho. Ndirigoti ke adi ndidzá sifa dhǒ ko dho njonjo kʉ ná chulu krʉ ddo ró. Zølo le ka le dho ná ddikpa nja chu ki ma kʉ ddi. Nja saa na, zølo dhi ke ka ndi vʉri nzɨ ndi bbʉ malipizi, ri le ka le bbʉ dho ná le dho. Føri bbai Yova maddi adi zølo dho ko dho. Zaburi ndi ná ke pongʉeri nari bbai: “Ke nzɨ adi rinji ko ró, kodhó cheri dho ri kae le njiri nari bbai ri.” (Zb. 103:10) Nì mai ri kʉ føro, nja saa na Yova adi malipizi bbʉ chenga nji ná ke dho. w21.10 8 §1-2

Anziro ko poeri nari bbai, Yova adi ndidzá chi kʉ ná jidha dhǒ nì ma na ndima kana nga kʉ chøchø ná ndrŭ dho. Fø lo ko ka ko nja Pi Daudi ma, nabi Danieli ma na pongʉe ná lo nǎ. Loroji na, Daudi pongʉeri: “Adi nidzá chi kʉ ná jidha dhǒ ngbà chu ni ná ndrŭ dho. Yova dzá chi kʉ ná jidha kʉ theinga dho nì ke do nji ná ndrŭ dho.” Ndirigoti Danieli pongʉeri: “Ee Yova bbʉbbʉ Mungu, [ke] adi chi kʉ ná jidha dhǒ ngbà ji ndi ná ndrŭ dho ndirigoti nì ngarr ndidzá yadha dho ná ndrŭ dho.” (Zb. 36:10; 103:17; Da. 9:4) Ndindini ná fø lo ridho nari bbai, Yova adi chi kʉ ná jidha dhǒ ndidzá njí dhi kpa dho dhonalo kpa chu ke chu, kpa adi ke do nji, ndirigoti kpa adi ngarr kedzá yadha dho. Yova adi ndidzá chi kʉ ná jidha dhǒ ndidzá ndrŭ dho, ndi dho madha bbʉ ná ndrŭ dho. Yova dho ko njínjidha tso nga nari nji, ko njangʉe ndrŭ krʉ dho ke adi dhǒ ná jidha. (Zb. 104:14) Nì mai ri kʉ føro, ko kʉ Yova dzá njí dhi kpa nari dho ko adi faida ba kedzá chi kʉ ná jidha nǎ ro. w21.11 4 §8-9

Ringani nga ko rrnga Yesu ja ná lo dho krʉ saa ró. Njʉ bí kʉ ná ndrŭ adi riji ndima rr bbo chuni ná walimu dhó mafundisho. Ndrŭ jirie dini nǎ fø bbobbokpa bbo ndirigoti ndrŭ adi madha bbʉ kpa dho. Bí kʉ ná ndrŭ adi ra kpadhó dra dza na ma, ndrŭ adi kpa dhó buku ma dzi ndirigoti nja ndrŭ adi mbø bbʉ bí ndiri na ndima kó kpadhó dini tsotso d’e. Fø ndrŭ adi ndima dhó walimu ddi ná lo u krʉ. Ndrŭ nanga adi keni ke ndima dhó walimu ddi ná lo dho. Ndrŭ nanga adi keni bbo kpadhó mafundisho dho ddiddi Yesu dhó mafundisho dho ndima nanga ka ndi keeni nari bbai! Ro bbʉbbʉ Wakristo nga e ndima djó bbobbonga na ri. Nì mai ri kʉ føro, ko adi heshima bbʉ chutso ddá ko dho ná kpa dho, ko urie Yesu ddingʉe ná i lo: Ni krʉ kʉ le-djoi.” (Mt. 23:8-10) Ko nzɨ adi madha bbʉ ndrŭ dho ri, kpa é dini nǎ bbobbonga ma, inga politiki nǎ bbobbonga ma ró. Ndirigoti ko nzɨ adi kpadhó nja lo tsotso kó ri. Nì mai ri kʉ føro, ko nzɨ adi ko tso tsú poliki nǎ lo na ndirigoti dz’ dzá lo na ri. Fø lo krʉ kana ko e njonjo wakristo ndima nzǐ ná ndrŭ ró ro.​—Yoh. 18:36. w21.10 20 §6-7

Ngbà jiri ndi ngʉ mutakatifu ná Mukristo dho ringani ndi nonga nari kʉ ddikpa ritsi ma, inga ddikpa le ro ma ngaddi ka ndi é mana na pli ndi dho Mungu na ndima kana kʉ ná kau djolu ri. Ndirigoti ko kʉ Yova dzá Dimu nari dho, ko adi rine nzɨ ko nji Mungu ró takatifu kʉ ná dho ka ndi sa ná ritsi. (Law. 19:12; Isa. 57:15) Waizraeli dhongʉe ndima u Yova kʉ ndima dhi Mungu nari kedzá yadha dho ndima ngarr nari chulu. Mambo ya Walawi 18:4 ripo: “Nidho ringani ni njí madhó lod’idha dhi longavʉdha ndirigoti nidho ringani ni njí ma ja ná lo ndirigoti ni bbí ri nǎ. Ma kʉ Yova nidhi Mungu.” Sura 19 nǎ kʉ Waizraeli dho le ndingʉe ná nja “yadha” ro. Loroji na, verse 5-8, 21, 22 tilo zǎ le bbʉ bbʉdha nari djo. Waizraeli ngʉ adi fø bbʉdha bbʉ nzá ‘Mungu dhó takatifu kʉ ná ritsi ka ndi sani ná chulu.’ Fø andiko ko zø nari ko ronga cho ndiro ko bbʉ hwè Yova thí dho ndirigoti ko bbʉ ngbà tso ke u ná madha dhi bbʉdha ke dho d’e, ddiddi Waebrania 13:15 rid’ra ko njiri nari bbai. w21.12 5-6 §14-15

Ø chi ndoa ná ndrŭ ka ndima ba faida nì ndima thí li Yova djo ná nja ndrŭ dhó lo nǎ ro. Nja kʉ ná dza dhi ndrŭ ka ndima nji ddo bí krʉ saa ró le njínji Mungu dho nari kana. Njati rie nidhó muradi djo ni ngaddi ri ró, ako shauri fø kpa tsó. Føri kʉ ni thí ni li Yova djó nari ni ka ni dhǒ ná chu. (Mez. 22:17, 19) Anonga nari kʉ, ndoa kʉ Yova dhó ro si ná kado. (Mt. 19:5, 6) Ke jiri ndoa chi ná ndrŭ nji fø kado hwè. Ø chi ndoa ná ndrŭ, anidi nidhó maisha nǎ ni nji ná lo nanga nene. Ni nji ná lo ká ridho ni Yova dho ró si ná fø kado nja mana na nia? Anidi loti Yova na sala chulu. Anidi utafiti nji kedzá lo nǎ ro ndirigoti anidi njínji ri na nidhó maisha nǎ ni bani na ná njonjo kʉ ná kpakpalo kana. Anidyø Yova bbʉ nidho ná shauri. Ni ká ni uri u nari kʉ, ni sie hwè na njati ni li Yova dzá njí anziro nidhó ndoa kana ró! w21.11 19 §16, 18

Yakobo ngʉe bblo kʉ ná nganjadha na ndi nganga djo. Yakobo nzɨ ngʉ riddi ndi kʉ mana na pli nja Wakristo djolu ndi kʉ Yesu dhi djona ndirigoti ndi kʉ bbo na mana kʉ ná pendeleo na nari dho ri. Ke ngʉ adi ndi lai Wakristo nzǐ “ma djoi ji dhi kpa.” (Yak. 1:16, 19; 2:5) Ke nzɨ ngʉ adi riji ndrŭ ddiri nari kʉ ndi kʉ kaka ná ke ri. Somo: Anonga nari kʉ ko krʉ kʉ chenga dhi ndrŭ. Kodho nzá ringani ko di riddi ko kʉ pli longa ko ddí dho ná ndrŭ djolu ri. Ká addudho? Njati ko di rili kodhó mwanafunzi ddiri nari kʉ ko nzɨ adi kosa ro nji ri ró, ke thí ka ndi bʉni bʉ ndirigoti ke ka ndi ddiri ndi dho nzá ri ro ka ndi ka ndi rrnga Yova dho kaka ná ngatsi ri. Ro, njati ko di ridho ko dho ma nga ddi ringʉe sʉsʉ ko njinjí Biblia nǎ nzɨ thika leni ná yadha na ndirigoti ko d’ra ngbaribbai ma Yova kongʉe ko tsotso ndiro ko si fø kpakpalo djolu nari ró, ko ka ko kó kodhó mwanafunzi tsotso ndiro ke njari nari kʉ ndi dho ma ri ka ndi ka ddi ndi njinjí Yova dho. w22.01 11-12 §13-14

Ko di ra anzi Yesu bbai ko ngaddi nari na ró, ko adi njini ke bbai ndirigoti ko adi kedhó sifa dhǒ. (Ebr. 1:3) Njaro ko ka ko ddiri: ‘Yesu kʉ kaka ná ke, ro ri ro nzá ka ndi ka ko njini d’ʉ ke bbai ri!’ Rie fø ni adi riddi ri ró, addinga i lo djo. Ya kwanza, ni nongʉeni Yova ma, Yesu ma na ró ji na. Føri dho, ni ka ni vʉri ni dyø kpa, ndirigoti ri ka ndi kaka ni njí ri ro ddikpa ngatsi. (Mwa. 1:26) Ya pili, Mungu dhó roho takatifu dzá kpakpanga dada krʉ nononi ná ritsi dzá kpakpanga djolu. Ri dhó le tsotsokodha chulu ni ka ni nji nzá ro ni ka ni njie ni nganga dhó klø na ná ritsi. Ya tatu, Yova nzɨ rinzi ni tso ni dhǒ roho dzá tunda kaka nari bbai njʉ ri. Bbʉbbʉ dhé, kodhi ji dhi Baba si fø kpakpanga bbʉ i dz’ djó ngab’odha na kʉ ná ndrŭ dho, kaka ná ndrŭ ndima ka ve si ngʉ cho 1000 kana ro. (Ufu. 20:1-3) Njʉ Yova nzǐ ko tsó nari kʉ, ko njí krʉ ko ka ko nji ná klø ndirigoti ko li ko thí ndidhó le tsotsokodha djo. w22.03 9 §5-6

Ri nga kʉ sala chulu dhé ko kana kau ka ndi ngʉ kpakpa Yova na ri. Mungu dzá lo ko zø nari ma, njudha dhi ngana ko si nari maddi ka ndi kó ko tsotso ko kana nga ngʉ chøchø Mungu na. Biblia ni zø ná saa na ndirigoti njudha dhi ngana ni kʉ ná saa na ni ka ni nji ná nja lo ro ká kʉ ddi? Adhu ri ni tso, ‘addui ká adi ma djonga ngbʉ njudha dhi saa na inga Biblia nǎ longa ma ji ma ne ná saa na?’ Ni ká adi ndrŭ dhó apel ba, inga mesaje ba nidhó telefone na inga nja kʉ ná elektroniki dhi ritsi chulu? Ni rá ri utso d’i Biblia ni zø ná saa na inga njudha dhi saa na ni ngaddi d’i lo djo ró, anzi ri Yova kó ni tsotso. Ri nga ka ndi é sʉsʉ ni li ni thí kiroho nǎ lo djo ri, ro kiroho nǎ lo djo ni di ni thí li nari kʉ bblo ni ri nji ri. Anziri ni ba ni thí ronga ma, nidhó “nyodyu dhi kpakpanga” ma na ronga ka ndi b’o ná ngoi.​—Flp. 4:6, 7. w22.01 29-30 §12-14

Pi Uzia gʉngʉe shauri gʉ. Ke tsungʉe hekalu na bbakuhani dho dhé ringangʉeni ndima tsu ná ngana ndirigoti ke mbungʉeri ndi bɨ uvumba Yova dho. Bbakuhani pongʉeri ke ni ɨ: “Uzia, ri nga kʉ nidhó njí ni bɨ uvumba Yova dho ri! Ri kʉ bbakuhani dho dhé ngani kpa nji ná njí.” Uzia ká njingʉeri ngbǎ? Njati ke ungʉe shauri u ndirigoti ndi vʉ hekalu nǎ ro théi ró, Yova ka ndi njie ke zø njí. Fønga rɨngana, “Uzia . . . nanga kangʉeni bbo.” Ke ká rrngʉe shauri nzá addudho? Ke ddingʉeri ndi kʉ pi ná lo dho ndi ka ndi njí krʉ ndi ji ná lo. Ro Yova nzɨ ngʉ lo nja føri bbai ri. Ke njingʉe nzá tso uni ndi njí ná lo nari dho, ke ro korøkorø tangʉe ndirigoti ke mangʉe “korøkorø dhi ke kpø ndi dhe ná nga djo.” (2 Ny. 26:16-21) Uzia dhó loroji ngaddi ko dho nari kʉ, ko é ie ma ró njati ko gʉ Biblia nǎ ro si ná shauri gʉ ró, Yova nzá ka ndi u ko tso ro ri. w22.02 9 §7

Nzá d’e ndi dha drrdrr ri pʉ ndi ró ro ná kedhó nganjadha ma, ke nji ná lo ma na krʉ e che. (Kol. 3:9) Fø ri na mana kʉ ke ka ndi é dya, bbo ndi nǎ thø kʉ ro, nzɨ ndi mbai po ro ndirigoti nodha na. Ke nanga ka ndi di jini pornografia ma, jeuri dhi filme ma na ndi nja nari dho. Bbʉbbʉ dhé, ke ka ndi é bblo nyi ro na maddi ndirigoti ke ka ndi di ndi mbu che ndi ti ná lo inga ndi nji ná lo djotsina. Ro ke nzá d’e riji ndi ø ndidhó nyi ma, ndidhó ngaddidha ma na thika ri. (Gal. 5:19-21; 2 Ti. 3:2-5) Ko kʉ nzá kaka ná ndrŭ nari dho, ko kana ddikpa le ro ma nzá ddi ka ndi pʉ che kʉ ná ngaddidha inga tamaa ro ndi thí nǎ ro inga ndidhó ngaddidha nǎ ro krʉ ri. Nja saa djo, ko po ná lo inga ko nji ná lo ka ndi d’o ko nanga d’o luti. (Yer. 17:9; Yak. 3:2) Ro, ko kló drrdrrr le dha klo ko ró ro ná saa na, kodhó nganjadha ma, ko nji ná lo ma na nga ka ndi é che vi ri. Ndirigoti ko ka ko ngʉ bblo.​—Isa. 55:7. w22.03 3 §4-5

Wazee, anidi ni djoi ma, ni vei ma na dhó bblo sifa nja. Ko krʉ kʉ nzá kaka ná ndrŭ, ro ko krʉ lai djó e bblo kʉ ná sifa ro nì dhé. Bbʉbbʉ dhé, wazee dho ringani ndima di shauri bbʉ le-djoi ma, le-vei ma na dho bí ina. Ro mutume Paulo bbai, wazee dho ringani ndima njí kpakpanga ndiro nzɨ ndima li ndima thí, thø na ndrŭ ti ná lo ma, ndrŭ nji ná lo ma na djo. Føri rɨngana, ri kʉ bblo kpa li ndima thí ndrŭ ji Yova, ndrŭ ngatsove ke dho ndima njínji nari kana ndirigoti ndrŭ jirieri ndima njí bblo lo nari djo. Wazee di ndima thí li ndrŭ dhó bblo kʉ ná sifa djo nari ka ndi liri le-djoi ma, le-vei ma na krʉ é jidha na ndima kana kutaniko nǎ. Aninonga nari kʉ, Yova nzɨ rinzi ni é kaka ná ndrŭ ri; ro ke rinzi ni tøni chi. (1 Ko. 4:2) Ni ka ni uri u nari kʉ, Mungu nanga jini bbo ni nji ndi dho ná njí dho maddi. Yova nzɨ vi “ni nji ná njí nga ro ri ndirigoti ndi ró dho dho ni jidha dhǒ ni nji ná njí chulu ndirigoti ni ra anzi watakatifu dho ni njínji nari na nari nga ro ri.”​—Ebr. 6:10. w22.03 31 §19, 21