Pita Mbwaakakaka Yesu

Yesu ndyaakalinga abashikwiiya bakwe mucipinda capeculu wakabalwiita ayi: ‘Noonse mutoonshiya sunu mashiku.’ Pita wakaamba ayi: ‘Nebo teshi mushiyeewo! Nabi boonse bamushiye, nebo teshi mushiyeewo.’ Sombi Yesu wakalwiita Pita ayi: ‘Kombwe kaatana kulila, utonkaka mankanda otatwe ayi tonshiiwo.’

Masoja ndyebakatola Yesu ku ŋanda yakwe Kayafasi, batumwi bakwe baanji bakacica. Sombi bobilo bakalinga mulikoto lya bantu bakakonkela baabo bakatola Yesu. Mutumwi womwi wakalinga Pita. Wakaya mulubaansa lwa ŋanda yakwe Kayafasi akutalika kuyota mulilo. Mwanakashi umwi wacanike ndyaakabona Pita wakaamba ayi: ‘Ndakushiba! Awebo walinga pomwi a Yesu!’

Pita wakaamba ayi: ‘Sobwe, wambekeshabo! Nshicishiiwo nshotokwaamba!’ Aboobo wakaswaawo akuya kumwinjililo walubaansa. Tapana kwiinda aciindi musebenshi mwanakashi aumwi wakamubona, aboobo wakalwiita bantu ayi: ‘Musankwa uyu walinga a Yesu!’ Pita wakaamba ayi: ‘Nshimushiwo a Yesu uyo ngotokwaambawo!’ Musankwa umwi wakaamba ayi: ‘Ncakwiila webo uli wa mulikoto lyakwe Yesu mukwiinga ŋambilo yako itonyumfwika ayi uli waku Galili.’ Aboobo Pita wakatalika kulumbila ayi: ‘Uyu muntu nebo nshimushiwo!’

Peenkaapo kombwe wakalila. Pita wakacebukila kuli Yesu akumubona kaamulangilisha. Pita wakeebaluka maswi ngaakamulwiita Yesu, lyalo wakaswa pansengwe akutalika kulila abuumbi.

Bamukooti ya Sanihedilini bakaya kuŋanda yakwe Kayafasi, kwaamba ayi bakoomboloshe Yesu. Bakapangana kale ayi batoomucaya, bakalinga kusunibo kumucanina mulandu wakumucailaawo. Sombi tabakwe kumucana amulandu uli woonse. Mukweelaako, Kayafasi wakeepusha Yesu cakutamwiinda mweela ayi: ‘Sa uli Mwanaakwe Lesa?’ Yesu wakakumbula ayi: ‘Ee.’ Kayafasi wakaamba ayi: ‘Tatutoyandika bumboni abumwi. Uku nkucobola Lesa!’ Bamukooti bakapangana ayi: ‘Musankwa uyu alyeelete kucaikwa.’ Bakamuuma mapaka, kumushipila mate, kumufweka pameenso, akumuuma kabaamba ayi: ‘Na uli Mushinshimi, tulwiite ngani wakuuma!’

Ndyebwakaca, bakatola Yesu kukooti ya Sanihedilini akumwiipusha alimwi ayi: ‘Sa uli Mwanaakwe Lesa?’ Yesu wakakumbula ayi: ‘Mwebo mwaamba kale ayi ndimwanaakwe Lesa.’ Lyalo bakamupa mulandu wakucobola Lesa alimwi bakamutola kuli Pontyasi Pilato mweendeleshi wabene Loma. Ino nshiinshi shakakonkelaawo? Leka tubone.