Hulda tso singʉe si ndidhó muradi djo

NJATI ni sie Indonesie nǎ dda kana kʉ ná Sangir Besar dhi ddikpa bbagʉ b’lo dae ná cho kana ró, ni ka ni njue fø bbagʉ di ná gbo kʉ ná ko vei na. Fø ndrŭ chungʉeni bbo fø bba ndima dhó lod’radha dhi njí djotsina ndirigoti ndrŭ tsotso ndima kó ndrŭ famu Biblia d’e nari djotsina. Ro, iga ko loti ddikpa d’i njí ndrŭ njingʉe nari djo.

Ya kwanza, ndrŭ ngʉ adi bbi dda lú ndirigoti ndima sø li o ná dju ndima si na dda tso ro. Nja dju ngʉe chøchø dja tsi. Føri goti, fø isɨ ndrŭ ngʉ adi di dzonø djo ndirigoti ndrŭ ngʉ adi fø dju nanga dhɨ marto na ri ngʉ nini pli øbbi tsena. Ndrŭ ngʉ adi ri li plastike dhi no na ndirigoti ndrŭ ngʉ adi ra ri na eskalie djó kpø ndima bba. Føri goti, ndrǔ ngʉ adi rili ngbà le ka le d’u motokari na ná bbobbo saki na ndirigoti kpa ngʉ adi ra chu thɨ ri na.

Fø le vei kana ddikpa ri ngʉe Hulda. Ledhó hali lingʉeri le dho saa é bbo fø njí njidha dho nja ndrŭ djolu. Bí ina, le ba ná mbø krʉ ró le ngʉ adi ndidhó familia dhó lo u ná ritsi dzi. Ro, føri kina le jingʉeri ndi b’o mbø ronga nja d’i ritsi dho maddi. Le jingʉeri ndi dzi telefone (tablette) ndiri na ndi di tsu JW Library^® djo d’e. Hulda chungʉeri nari kʉ JW library djó kʉ ná video ma, nja ritsi ma na ka ndi thɨe lo ndi d’ra ná chu thika thɨ ndirigoti ri ka ndi lieri ndi famu Biblia bblo.

Hulda ngʉ adi njínji saa aro krʉ ddo ró bbʉtso, ná føri le njingʉe bi ddikpa na nusu kana, ná fø ddo kana le thangʉe dju motokari ddikpa ka ndi si ná ngatsi. Le vengʉera telefone dzidha dhi mbø ba té.

Hulda pongʉeri “Nì mai ma ngʉ adi njeni nje ndirigoti ma ronga ngʉ adi ndindi dju nanga dhɨdha dho ro, ø fø telefone di ma tsotso kó ma d’ralo bblo ndirigoti ma tayarisha njudha ná saa djo, ma ronga ngʉ adi ndí nari ma krʉ nga adi vivi ma ró.” Føri kina le pori telefone kongʉe ndi tsotso bbo coronavirus tso ngangʉeni ná saa na, dhonalo njudha ma, lo ma na krʉ le ngʉ d’ra telefone chulu. Ko kʉ hwè na ddinga Hulda ma na, le tso singʉe si ndidhó muradi djo nari dho.