Yesu Ndyaakalinga Mwanike

Josefu a Maliya bakalinga ku Nasaleti a Yesu abana babo bamwi. Josefu wakalinga kucafwa mukwashi wakwe kwiinda mukusebensa mbuli kaapenta. Wakabeeisha pali Yehova a Milawo yakwe. Lyoonse bakalinga kuya ku sunagogi mukulambila mbuli mukwashi. Alimwi mwaaka amwaaka bakalinga kuya ku Jelusalemu kukusekelela kwa Kusotokela.

Yesu ndyaakalinga kucite myaaka 12, mukwashi wakwe bakaya ku Jelusalemu bweenka mbuli lyoonse. Ndyebakashika, Jelusalemu yakalinga kuswite abantu bakesa kukusekelela kwa Kusotokela. Pesule lya kusekelela uku, Josefu a Maliya bakaboolelaamo, kabayeeya ayi Yesu ali pomwi ambabo. Sombi ndyebakatalika kumulangoola pakati ka beshikamukowa, tabakwe kumucana.

Bakaboolela ku Jelusalemu akumulangoola kwa nshiku shotatwe. Lyalo mukweelaako bakaya ku tempele. Bakamucana kashiite abeshikwiisha, kaakutika cakubikila maano akwiipusha miipusho. Beshikwiisha bakakondwa a Yesu nshaakalinga kwaamba cakwaamba ayi bakatalika kumwiipusha miipusho. Alimwi bakankamana ambwakalinga kukumbula. Bakabona kwaamba ayi Yesu wakalinga kwiishi kabotu Milawo yakwe Yehova.

Josefu a Maliya bakalisukama abuumbi. Aboobo Maliya wakaamba ayi: ‘Mwanaangu, twalema kukulangoola! Ino walinga kuli?’ Yesu wakabaambila ayi: ‘Sa temwalinga kwishi kwaamba ayi ndyeelete kuba muŋanda ya baTa?’

Yesu wakaya abashali bakwe kumishaabo ku Nasaleti. Josefu wakaiisha Yesu bwakusebensa ncito ya bukaapenta. Ino utoyeeya ayi Yesu wakalinga buyani ndyaakalinga wacanike? Ndyaakalinga kukula, Yesu wakaba abusongo abuumbi alimwi Lesa abantu bakalinga kumusuni.