D’o ri ni nanga d’o ná saa na ká ni ka ni ve ngatso ngbaribbai?

D’OD’O ka ndi e ddiddi lɨ o ko thí nǎ ná no bbai. (Mez. 12:25) Ni ro ká d’erie nzani nza b’lo ni nanga ri d’od’o nari djotsina? D’od’o djotsina ká ni d’erie ni ro mbu nzá ka ndi ve ngatso bí cha nari bbai? Njati rie fø ro ni nga kʉ ddiro ri. Ko kana bí kʉ ná ndrŭ adi ndima mbu njenjeni ri, bʉ thi bʉni nari bbai, ndirigoti d’o nanga ri d’o nari bbai njonjo kʉ ná lo dho. Loroji na, nja kʉ ná ndrŭ ndima dhó familia nǎ dhe nji ná ndrŭ ronga b’o, nja kʉ ná ndrŭ vi ndima dhi ji ndima ji ná ndrŭ dhe chulu, ndirigoti nja kʉ ná ndrŭ nzani chʉ ngaba ná kpakpalo dho. Nde, addui ká ka ndi kó ko tsotso ndiro ko ve ngatso d’o ma ri ko nanga d’o ro?a

Pi Daudi dhó loroji ka ndi kó ko tsotso bbo ndiro ko chu ngbaribbai ma ko ka ko hwini bbo ri ko nanga d’o nari tso ró d’e. Ke bangʉe njonjo kʉ ná kpakpalo ndidhó maisha nǎ, nja saa na ke ngʉ adi tsetse dhe ró. (1 Sa. 17:34, 35; 18:10, 11) Daudi tsotso ká addu kongʉe ndiro ndi ve fø d’od’o tso d’e? Ko ká ka ko dyø kedhó loroji ngbaribbai?

NGBARIBBAI MA DAUDI HWINGɄENI NDI NANGA RI NGɄ D’O NARI TSO RÓ NARI

Daudi hwingʉeni njonjo kʉ ná kpakpalo na ddikpa saa kana. Ddikpa saa na Daudi ngʉ nganyí Pi Sauli ngʉ rine ndi hwi ke hwi naridho. Anzi ngaddi fø saa na njingʉeni ná lo djo di. Daudi ma, ndi una kpetsi kpa ma na ngʉ ngʉ Ziklag na ná saa na, kpa singʉe krʉ mbubai sø ndima bbá ritsi ro, bɨ kpa bɨ ndima bbá dza ro ndirigoti ra kpa ra ndima dhó familia nǎ ndrŭ na ro. Daudi ká njingʉeri ngbaribbai? “Daudi ma, ndi una kpetsi kpa ma na dzzngʉe bbo, kpø ndima njeni nje dzz dho ná nga djo.” Føri goti Daudi thí bʉngʉeni bbo dhonalo li djó ke lingʉe ndi thí ná kpa “jingʉeri ndima bú ke dju na.” (1 Sa. 30:1-6) Føri dho, ddikpa saa kana dhé Daudi hwingʉeni njonjo gbo kʉ ná kpakpalo na: Kedhó familia ngʉe hatari nǎ, ke una kpetsi kpa jingʉeri ndima hwi ke hwi ndirigoti Pi Sauli ma ngʉ rine ndi hwi ke hwi ddi. Anzi ngaddi ngba ngatsi ma Daudi thí ka ndi bʉeni nari djo!

Daudi ká njingʉeri ngba føri goti? Fø saa na Daudi “lingʉe ndi thí kpakpa ndidzá Mungu Yova djo.” Ko churi nari kʉ Daudi nzingʉe nga Yova tso ke kó ndi tsotso ndirigoti ndi ddinga ngbaribbai ma Yova kongʉe ndi tsotso b’lo da ná saa na nari djo. (1 Sa. 17:37; Zb. 18:2, 6) Daudi chungʉeri nari kʉ ringani ndi ne Yova dhó chutso ddadha ndi nji ná lo kana. Daudi nzingʉe nga Yova tso ndiro ndi chu addu ma ndi ka ndi njí nari d’e. B’lo Daudi ba Yova dhó chutso ddadha nari goti ke njingʉe ndi ka ndi njie ná lo théi. Føri dzá lodho ke ma, ndi una kpetsi kpa ma na krʉ ronga Yova lengʉe le ndirigoti kpadhó familia ma, kpadhó ritsi ma na krʉ ngʉngʉe ngʉ. (1 Sa. 30:7-9, 18, 19) Ni ká nja Daudi njingʉe ná gbo kʉ ná lo ddi? Ke nzingʉe nga Yova tso ndiro ke kó ndi tsotso, ke ddingʉe nga b’lo Yova njingʉe ndi dho anziro ná lo djo, ndirigoti ke rrngʉe nga Yova dhó chutso ddadha dho. Ko ká ka ko dyø Daudi ngbaribbai? Akonja gbo kʉ ná chu.

D’O RI NI NANGA D’O NÁ SAA DJO ADYØ DAUDI

1. Anji sala. Ko nanga ri di d’od’o ná saa na, ko ka ko nzinga Yova kó ko tsotso ndirigoti ke bbʉ nyodyu ko dho. Sala ka ndi kó ko tsotso ndiro ko mbu ko bblo ke na ko loti ko thí nǎ kʉ ná lo djo ná saa na. Ko bani na ná nja hali nǎ ko ka ko njí dʉ kʉ ná sala inga ko ka ko nzinga ko thí nǎ. Krʉ saa ró ko rinzi Yova kó ko tsotso ná føri na ko ridho ko li kodhó ngab’odha ngba ke djó, ddiddi Daudi njingʉeri nari bbai, ɨ ndi pongʉe ri ro: “Yova kʉ madhó bbo dju, madhó kpakpanga ndirigoti ma gø ná ke. Madzá Mungu kʉ madhó bbo dju, ma runi ná nga.” (Zb. 18:2) Sala ká adi njínji bbʉbbʉ? Kahlia ró dho kʉ ná painia kʉ ná le-ve pori ɨ: “B’lo ma nji sala nari goti ma adi ma mbu ngoi na. Sala adi ma tsotso kó ma ddinga ddiddi Yova ngaddi nari bbai. Ndirigoti ma li madhó ngab’odha ke djo.” Føri djolu pli, sala kʉ Yova dhó ro si ná kado, ri adi ko tsotso kó ndiro ko hwini d’od’o tso ró d’e.

2. Addinga. Ni di ngaddi b’lo njingʉeni ni ró ná lo djo ná saa na, ká ni adi ngaddi Yova kongʉe ni tsotso nja ni ve kpakpalo tso d’e nari djo ni? Ko di ngaddi ngbaribbai ma Yova kongʉe ko tsotso ndirigoti ndidzá njí dhi kpa tsotso b’lo da ná saa na nari djo ró, ko adi ngoi ba ndirigoti ko adi kodhó ngab’odha li bbo ke djo. (Zb. 18:17-19) Joshua ró dho kʉ ná ddikpa muzee pori: “Madhó kʉ b’lo goti Yova ngʉrie ma dho ná sala dhi liste. Ri adi ma tsotso kó ma no mahitaji dhi saa na ma nzingʉenga Yova tso, ro ke kongʉe ma tsotso nari nga.” Bbʉbbʉ dhé, ko di ngaddi b’lo da ná saa na Yova koe ko tsotso nari djo ró, ko adi kpakpanga ba ndiro ko hwini d’od’o tso ró d’e.

3. Anjinjí. Addu ma ko vʉ ko njí nari njí, ringani ko ne chutso ddadha Mungu dzá lo nǎ ro. (Zb. 19:7, 11) Bí kʉ ná ndrŭ ra ri utso d’i nari kʉ, utafiti ndima nji ddikpa andiko djo nari goti ndima ka ndima njinjí bblo ri na ndima bani na ná lo kana. Jarrod ró dho kʉ ná muzee pori: “Ddikpa andiko djo ma utafiti nji ná føri adi ma tsotso kó ma chu lo bbo fø andiko djo ndirigoti ma famu Yova po ma dho ná lo bblo. Føri adi ma tsotso kó ma u ma zøe ná lo ndirigoti ma rrnga kedhó chutso ddadha dho.” Biblia chulu ko di Yova dhó chutso ddadha ne ndirigoti ko njinjí fø chutso ddadha na ró, føri si rili ko e ngoi na ndirigoti hwè na njati rie d’o ma ri ko nanga d’o ró.

YOVA SI NI TSOTSO KO NJA NI VE NGATSO D’E

Daudi chungʉe nari kʉ, nja ndi hwini ndi nanga rid’o nari tso ró bblo d’e, ndidhó lo u Yova dhó letsotsokodha. Yova dhó fø letsotsokodha dho Daudi nanga jingʉeni bbo nari dho ke pongʉeri ɨ: “Mungu dzá kpakpanga dho ma ka ma dji dji ukuta ro lu, bbʉbbʉ Mungu kʉ kpakpanga adi thó ma ro ná ke.” (Zb. 18:29, 32) Ko ka ko di riddi nari kʉ, ri kʉ kpakpa ko si ko bani na ná kpakpalo djolu, inga ko ve ri tso. Ro Yova dhó letsotsokodha chulu ko ka ko si krʉ kʉ ná kpakpalo djolu! Bbʉbbʉ dhé, Yova tso ko nganzi ná saa na, akoddinga krʉ ke nji ko dho ná ritsi djo, ndirigoti akorrnga kedhó chutso ddadha dho. Ko njiri føro ko ka ko uri u nari kʉ ke si kpakpanga ma, nyodyu ma na bbʉ ni ko dho nja ko hwini ko nanga rid’o nari tso ró d’e!