Yehova Mbwaakashitilisha Yesu

Kwicwe kwa cishi ca Isilaeli kwakalinga bantu bakalinga kushoma ayi nyenyeenshi inga sha batanjilila. Bushiku bumwi mashiku, basankwa bamwi ba Kwicwe bakabona cakalinga kunyaka anga ni nyenyeenshi yakalinga kweenda mwiculu, lyalo bakaikonkela. “Nyenyeenshi” iyo yakabatanjilila ku Jelusalemu. Basankwa aba bakatalika kwiipusha bantu ayi: ‘Uli kuli mwaana uyo weshi akabe mwaami wa baJuda? Twesa mukumulambila.’

Elodi mwaami waku Jelusalemu ndyaakanyumfwa sha mwaami mupya, wakalisukama abuumbi. Wakeepusha bamatanjilili ba bapailishi ayi: ‘Ino nkuli mwaana uyo weshi akabe mwaami waba Juda nkweshi akashalilwe?’ Bakamulwiita ayi: ‘Bashinshimi bakaamba ayi alaakushalilwa ku Betileemu.’ Aboobo Elodi wakeeta basankwa ba Kwicwe akubalwiita ayi: ‘Amuye ku Betileemu mukamulangoole mwaana uyu. Lyalo mukese mukundwiita. Anebo nkayeeko mukumulambila.’ Sombi uku kwakalinga kubeca.

“Nyenyeenshi” yakatalika kweenda alimwi. Basankwa abo bakaikonkela ku Betileemu. Yakaya mukwiimikana peculu lya ŋanda, lyalo basankwa abo bakenjila muŋanda. Bakacana Yesu kaali abanyina ba Maliya. Bakafukama akulambila mwaana akumupa shipo sha golodi, tununkila kabotu amafuta eetwa ayi mule. Sa ncakwiila Yehova ngowakatuma basankwa aba kuya mukulangoola Yesu? Sobwe.

Mashiku, Yehova wakalwiita Josefu muciloto ayi: ‘Elodi alisuni kucaya Yesu. Amulobokele ku Ijipiti amukaako amwaana. Mukekaale kushikila nkamwaambile ayi musweeko.’ Josefu amukwashi bakaya ku Ijipiti peenka apo.

Yehova wakalwiita basankwa ba Kwicwe ayi batabooleli kuli Elodi. Elodi ndyaakashiba ayi basankwa aba tabakwe kuboolela, wakakalala. Mukwiinga wakaalilwa kucana Yesu, Elodi wakapa mulawo ayi baana basankwa bakalinga ciimo cakwe Yesu bacaikwe mu Betileemu. Sombi Yesu wakashitilishikwa mukwiinga wakalinga ku Ijipiti kulaale abuumbi.

Mukuya kwaciindi, Elodi wakafwa. Yehova wakalwiita Josefu ayi: ‘Inga waboolela ano.’ Josefu, Maliya, a Yesu bakaboolela ku Isilaeli, akuya mukukala ku Nasaleti.