Ara anzi Biblia nǎ bbobbo mafundisho nǎ ro ni wø lo chu nari na

1. Ya kwanza ni chungʉe bbʉbbʉlo ná saa na ká Biblia nǎ mafundisho løngʉe ni ronga ngbaribbai?

BIBLIA nǎ bbobbo mafundisho wøngʉe kodhó maisha thika. Loroji na, ko chungʉe Mungu ró dho kʉ Yova ná saa na, ko ngangʉe chøchø ko ndrini ke kuso nari tso. (Isa. 42:8) Che cheni ná ndrŭ djo ko chungʉe bbʉbbʉlo ná saa na, føri lingʉeri nzɨ ko di riddi nari kʉ, ji ko ji ná che cheni ná ndrŭ nzani nza. (Muh. 9:10) Ndirigoti Mungu si dz’ ngʉ paradiso nari djo ko chungʉe lo ná saa na, ko bbangʉe ko nanga ri ngʉ d’o kodhó gosi ná saa djo nari tso. Ko ungʉeri u nari kʉ, ko nzá ka ko di cho 70 inga 80 dhé ri, ro cho ró nŭnŭ.​—Zb. 37:29; 90:10.

2. Petro ya pili 1:12, 13 ká ridho ngbaribbai nari kʉ, dhidhi kiroho nǎ ná Wakristo ma ka ndima ba faida ddi Biblia nǎ bbobbo mafundisho nǎ ro?

² Ri nzá ngani ko vi Biblia nǎ bbobbo mafundisho nga ri. Mutume Petro ndingʉe ndidhó ya pili barua “kpri ngʉ tøni bbʉbbʉlo kana” ná Wakristo dho. (Azø 2 Petro 1:12, 13.) Ro, fø saa na kpa ngʉ hwini kiroho nǎ kpakpalo na kutaniko nǎ, fø lo kana ngʉe: kali dhi mafundisho ma, che kʉ ná lo ngʉ nji ná ndrŭ ma na. (2 Pe. 2:1-3) Petro jingʉeri ndi li ndi djoi ma, ndi vei ma na kpakpa ndiro kpa sisi fø lo djolu d’e. Føri dho, ke nongʉe anziro kpa chungʉe ná nja lo nga ro kpa dho. Fø lo ka ndi koe kpa tsotso ndiro kpa tøni chi Yova dho kpø mwisho djo d’e.

3. Ká addudho ringani Wakristo krʉ ra anzi bbo ndima ngaddi Biblia nǎ bbobbo mafundisho djo nari na? Abbʉ loroji

³ Njati rié b’lo ko njinjí Yova dho cho bí kana ma ró, ko ka ko ba wø somo ngbà dhé Biblia nǎ bbobbo mafundisho nǎ ro. Loroji na, bblo chu nyo ridha ná le ma, go nyo ridha nga chu ná le ma na krʉ ka ndima njínjí nyo na le adi li ná ddikpa ritsi na dhé nyo ndima ri ná saa na. Ro, bblo chu nyo ridha ná le ri nyo bí cha b’lo nari dho, le chu ngbaribbai ma le ka le njínjí nyo na le adi li ná fø ritsi na njonjo kʉ ná chu nǎ ndiro nyo ó dju d’e nari bblo. Føri bbai, bí cha njinjí Yova dho ná ndrŭ ka ndima ba njonjo somo bblo ndima chue ná maandiko nǎ ro wø nga Biblia ndima jifunza nari tso ná ndrŭ djolu. Batiso ko bangʉe nari goti, njaro kodhó lo ma, Yova nzá njí kana ko adi nji ná njí ma na thika wøngʉeni wø. Anziro ko chungʉe Biblia nǎ ro ná mafundisho djo ko di ngaddi ná saa na, ko adi ngbaribbai ma ko ka ko njínjí ri na njʉ ko da lu ná lo kana nari nja. Akonja ngbaribbai ma dhidhi kiroho nǎ ná Wakristo ka ndima ba somo Biblia nǎ 3 kʉ ná bbobbo mafundisho nǎ ro nari di.

YOVA KɄ NGANO NÁ KE

4. Ko chu Yova kʉ ritsi no ná ke nari ká løngʉe ko ronga ngbaribbai?

⁴ “Krʉ ritsi chi ná ke kʉ Mungu.” (Ebr. 3:4) Ko churi chu nari kʉ, ko di djó ná i dz’ ma, ri djó shi di ná ritsi ma na krʉ no nari kʉ bbo dhó nyod’yu kʉ ndirigoti bbo dhó kpakpanga kʉ ná Ke. Ko Yova nongʉe nari dho, ke churie ko bblo pli. Føri djolu pli, ke adi kodhó lo tso gbagba. Ke churie bblo pli kʉ ko dho ná lo chu. Ko chu Yova kʉ ritsi no ná ke, ná føri wøngʉe kodhó maisha thika bí kʉ ná chu nǎ ndirigoti ri bbʉngʉe ngab’odha ko dho.

5. Ri ká kʉ ngbá bbʉbbʉlo i ka ndi liri ko é nyenyenga na ri? (Isaya 45:9-12)

⁵ Yova kʉ ritsi no ná ke nari ko chu nari ka ndi liri ko é nyenyenga na. B’lo Yobu lingʉe ndi thí ndi djo ndirigoti nja ndrŭ djo nari goti, Yova nongʉe nga ke dho nari kʉ, ndi kʉ krʉ ritsi na ka ná ke ndirigoti nono ritsi ná ke. (Yob. 38:1-4) Føri kongʉe Yobu tsotso ke njari nari kʉ, Yova adi bblo kʉ ná lo dhé nji krʉ ddo ró. “Luti, nabi Isaya ndingʉeri, ri nzá ngani ndrŭ di riddi nari kʉ, ndima kʉ nyod’yu na pli ndima no ná ke djolu ri.”​—Azø Isaya 45:9-12.

6. Bbo pli ká ringani ko ddinga ko no ná ke dhó nyod’yu ma, kpakpanga ma na djo ngbá saa na? (Anja ji maddi.)

⁶ Njati rié b’lo ddikpa ke njirie njí Yova dho cho bí kana ri ró, njaro ke ka ndi ngá bbo ndi ndi thí li ndidhó ngaddidha djo nari tso; Yova ma, Kedzá lo ma na djo ndi lie ndi thí ndiro ndi ba chutsoddadha d’e nari rɨngana. (Yob. 37:23, 24) Ro, njati ke di ngaddi ndi no ná ke dhó nyod’yu ma, kedhó kpakpanga ma na djo ró ká ri ka ndi é ngbǎ? (Isa. 40:22; 55:8, 9) Fø bbobbo bbʉbbʉlo si ke tsotso ko ke ra riutso d’i nari kʉ, Yova dhó ngaddidha kʉ bbo pli ndidhó ri djolu ndirigoti ri si rili ke é nyenyenga na.

7. Rahela ká njingʉe ngbá lo ndiro ndi gba ndi tso tengenezo bbʉ ná chutsoddadha na d’e?

⁷ Yova kʉ ritsi no ná ke nari djo Slovénie nǎ Rahela ró dho kʉ ná le ddingʉe nga nari kongʉe le tsotso le gba ndi tso tengenezo bbʉ ná chutsoddadha na. Le pori: “Nja saa na, nga rie sʉsʉ ma gba ma tso chutso ddá ná kpa vʉ nanga ná lo na ri. Loroji na, 2023 nǎ Lo dho chutso ddá ná Baraza dhó rapor ya #8 nǎ, ma njangʉe ddikpa le-djo hotuba bbʉ ndi tsokaka na nari ná saa na, ma nanga kengʉeni bbo. Føri dho, ma nzingʉeri Yova kó ma tsotso ndiro ma gba ma tso fø lo thika wøni nari na d’e.” Rahela rangʉe riutso d’i nari kʉ, Yova kʉ ra ma, dz’ ma na no ná ke nari dho, ke dho ri kaka ndi ddá chutso ndidhó tengenezo dho bblo kʉ ná chu nǎ. Njati ni ra riba ni dho ri kʉ kpakpa ni gba ni tso tengenezo bbʉ ná chutsoddadha na ró, aba saa ni ddinga bbo ngbá ngatsi ma ni no ná ke kʉ nyod’yu na ndirigoti kpakpanga na nari djo.​—Ro. 11:33-36.

ADDUDHO MA MUNGU BBANGA NZADHA DHO NARI

8. Addudho ma Mungu bbanga nzadha dho nari ko chu nari ká adi faida bbʉ ko dho ngbaribbai?

⁸ Mungu ká bbanga nzadha dho addudho? Nzɨ dho fø logoti adi ngʉni ná ndrŭ nanga adi kani ka Mungu djo inga kpa adi riddi nari kʉ, ke ro nga kʉ ri! (Mez. 19:3) Føri ró ro njonjo, ni chungʉeri nari kʉ, chenga ma, nzá ndrŭ kaka nari ma na i adi rili ndrŭ nzani nza, ro nga Yova ri. Føri kina, ni chungʉeri nari kʉ, Yova e na ndrŭ djo ná ngatsovedha lingʉeri bí kʉ ná ndrŭ chu ke ndirigoti ndrŭ chu ngbaribbai ma ke si nzadha tso d’ø theinga dho nari. (2 Pe. 3:9, 15) Addudho ma Mungu bbanga nzadha dho nari ni chu nari liri ni iso pɨni pɨ ndirigoti ri liri ni ndrini chøchø ke kuso.

9. Bbo pli ká ringani ko ddinga addudho ma Yova bbari ndrŭ nzani nari djo ngbá saa na?

⁹ Yova si nzadha tso d’ø nari ko b’o nari kana, kodhó lo uri ko é ngatsovedha na. Ro, ji ko ji ná le dhe ná saa na inga ko ma, kodhó familia ma na di da kpakpalo lu inga nga kʉ chø ná lo di njini ko ró ná saa na, ko nanga ka ndi kani ka ndirigoti ko ka ko di riddi nari kʉ, Yova nzɨ lo thika thɨ lele ri. (Hab. 1:2, 3) Fø ko di ko mbu ná saa na, ri kʉ bblo ko ddinga addudho ma Yova bbanga nzadha dho nari djo.a (Zb. 34:19) Føri kina, ko ka ko ddinga ke tsoni ndi si nzadha tso d’ø theinga dho nari djo.

10. Anne iso ká addu pɨngʉe ndidzá mama dhengʉe nari goti?

¹⁰ Nzadha djo ko chu ná bbʉbbʉlo ka ndi kó ko tsotso ko ve ngatso. Océan Indien nǎ dda d’e ronga tso ná ngø, Mayotte nǎ di ná le-ve Anne pori nari kʉ: “Madzá mama dhengʉe nari goti, ma mbungʉe ma che bbo. Nì mai ri kʉ fø ro, bí ina ma ngʉ adi ngano nari kʉ, nzadha nzɨ adi si Yova dhó ro ri. Ke jirieri ndi si nzadha tso d’ø krʉ ndirigoti ndi gá kodhi ji ko ji ná che cheni ná ndrŭ ga. Fø bbʉbbʉlo djo ma ngaddi bbo nari adi ngoi bbʉ ma dho bbo pli.”

11. Yova bbanga nzadha dho nari ko chu nari ká adi ko tsotso kó ngbaribbai ko ra anzi lod’radha dhi njí na?

¹¹ Addudho ma Mungu bbanga nzadha dho nari ko chu nari adi ko ronga cho ko ra anzi lod’radha dhi njí na. B’lo ndi d’rari Yova e ngatsovedha na, nari dho ke jirieri ndrŭ krʉ leni ndima dhó chenga nǎ ro ndiro ndima ba gødha d’e nari goti, Petro ndingʉeri ɨ: “Aninja ngbǎ di ná ndrŭ ma ni kʉ tsetse ná nyi kana ndirigoti Mungu na le chini nari kana nari.” (2 Pe. 3:11) “Mungu na le chini nari” kana kʉ kodhó lod’radha dhi njí maddi. Kodhi Baba bbai, ko ma jirie ndrŭ ddi. Ko jirieri kpa si di Mungu dhó chølo si njini nǎ ná wø dz’ djó. Ngatsovedha na, Yova ribba nidhó eneo nǎ ndrŭ ba chu ndiro ndima bbʉ madha ndi dho d’e. Ri kʉ bbò pendeleo ni njínji Mungu na ddinga ndirigoti ni bí kʉ ná ndrŭ tsotso kó ngbà ka ná ngatsi ndiro ndima chu lo ke djo mwisho si nari njí nari dho!​—1 Ko. 3:9.

KO DI “NGASINI NÁ SAA NA”

12. Ko di “ngasini ná saa na” nari djo ko chungʉe lo nari nǎ ro ká ko bangʉe faida ngbaribbai?

¹² Biblia d’rangʉe ngbaribbai ma ndrŭ dhó nyi ka ndi sie di “ngasini ná saa na” nari. (2 Ti. 3:1-5) Føri dho, ngbaribbai ma ndrŭ adi njini ko kuso lu nari adi ridho pʉlʉpʉlʉ nari kʉ, Biblia d’rangʉe ná lo njini nji. Ko ngbaribbai ma ndrŭ dhó nyi ra anzi che bbo pli ndi sani ro nari nja, ná føri adi rili ko uri u nari kʉ, Mungu dzá lo djo le ka le li le thí ngbà.​—2 Ti. 3:13-15.

13. Luka 12:15-21 nǎ Yesu bbʉngʉe ná loroji ridho nari bbai, ko dho ká ringani ko di ngbá lo dhu ko tso?

¹³ Føri kina, ko chu ko di ngasini ná saa na nari adi ko tsotso kó ko li ko thí bbo na mana e ná lo djo. Akotilo Luka 12:15-21 (azø) nǎ Yesu bbʉngʉe ná loroji nǎ ro ko ka ko ba ná bbo na mana kʉ ná somo djo di. Ká addudho Yesu nzingʉe mali dhi ke “rrchu” ná ke? Ri nga ngʉe ke ngʉe mali na bbo nari dho ri, ro ke nzá lingʉe ndi thí bbo na mana kʉ ná lo djo ri nari dho. Ke njungʉe “mali tso ndi nganga dho, ro Mungu nyǒ njí nga ke [ngʉe] mali ri.” Fø lo na mana ká ngʉe bbo addudho? Mungu pongʉeri ke ni: “I kuna nganga ni si dhedhe.” Njʉ ká fø lo ka ndi kó ko tsotso ngbaribbai? Ndiro mwisho si d’e nzá ddo ma bí ri, føri dho, ri kʉ bbo na mana kʉ ná lo ko di ridhu ɨ ko tso: ‘Ma adi ma thí li djo nari ká e bbo na mana kʉ ná lo i nì? Ma ká adi madzá nzø tsotso kó ndiro kpa li ngbá muradi ndima nji d’e? Ma ká adi njínji madhó kpakpanga ma, madhó saa ma, madhó kimwili nǎ ritsi ma na na ndiro ma nju mali tso ma dho inga ma nju mali tso ra na d’e?’

14. Miki dhó lo ká ko tsotso kó ngbaribbai ndiro ko nja addudho ma ri kʉ bbo na mana kʉ ná lo ko nonga nari kʉ ko di ngasini ná saa na?

¹⁴ Ko di ngasini ná saa na nari djo ko di ngaddi bbo ró, føri ka ndi kó ko tsotso ko chu ngbaribbai ma ko ka ko di lonanga vʉ nari. Føri kʉ Miki ró dho kʉ ná le-ve tsotso kongʉe ná lo. Le pori: “Darasa tso ma d’yangʉe ná saa na, ma jingʉeri ma ba zǎ djo ka ndi lieri ma chu lo bbo ná njí. Ro, føri kina, ma jingʉeri ma é painia wa kawaida ndirigoti ma ra nga tsotso ko bbo nǎ wahubiri dhó uhitaji kʉ ná ngana. Dhidhi kiroho nǎ ná bbakau kongʉe ma tsotso ma ddinga ma ji ma njí kimwili nǎ ná fø njí ká ka ndi liri ma tso si madhó kiroho nǎ muradi djo ngbà nari djo bbo. Kpa nongʉe nga ma dho nari kʉ, i dz’ si sadha ba ná ddo gʉ ma sese. Føri kina, kpa nongʉe nga ma dho nari kʉ, wø dz’ djó ma si lochu bí kʉ ná zǎ djo ndirigoti theinga dho. Føri dho, bbo ka ndi dzie madhó saa ná njí ma njie nari rɨngana, ma vʉngʉe ma tsotso ka ndi kó ná lo. Føri lingʉeri ma ba painia wa kawaida ma ngʉ nji nari kana ka ndi koe ma tsotso ná njí ndirigoti ma tsingʉe bbo nǎ wahubiri dhó uhitaji kʉ ná ngana, Équateur na.” Njʉ, Miki ma, ndibbá ke ma na muzunguko dhi njínji fø ngø nǎ.

15. Abbʉ ndrŭ ka ndima u bbʉbbʉlo ngbà dhé nari dhǒ ná loroji. (Anja ji maddi.)

¹⁵ Ri nzá ngani ko thí di bʉni bbo njati rié nzɨ ma ndrŭ nanga jini hwè lo-i dho ró. Ndrŭ ka ndima wø ndima dhó lo thika wø maddi. Akotilo Yesu dhi djona, Yakobo dhó loroji djo di. Ke njangʉe ngbaribbai ma Yesu dhi nari, Masiya ke ngʉ nari ndirigoti ke rrngʉe ngbaribbai ma Yesu ngʉ longaddi bblo pli nari maddi. Nì mai ri kʉ fø ro, Yakobo nzá dhé ngʉngʉe Yesu unake ri. Ro, Yesu gangʉe nari goti, Yakobo ngʉngʉe Yesu una klø na lod’radha dhi njínji ná ke!b (Yoh. 7:5; Gal. 2:9) Føri dho, ri kʉ bbo na mana kʉ ná lo nzɨ ni d’i ji nidhó familia nǎ nzá nanga d’e jini bbʉbbʉlo dho ná ndrŭ ma, anziro gʉngʉe Pidhinga dzá imba ndima rr nari ná ndrŭ ma na ró ro. Anonga nari kʉ, ko di ngasini ná saa na, føri dho, kodhó lod’radha dhi njí kʉ lele ringani ko njí ná njí. Kpadjo ni po kpa dho ná lo ka ndi si kpa ronga lø luti, njaro bbò mbudha tso si ngani nari goti.c

ADI MBAI PO YOVA DHÓ LONGANODHA DHO

16. Yova dhó longanodha nǎ ro ká ni adi faida ba ngbaribbai? (Anja kisanduku “Ako nja ndrŭ tsotso ri na” maddi.)

¹⁶ Ko adi ba kiroho nǎ ná nja nyo le thɨrie nzá d’erie Biblia nǎ bbobbo bbʉbbʉlo chu ná ndrŭ dho. Loroji na, yenga dyi le adi bbʉ krʉ ndrŭ dho ná hotuba ma, jw.org djó e ná nja lo ma, video ma, ndrŭ krʉ dho le adi bbʉ ná vichapo ma na le adi thɨ nga kʉ Yova dzá Dimu ná ndrŭ dho i vi. Nì mai ri kʉ fø ro, ko maddi adi bblonga ba fø longanodha nǎ ro. Ri adi rili ko ji Yova bbo pli, ri adi kodhó udha li kpakpa ke dzá lo djo ndirigoti ri adi ko tsotso kó ndiro ko é bblo chu Biblia nǎ bbʉbbʉlo ngaddidha ná ndrŭ.​—Zb. 19:7.

17. Ri ká kʉ ngbá lo kana ni ka ni ddinga Biblia nǎ bbobbo mafundisho djo ri?

¹⁷ Ko njaeri nari bbai, Biblia nǎ bbobbo bbʉbbʉlo ka ndi kó ko tsotso njʉ maddi. Ko di riddi nari kʉ, kodhó ngaddidha ma, ngbaribbai ma ko adi lo nji ná chu kʉ bblo pli nari djo ko ba tengenezo dhó chutsoddadha ró, nyenyenga na ko adi ringano nari kʉ, Yova kʉ nyod’yu ma, kpakpanga ma na na kʉ ná nono ritsi ná ke, ke ddiro dhé ka ndi ddá chutso tengenezo dho. Ko ma, kodhi ji ko ji ná ndrŭ ma na di da kpakpalo lu ná saa na, ko ka ko é ngatsovedha na ndirigoti ko ka ko ddinga addudho ma Yova bbanga nzadha dho nari djo. Ndirigoti ko lonanga vʉ ngbaribbai ma ko ka ko njínjí kodhó saa ma, kodhó kimwili nǎ ritsi ma na djo ná saa na, ringani ko nonga nari kʉ, ko di ngasini ná saa na ndirigoti mwisho si nari dho nzá ddo ma bí ri. Nde, akobbari Yova dhó longanodha ra anzi ko ndi li kpakpa nari na, ko ronga ndi cho nari na ndirigoti nyod’yu ndi bbʉ ko dho nari na.