[gru djó ro thá djo] kʉ Marcelo ma, Yomara ma, Hiver ma na. Kpa krʉ dhó kʉ Tafsiri ya ulimwengu mupya braille nǎ le ndi ndi espagnole nǎ ro
Kpa njangʉe jidha njínji nari nja
YOMARA ma, ndi djoi kpa Marcelo ma, Hiver ma na na adi di Guatemala nǎ ddikpa karr bba nø nǎ. Yomara ngangʉe Biblia zødha tso Yova dzá Dimu na, ndirigoti luti le djoi maddi singʉe Biblia zødha tso nga kpa na. Ro, kpa ngʉe ddikpa kpakpalo na. Kpa gbo ro krʉ nyǒ ro nga ngʉeri ndirigoti kpa nzá chungʉe braille dhi maandishi zødha ro ri. Føri dzá lo dho nga kpa zø na ná ke ngʉ adi praragrafu zø ndirigoti ke ngʉ adi ri nǎ kʉ ná verse ma zø ddi kpa dho.
Njudha dhi ngana kpa ra nari mangʉe nja kpakpalo i kpa dho. Chøchø kʉ kpa bbá ro ná Pidhinga dzá dza na le ngʉ adi miniti 40 nji, fø ga nzá kpa ro ka ndima sie ndima ro ri. Føri dzá lo dho kutaniko nǎ le djoi kpengʉeri ndima di ra kpa d’ud’u njudha krʉ dho. Ndirigoti kipindi bbʉdha tso le djoi ngangʉe kpa djo yenga ddo kana e ná njudha nǎ ro, le djoi ngʉ adi kpa tsotso kó kpa lø ndima si po ná lo ndima djǒ na.
Cho 2019 nǎ bi 5 na kutaniko ngangʉe njudha njidha tso kpa bbá karr bba (village) nø nǎ. Føri goti mapainia wa kawaida kʉ ná ddikpa dza dhi ndrŭ singʉe fø karr bba gʉ. Fø dza dhi ndrŭ lingʉeri ri é ndima dhó kusudi ndima ddi braille dhi maandishi luga zødha ma, ri ndidha ma na fø gbo kʉ ná le djoi dho, nzá mai ndima chungʉe føri ká ndima ka ndima njie ngbaribbai ma nari ro. Kpa rangʉe buku nanga ndrŭ adi dzi nǎ ná duka na nja ndima dhunga ngbaribbai ma le adi braille zø ndirigoti ri ddi nari djo d’e.
Marcelo komatere bbʉ njudha dhi ngana
Sese dhé bi ro da nari goti, fø le djoi zøngʉe braille zø nga dhi kpakpalo ro, ndirigoti føri kongʉe kpa tsotso kpa ra anzi kiroho nǎ d’e.a Njʉ Yomara ma, Marcelo ma, Hiver ma na e mapainia wa kawaida. Marcelo kʉ Mutumishi ya huduma. Kpa adi njínji Yova dho kpakpanga na. Kpa njínji Yova dho kpakpanga na nari adi kpa kuso lu kʉ ná ndrŭ ronga ma cho nja ndima njiri fø i d’e.
Fø gbo kʉ ná le djoi adi mbai po bbo kutaniko kongʉe ndima tsotso jidha na nari dho. Yomara pori “Ya kwanza ko njungʉe Yova dzá Dimu na ro kpa dhongʉe bbʉbbʉ Wakristo e na ná jidha ko dho.” Marcelo ndri ri “Kodhó kutaniko nǎ ko e bblo pli kʉ ná bbakau na, ndirigoti ko kʉ dz’ djolu gble ji jini ndima kana ná le-djoi ma, le vei ma na na ddi ndima tso gbani ro.” Yomara ma, ndi djoi ma na adi paradiso Yova si i dz’ ngʉ ná saa b’o ndima nǎ bbo ù na.—Zb. 37:10, 11; Isa. 35:5.
a Braille zødha ma, ri ndidha ma na dho le thɨ ɨ djǒ ripo ná brochua achu braille zødha nja ni kó nga nyǒ kʉ ná ndrŭ tsotso d’e.