Satana Mbwaakeelesha Yesu

Pesule lyakwaamba ayi Yesu wabombekwa, mushimu usalashi wakamutanjilila kuya muluyanga. Taakwe kulya cakulya cili coonse kwanshiku 40, aboobo wakafwa nsala abuumbi. Satana wakaya mukweelesha Yesu, akumwaambila ayi: ‘Na ncakwiila uli mwanaakwe Lesa, ambila mabwe aya abe cakulya.’ Sombi Yesu wakakumbula Satana kwiinda mukusebensesha malembo ayi: ‘Malembo alaamba ayi teshibo shakulya sheenka sheenga shapa kwaamba ayi muntu abe abuumi. Ulyeelete kunyumfwila shoonse Yehova nshaamba.’

Lyalo, Satana wakeelesha Yesu alimwi ayi: ‘Na ncakwiila uli mwanaakwe Lesa, sotoka kuswa peculu paciluli ca tempele. Malembo alaamba ayi Lesa alaakutuma banjelo ayi bakubaake.’ Sombi Yesu alimwi wakasebensesha malembo kumukumbula ayi: ‘Malembo alaamba ayi toeelete kweelesha Yehova.’

Kuswawaawo, Satana wakatondesha Yesu maami oonse apacishi, bubile abulemu bwangawo, akumwaambila ayi: ‘Ntookupa maami oonse aya, bubile abulemu bwangawo na unambile linkanda lyomwibo.’ Sombi Yesu wakakumbula ayi: ‘Swaawo apa Satana! Malembo alaamba ayi ulyeelete kulambila Yehova eenkabo.’

Lyalo Satana wakaswaawo, alimwi banjelo bakaletela Yesu shakulya. Kuswawaawo, Yesu wakatalika kushimikila makani abotu Abwaami. Iyo njencito Yehova njaakamutuma kusa mukusebensa pacishi. Bantu bakalinga kunyumfwa kabotu makani Yesu ngaakalinga kubeeisha, aboobo bakalinga kumukonkela kuli koonse nkweenga waya.