Yesu Mbwaakasalasha Tempele

Yesu wakaya ku Jelusalemu mu cilimo mumwaaka wa 30 C.E. Bantu baanji bakalinga besa ku Jelusalemu mukusekelela Bushiku Bwakusotokela. Ndyebakalinga kusekelela pabushiku ubu, bakalinga kubenga amilambu yashinyama pa tempele. Bamwi bakalinga kusa ashinyama shabo sha kubenga, lyalo bamwi bakalinga kuula shinyama mweenka mu Jelusalemu.

Yesu ndyaakaya ku tempele, wakabona bantu kaboolisha shinyama. Bakalinga kucita mabisinesi akupanga maali aanji muŋanda yakulambililaamo Yehova! Ino Yesu wakacita buyani? Wakoosa ciswepu ca ntambo cakubingishako mbelele aŋombe kuswa mu tempele. Wakapinoona matebo abeshikucinja maali, akupalanganya makoini abo panshi. Yesu wakalwiita bakalinga kuulisha nkulimba ayi: ‘Amushikusheemo ishi muno! Mutapangi ŋanda ya Bata, ayi ibe musena wakuulishilamo shintu!’

Bantu bakalinga mu tempele bakakankamana Yesu nshaakacita. Bashikwiiya bakwe bakeebaluka bushinshimi bwaamba pali Mesiya ayi: ‘Ndiisunishishi abuumbi ŋanda yakwe Yehova.’

Mumwaaka wa 33 C.E., Yesu alimwi wakasalasha tempele. Taakalinga kusuni bantu ayi banocita shintu, isho nshobateelete kucita paŋanda ya Baishi.