Yesu Mbwaakafwa ku Gologota

Bamatanjilili ba bapailishi bakatola Yesu ku ŋanda ya mweendeleshi. Pilato wakabeepusha ayi: ‘Ino ngumulandu nshi ngwaacita musankwa uyu?’ Bakaamba ayi: ‘Atolyaamba ayi ngu mwaami!’ Pilato wakeepusha Yesu ayi: “Sa ndiwe mwaami wa baJuda?” Yesu wakakumbula ayi: ‘Bwaami bwangu teshi bwa mucishi ca panshi pano.’

Lyalo Pilato wakatola Yesu kuli Elodi, mweendeleshi wacishi ca Galili kwaamba ayi, aye abone na Yesu alicite mulandu. Elodi taakuwo mulandu ngwaakacanina Yesu, aboobo wakamuboosha alimwi kuli Pilato. Lyalo Pilato wakaambila bantu ayi: ‘Nebo a Elodi taakuwo mulandu ngotwacana mumuntu uyu. Aboobo ntomwaangulula.’ Likoto lya bantu lyakoolobesha ayi: ‘Amumucaaye! Amumucaaye!’ Masoja bakakwiipa Yesu a musako, bakamushipila mate, akumuuma. Bakamufwalika cisoti ca myuumfwa kabamuseka akwaamba ayi: “Waboneka O Mwaami wa baJuda.” Alimwi Pilato wakaambila likoto lya bantu ayi: ‘Taakuwo mulandu ngondacana mumuntu uyu.’ Sombi bakoolobesha ayi: ‘Aapopwe pacisamu!’ Aboobo Pilato wakabapa ayi baye bamucaaye.

Bakatola Yesu kumusena wiitwa ayi Gologota, akumupopa pacisamu lyalo akuciimika. Yesu wakapaila ayi: “Ta, amubalekelele mukwiinga tabeshi ncebatoocita.” Bantu bakatalika kumuseka Yesu kabaamba ayi: ‘Na uli Mwanaakwe Lesa, seluka pacisamu! Lipulushe we.’

Kapondo umwi wakalinga kupopetwe pafwiifwi a Yesu wakaamba ayi: ‘Amukanjibaluke mwaakwinjila mu Bwaami bwanu.’ Yesu wakamushomesha ayi: ‘Ulaakuba andime mu Paladaiso.’ Malumwi kwakaba munshinshe kwa mawoola otatwe. Bashikwiiya bamwi bakalinga kwiimfwi pafwiifwi acisamu, kwiilikaawo a Maliya banyina Yesu. Yesu wakalwiita Joni kunoolama Maliya anga mbanyina bakamushala.

Mukweelaako Yesu wakaamba ayi: ‘Shakumanishikwa!’ Wakakotamika mutwi akufwa. Paciindi ceenka ico, kwakaba citentanshi cinene abuumbi. Cisani cilemu cakalinga mu tempele ico cakalinga kupansaanya Musena Usalalite a Musena Usalalite Kwiindaawo cakakwaamuka pakati. Munene wa masoja wakaamba ayi: ‘Ncakwiila uyu walinga Mwanaakwe Lesa.’