Ab’o ddi le tso gbani kutaniko nǎ nari ronga

Ko é ko lai Wakristo kana ná saa na, ko adi ko mbu Pi Daudi mbungʉe ndi nari bbai, ɨ ndi pongʉeri ro: “Ri kʉ bblo ndirigoti ri thonga tho le-djoi di ddinga ddi ndima tso gbani ro!” (Zaburi 133:1) Ddi le tso gbani nari nzá ka ndi njini ndi ro ri. Ro ko krʉ dho ringani ko njí kpakpanga nja ko tso gbani ddi d’e.

1. Mungu dzá ndrŭ kana bbo adi njani nari ká kʉ ngbá lo?

Njati ni njí mukusanyiko d’i ngø nǎ ró, njaro ni nzá ka ni famu fø ngø nǎ luga ro ri, ro ni ka ni mbu ni familia kana kʉ nari bbai nganga. Ká addudho? Dhonalo dz’ djolu gble ko adi Biblia jifunza chulu nari nga e njonjo kʉ ná vichapo ri. Ndirigoti ko adi kpakpanga nji nja ko dho jidha ko kana d’e. Rie ngbaga ma ko di ri ró, ko krʉ adi “nzini Yova ró dho na, ndiro ko bbʉ madha ke dho ddi ko tso gbani ro d’e.”​—Sefania 3:9, maelezo ya chini.

2. Ni ká ka ni njí addu ndiro ddi le tso gbani nari rá anzi d’e?

“Anijini ni kana ni thí nǎ ro krʉ.” (1 Petro 1:22) I shauri na ká ni ka ni njinjí ngbaribbai? Nzɨ di ni thí li ndrŭ dhó nga kʉ bblo ná sifa djo, ro adi ni thí li kpadhó bblo kʉ ná sifa djo. Bí ina nzɨ di saa ba ni di bblo ni churie ná ndrŭ na dhé, ro adi saa ro ba ni di njonjo dhó desturi kʉ ná le-djoi ma, le-vei na ma ddi. Ringani ko njí kpakpanga bbo ndiro ko pʉ ndrŭ nanga le krø nari ko ró ro d’e.​—Azø 1 Petro 2:17.a

3. Ni ká ka ni njiri ngbǎ njati rie nzɨ ni rrni ni kana ni lai Mukristo na ró?

Ngbà mai ko tso gbani ddi ro, ko kʉ nzá kaka ná ndrŭ. Nja saa na ko ka ko njí njedha ka ndi bbʉ ko lai ndrŭ thí dho ná lo maddi. Ro Mungu dzá lo ripo ko dho: “Anidi . . . ni zø njinji ni kana,” ripo ri ki: “Ddiddi Yova maddi njingʉe ni zø ndi nǎ ji na nari bbai, nidho maddi ringani ni njí ri fø.” (Azø Wakolosai 3:13.) Ko adi tani bí ina Yova dho, ro ke adi ko zø njinji dhé. Føri dho, ke rinzi ko tsó ko njí ko djoi zø njí. Njati ni rá ri utso d’i nari kʉ ni nji chelo ni lai ke ró ró, anjiri ni thɨ fø lo thika thɨ.​—Azø Matayo 5:23, 24.b

ANE LONANGA BBO

4. Abba ndrŭ nanga ni krø nari tso

Ko adi riji ko dho jidha ko djoi krʉ dho. Ro ringani ko njí kpakpanga nja ko gba ko tso njonjo kʉ ko ró ro ná ndrŭ ma na d’e. Nde addui ká ka ndi kó ko tsotso? Azø Matendo 10:34, 35, ndirigoti anitilo i ngadhudha djo:

• Yova u krʉ kʉ ná ndrŭ tso nja ndima é ndidzá Dimu d’e. Njonjo kʉ ni ró ro ná ndrŭ na ni ni tso gba nari na ká ni ridho ni Yova dyø ngbaribbai?

• Ni di ná ngana ká ndrŭ adi ndima nanga krø ngbá chu nǎ?

Azø 2 Wakorinto 6:11-13, ndirigoti anitilo i ngadhudha djo:

• Ni ká ka ni njiri ngbǎ nja ni ji krʉ kʉ ná le-djoi ma, le-vei ma na d’e?

5. Adi tayari ndrŭ zø njidha dho ndirigoti anji ngoi

Yova e tayari ko zø njidha dho nzá mai kedhó lo uri ko njí ndi zø ro. Azø Zaburi 86:5, ndirigoti anitilo i ngadhudha djo:

• Yova ká adi ko zø nji bbo ngbaribbai?

• Yova e tayari ndrŭ zø njidha dho nari ká tho ni nyǒ addudho?

• Nzá ka ndi liri ko rrni nja ndrŭ na nari ká kʉ ngbá lo?

Ko ká ka ko dyø Yova ngbaribbai ndirigoti ko di ddi ko tso gbani ko djoi ma, ko vei ma na ro? Azø Mezali 19:11, ndirigoti anitilo i ngadhudha djo:

• Njati ddikpa le njí ná lo kani ka ni lú ró ká ni ka ni njí addu nja ni thɨ fø lo thika d’e?

Nja saa na ko adi che kʉ ná lo nji nja ndrŭ ró. Nde fø ko njiri ró ká ringani ko njí addu? Aninja VIDEO, ndirigoti anitilo i ngadhudha djo.

VIDEO: Ngoi le nji nari adi ledha bbʉ (6:01)

• Video nǎ ni njari nari bbai, le-ve ká njie addu nja ndi njí ngoi d’e?

6. Adi ni thí li ni djoi ma, ni vei ma na dhó bblo sifa djo

Bblo ko di ko djoi ma, ko vei ma na chu ná saa na, ko ka ko chu kpadhó bblo kʉ ná sifa ndirigoti kpadhó uzaifu. Kpadhó bblo kʉ ná sifa djo ká ko ka ko li ko thí ngbaribbai? Aninja VIDEO, ndirigoti anitilo i ngadhudha djo.

VIDEO: Aliri nidhó bblo kʉ ná sifa dhidhi! (5:10)

• Addui ká ka ndi kó ko tsotso ko nja ko djoi ma, ko vei ma na dhó bblo kʉ ná sifa?

Bbo Yova adi nja nari kʉ kodhó bblo kʉ ná sifa. Azø 2 Mambo ya Nyakati 16:9a, ndirigoti anitilo i ngadhudha djo:

• Ni ká ni mbu ngbaribbai ni churi Yova adi nidhó bblo kʉ ná sifa nja nari dho?

LO DZÁ DɄNGA

Ni ka ni b’o kutaniko nǎ le tso gbani ddi nari ronga ndrŭ zø ni nji ndirigoti jidha ni dho krʉ kʉ ná ni djoi ma, ni vei ma na dho nari chulu.

Lo djolu le ngʉ nari

• Ni ká ka ni bbá ndrŭ nanga ni krø nari tso ngbaribbai?

• Ni ká ka ni njiri ngbǎ njati rie nzɨ ni rrni ni kana ni lai Mukristo na ró?

• Ká addudho ni jiri ni dyø Yova dhó loroji nja ndrŭ zø ni nji nari na?

NI KA NI CHU NÁ NJA LO

Aneri ni chu ngbaribbai ma Yesu bbʉngʉe ná loroji ka ndi kó ko tsotso nari ndiro nzɨ ko di lod’i nja ndrŭ djo ró.

Atu ni nyǒ nǎ tsú (6:56)

Ri ká kʉ lazima ko kó zø njati ko di riddi ko nzá nji kosa ro ri ró?

“Kuomba Musamaha Kunakusaidia Kufanya Amani” (Munara wa Mulinzi, 1 Mwezi wa 11, 2002)

Anja ngbaribbai ma aro kʉ ná kpetsi kpa jifunza ddi le tso gbani nari ngbà mai ndima dhie bbo le ndrŭ na nga krø ná bbagʉ ro.

Johny ma, Gideon ma na ndrongʉeni bbo ndima kana: ro njʉ kpa kʉ le-djoi (6:42)

Aneri ni chu ngbaribbai ma ni ka ni si nzɨ ni rrni dho ná lo ni kana ro ni lai Mukristo na nzá ri d’e kutaniko nǎ ngoi sa ro nari.

“Namna ya Kumaliza Kukosana Katika Roho ya Upendo” (Munara wa Mulinzi, Mwezi wa 5, 2016)