Yesu Mbwaakabushikwa

Pesule lya kwaamba ayi Yesu wafwa, musankwa umwi mubile waliina lya Josefu wakasenga Pilato ayi abwese mubili wakwe Yesu ngobakalinga bapoopa pacisamu. Josefu wakapoombela mubili mucisani cibotu cituba akuunanika tununkila lyalo akuubika mucuumbwe cipya ico ncaakakaba mulibwe. Lyalo wakakunkulushilaawo libwe linene pamulyango wa cuumbwe. Bamatanjilili babupailishi bakalwiita Pilato ayi: ‘Tutoloonda ayi bashikwiiya bakwe Yesu inga bawiipa mubili, akwaamba ayi wabushikwa kuswa kubafu.’ Aboobo Pilato wakaamba ayi: ‘Amucaleeko kucuumbwe akubikaako beshikulindilila.’

Pabushiku bwatatu macuunsa cuunsa, banakashi bamwi bakaya ku cuumbwe akucana ayi libwe balikunkulushaawo pamulyango. Mucuumbwe mwakalinga munjelo wakalwiita banakashi abo ayi: ‘Mutaloondi, Yesu wabushikwa kuswa kubafu. Kamuya mukalwiite bashikwiiya bakwe ayi baye ku Galili nkweshi bamucaane.’

Maliya waku Magadala wakacica akuya mukulangoola Pita a Joni. Ndyaakabacana wakabalwiita ayi: ‘Twacaana mubili wakwe Yesu baubwesaamo mucuumbwe.’ Lyalo Pita a Joni bakacicila kucuumbwe. Ndibakacana ayi mubili wakwe Yesu taumo mucuumbwe, bakaboolela kuŋanda.

Maliya ndyaakabolela kucuumbwe wakabona baanjelo bobilo mucuumbwe akubaambila ayi: ‘Nshicishiiwo na Mwaami wangu bamutola kuli.’ Lyalo wakabona musankwa umwi. Kayeeya ayi ngushikulama muunda, wakamwaambila ayi: ‘Mwebo Ta, amundwiite nkomwamutola kwaamba ayi nkamubwese.’ Ano musankwa uyu ndyaakaamba ayi, “Maliya!” Maliya wakashiba ayi ngu Yesu. Lyalo wakoolobesha ayi: “Mufundishi!” akumucatilila. Yesu wakalwiita Maliya ayi: ‘Kooya ukalwite bamakwesu ayi wamboona.’ Peenkaapo Maliya wakacica akuya kuli bashikwiiya bakwe Yesu akubaambila ayi wamubona Yesu.

Pabushiku bweenka ubo bashikwiiya bamwi bakalinga kuyaceenda kuswa ku Jelusalemu kuya ku Emausi. Musankwa umwi wakasena pafwiifwi akutalika kweendela pomwi ambabo, lyalo musankwa uyo wakabeepusha nshobakalinga kubandikaawo. Bakamukumbula ayi: ‘Sa toocishiiwo shacitika? Nshiku shotatwe shaiinda, bamatanjilili ba bapailishi bakacaya Yesu. Ano, banakashi bamwi batokwaamba ayi ngumuumi!’ Musankwa uyo wakabeepusha ayi: ‘Sa tamushomi mubashinshimi? Bakaamba ayi Klistu alaakufwa akubushikwa kuswa kubafu.’ Lyalo wakatolelela kubasansulwita malembo. Ano ndibakashika ku Emausi bashikwiiya balya bakamusenga ayi akalaabo. Ndyebakalinga kulya cakulya ca macolesha wakapailila shinkwa, lyalo bakesa mukushiba ayi wakalinga Yesu. Lyalo wakashimingana.

Bashikwiiya bobilo cakufwambaana bakaya ku Jelusalemu, akunjila muŋanda batumwi mobakalinga babungana akubalwiita shakacitika. Ndibakalinga muŋanda, Yesu wakabonekela kuli mbabo boonse. Pakutaanguna, batumwi tabakwe kushoma ayi wakalinga Yesu. Aboobo wakabaambila ayi: ‘Amubone akucata maansaangu. Cililembetwe ayi Klistu alaakubushikwa kuswa kubafu.’