July

Yesu wakalinga kuyeeya akulinyumfwa mbuli Baishi mushintu shoonse nshaakalinga kwaamba akucita, kwiilikaawo andyaakalinga kucita shaankamiko. (Joni 14:9) Ino nshiinshi nsheenga tweeya kuswa ku shaankamiko Yesu nshaakacita? Yesu a Baishi balitusuni abuumbi. Yesu ndyaakalinga pacishi capanshi, wakatondesha mbwaakalinga kubasuni bantu kwiinda mukusebensesha nkusu nshaakapekwa shakucita shaankamiko, kucafwa baabo bakalinga kwiinda mumapensho. Paciindi cimwi, basankwa bobilo boofu bakasenga Yesu kwaamba ayi abacaafwe. (Mate. 20:​30-34) Amubone kwaamba ayi Yesu “wakabafwita nkumbu” lyalo akubashilika. Alimwi inkumbu nsheshakapa kwaamba ayi Yesu asanine bantu bakalinga kufwite nsala akushilika shimanata, kutondesha kwaamba ayi alisuni bantu. (Mate. 15:32; Maako 1:41) Inga twashoma cakutatoonsha kwaamba ayi Yehova Lesa “uswite nkumbu” alimwi a Mwanaakwe balitusuni abuumbi alimwi balalinyumfwa cibiibi na katupenga. (Luka 1:78; 1 Pit. 5:7) Balisunishishi abuumbi kumana mapensho oonse bantu ngobatokwiindaamo! w23.04 pe. 3 mape. 4-5

Tulyeelete kweelesha kucita nsheenga twacikonsha kuleya kubelenga akukutika kumakani atabete kabotu ayo ayuminishikwa mucishi cino citookweendeleshekwa a Satana. Kubelenga akwiiya Baibo inga kwatucafwa kunooyeeya pashintu shili kabotu. Kwiilikaawo, inga twashitilisha miyeeyo yesu kwiinda mukunocanika kumabungano akwaabanamo lubasu muncito yakushimikila. Na twacita boobo, Yehova alatushomesha ayi, teshi akatulekele mumeelesho ngeenga tatucikoonshi kukoma. (1 Koli. 10:​12, 13) Soonse tulayandika kupaila abuumbi kuli Yehova kwaamba ayi tutolelele kushomeka kuli nguwe ndyetutokwiinda mumapensho munshiku shino shakweelaako. Yehova alisuni kwaamba ayi ‘tumulwiite mapensho esu oonse’ mumupailo. (Kulu. 62:8) Munoolumbaisha Yehova akumulumba pashintu shoonse nshaamucitila. Amumusenge kwaamba ayi amucaafwe kuba bataloondi ndyemutooshimikila. Alimwi amumusenge kwaamba ayi amucaafwe kuliyumya ndyemutokwiinda mumapensho ali oonse akukaka meelesho ali oonse. Mutasuminishi cintu cili coonse na muntu uli woonse kumupa kwaalilwa kunoopaila kuli Yehova lyoonse. w23.05 pe. 7 mapa. 17-18

Ino nceebonshi ncetucanikila kumabungano ansondo ansondo? Ceebo cinene ncakwaamba ayi tulalumbaisha Yehova. (Kulu. 26:12; 111:1) Alimwi tulacanika kumabungano kwaamba ayi tunoyuminishanya munshiku shino shiyumu abuumbi. (1 Tesa. 5:11) Na twakumbulawo kumabungano, tulalumbaisha Yehova akuyuminisha bamwi. Sombi cimwi ciindi inga catubeta ciyumu kukumbulawo. Mpashi inga katuloonda kukumbulawo, na mpashi inga katusunishishi kukumbulawo sombi liinji kabatatutondekiiwo na twatambika lyaansa. Ino nshiinshi sheenga shatucafwa kukoma mapensho aya? Mutumwi Paulo wakaamba ayi tulyeelete kubikila maano ‘kukuyuminishanya.’ Teshi tukanoolonda abuumbi kutambika lyaansa kwaamba ayi tukumbulewo na katwiibaluka ayi inga twayuminisha bamwi nabi twakumbulabo cikumbulo cifwiifwi kutondesha lushomo lwesu. Alimwi na liinji tabatootupa coolwe cakukumbulawo, inga twasangalala kwaamba ayi bamwi batooba acoolwe cakukumbulawo.—1 Pit. 3:8. w23.04 pe. 20 mapa. 1-3

Mwaami wakapa mulawo wakwaamba ayi baJuda abo bakalinga basha mucishi ca Babiloni mpashi kwamyaaka 70, baboolele kucishi cinemishaabo ca Isilaeli. (Esila 1:​2-4) Yehova ngowakapa kwaamba ayi ici cikonsheke. Bene Babiloni bakalinga kushibikitwe ayi tabakalinga kusuminisha basha kuboolela kumishaabo. (Isa. 14:​4, 17) Nacibi boobo, ndabala ya Babiloni yakakomwa alimwi mwaami mupya wakalwiita baJuda ayi inga baboolela kumishaabo nabi kutolelela kuba mu Babiloni. Mpashi tacakalinga cuubu ku baJuda baanji kusalawo shakucita pamakani aya. Mpashi baanji bakalinga bacembela abuumbi cakwaamba ayi inga tabacikonshi kweenda mushinso uyu ulaamfu. Alimwi mukwiinga baJuda baanji bakashalilwa mu Babiloni, ngomusena weenkabo ngobakalinga kushi. Balo bakalinga kubona ayi cishi ca Isilaeli ncishi mwakalinga kukala bamashali babo bakulukulu. Citoboneka ayi baJuda bamwi bakalinga babile abuumbi mu Babiloni. Aboobo mpashi bamwi cakabayumina kushiya buumi bwabo bubotu mbobakashibila na makwebo abo, akuya mukukala kumusena nkobatana kukalaawo kale. w23.05 pe. 14 mapa. 1-2

Maswi akwe Lesa alatuyuminisha kwiiya kutolelela kutondesha mibo mbuli kuliyumya, kutondesha nkumbu alimwi alusuno. Kucakubonenaako, Luka 21:19 ilaamba ayi: ‘Kwiinda mukuliyumya kwanu, mulaakupulusha buumi bwanu.’ Bene Kolose 3:12 ilaamba ayi: ‘Amulifwalike . . . nkumbu.’ Alimwi 1 Bene Tesalonika 4:​9, 10 ilaamba ayi: “Lesa wamwiisha kale mbomweelete kusunana. . . . Ono twamusenga nobamakwesu kwaamba ayi mwiindilisheewo kusunana.” Malembo oonse aya akalembelwa Beneklistu abo bakalinga kutondesha kale kuliyumya, inkumbu alimwi alusuno. Sombi bakalinga kweelete kutolelela kwiiya kutondesha mibo iyi. Aswebo tulyeelete kwiiya kunotondesha mibo iyi. Kwaamba ayi mucikoonshe kucita boobo, amwiiye Beneklistu bakutaanguna mbobakeeya kutondesha mubo womwi awomwi. Lyalo mulaakubona mbweenga mwakonkela cakubonenaako cabo akutondesha ayi mulilibambite kusa kwa mapensho anene. Lyalo na mapensho anene akatalike, cilaakuba cuubu kuliyumya alimwi mulaakuba bashinishite kutolelela kuliyumya. w23.07 pe. 3 mapa. 4, 8

Inga caba ayi tulinanikitwe na tuli ba “mbelele shimwi,” tulayandika kutolelela kweenda mu “Nshila Isalalite.” Kucita boobo kulaakutucafwa kutolelela kulambila Yehova pacecino ciindi akunembo, paciindi Bwaami bwakwe Lesa ndyeshi bukalete shoolwe shibotu pacishi capanshi. (Joni 10:16) Kuswa mumwaaka wa 1919, basankwa, banakashi abaana baanji, bakaswa mu Babiloni munene, nkokwaamba ayi bupailishi boonse bwakubeca, akutalika kweenda munshila iyi yacikoshanyo. BaJuda ndyebakalinga kuswa mu Babiloni, Yehova wakashinisha ayi wakushamo cili coonse munshila ceenga cabashinkila. (Isa. 57:14) Ino nshiinshi Yehova nshaakacita kwaamba ayi abambe “Nshila Isalalite” ya munshiku shino? Myaaka iinji mwaaka wa 1919 kootana kushika, Yehova wakasebensesha bantu bakalinga kumulemeka abuumbi kwaamba ayi bacafwe bantu kuswa mu Babiloni munene. (Amweelanye a Isaya 40:3.) Bakasebensa ncito iyandika yakubamba nshila kwaamba ayi cikonsheke kubantu basuni kwiiya kuswa mubupailishi bwakubeca akutalika kulambila Yehova pomwi abantu bakwe. w23.05 mape. 15-16 mapa. 8-9

Yehova alisuni ayi tunomusebensela calusangalalo alimwi cakulyaaba. (2 Koli. 9:7) Aboobo sa tulyeelete kutolelela kweelesha kukumanisha ncotwakasala kucita lwakumushimu nabi ndyetutasunishishi kucita boobo? Amuyeeye pacakubonenaako ca mutumwi Paulo. Wakaamba ayi: “Nebo ndashibisha mubili wangu akuukoma.” (1 Koli. 9:​25-27) Nabi kwaamba ayi cimwi ciindi Paulo taakalinga kusunishishi kucita Yehova nshaakalinga kusuni ayi acite, wakalinga kweelesha cankusu kushicita. Ncakutatoonsha kwaamba ayi Paulo nshaakalinga kucita shakasangalasha Yehova alimwi Yehova wakamupa shoolwe ceebo cakusebensa cankusu kwakwe. (2 Timo. 4:​7, 8) Aswebo na katweelesha kukumanisha ncotwakasala kucita nabi ndyetutasunishishi kucita boobo, Yehova alasangalala. Alasangalala mukwiinga alicishi ayi tutoocita ceeco ncotwakasala kucita ceebo cakwaamba ayi tulimusuni, nabi kwaamba ayi inga katutasunishishi kucita ceeco ncotwakasala kucita. Yehova alaakutupa shoolwe ceebo cakusebensa cankusu kwesu bweenka mbwakapa Paulo shoolwe. (Kulu. 126:5) Na twabona Yehova mbwatotupa shoolwe, inga twatalika kusunishisha kukumanisha nshotwakasala kucita. w23.05 pe. 29 mapa. 9-10

Mutumwi Paulo wakakoshanisha bantu beshi bakabule kupuluka bushiku bwakwe Yehova kubantu abo balete. Tabashibiwo shicitika na ciindi mbocitokweenda. Aboobo tabashibiwo shintu shiyandika ndyeshitoocitika na kucitaawo comwi pesule lyakwaamba ayi shintu isho shacitika. Bantu baanji munshiku shino bali anga balilete. (Loma. 11:8) Balakaka kushoma bumboni butondesha ayi tutookala “munshiku shakweelaako” alimwi ayi mapensho anene alaakutalika conoono. (2 Pit. 3:​3, 4) Nacibi boobo, cilayandika abuumbi kwaamba ayi bushiku abushiku, twatolelela kuba balibambite. (1 Tesa. 5:6) Aboobo tulyeelete kutolelela kuba bacenjete akukalikana. Ino nceebonshi? Kwaamba ayi tutanokwaabanamo lubasu mushamapolitiki amushintu shimwi shitoocitika mucishi. Bushiku bwakwe Yehova ndyebutooya cisena pafwiifwi, tunanokakatishikwa abuumbi kwaabanamo lubasu mushintu ishi. Nacibi boobo, tatweelete kulisukama ansheshi tukacite. Mushimu wakwe Lesa inga watucafwa kuba bacenjete, kukalikana mumiyeeyo akusala kabotu shakucita.—Luka 12:​11, 12. w23.06 pe. 10 mapa. 6-7

Ino nciinshi ncomuyeeya na mwanyumfwa liina lyakwaamba ayi Samusoni? Mulyeelete mulayeeya ayi ngumusankwa wakalinga kucite nkusu shilibetele. Alimwi ico ncakwiila. Sombi paciindi cimwi wakasalawo kucita cintu citabete kabotu ico cakamuletela mapensho. Nacibi boobo, Yehova wakatolelela kubikila maano kukushomeka kwakwe Samusoni, alimwi wakapa kwaamba ayi makani aamba pamusankwa uyu alembwe mu Baibo kwaamba ayi twiiyeeko. Yehova wakasebensesha Samusoni kucita shintu shikankamika kwaamba ayi acafwe bene Isilaeli bantu bakwe mbaakasala. Pesule lya myaaka iinji kuswa ciindi Samusoni ndyaakafwa, Yehova wakatanjilila mutumwi Paulo kwiilikaawo liina lyakwe Samusoni pamulongo wa meena abasankwa bakalinga kucite lushomo luyumu. (Ebu. 11:​32-34) Cakubonenaako cakwe Samusoni inga catuyuminisha. Wakalinga kucinka manungo muli Yehova nabi paciindi ndyaakalinga mubukaalo buyumu. Kuli nsheenga tweeya kuswa kucakubonenaako cakwe Samusoni ambweenga cakubonenaako cakwe catuyuminisha. w23.09 pe. 2 mapa. 1-2

Inga twatolelela kuliyumya na lyoonse katupaila kuli Yehova akumulwiita shoonse shitusukamika. (1 Tesa. 5:17) Mpashi pacecino ciindi tamutokwiinda mulipensho liyumu abuumbi. Nacibi boobo, sa mulapaila kuli Yehova akumusenga kwaamba ayi amucaafwe kuliyumya ndyemwakalala, ndyemwapilinganishikwa na ndyemutacishi shakucita? Na lyoonse mulapaila kuli Lesa wesu kwaamba ayi amucaafwe ndyemutokwiinda mumapensho aniini pacecino ciindi, cilaakumubeta cuubu kucita boobo ndyeshi mukanokwiinda mumapensho ayumu kunembo. (Kulu. 27:​1, 3) Na twatolelela kunooshomeka kuli Yehova ndyetutokwiinda mumapensho pacecino ciindi, tulaakucikonsha kutolelela kuliyumya ndyeshi tukanokwiinda mumapensho ayumu kunembo. (Loma. 5:3) Ino nceebonshi nceenga twaambila boobo? Bamakwesu abenankashi baanji balaamba ayi lyoonse na bacikonsha kuliyumya ndyebatokwiinda mubukaalo buyumu, cilabacafwa kuliyumya na bapolelwa lipensho limwi. Na Yehova wabacafwa kuliyumya ndyebatokwiinda mulipensho limwi, lushomo lwabo lwa kwaamba ayi Yehova alaakubacafwa lulayuminaako, lyalo na bapolelwa lipensho limwi, lushomo ulo lulabacafwa kuliyumya.—Jemu. 1:​2-4. w23.07 pe. 3 mapa. 7-8

Yehova tayumininibo pacintu comwi mukwiinga alaliceesha alimwi alicite nkumbu. Kucakubonenaako, Yehova wakatondesha kuliceesha ndyaakalinga kusuni kunyonyoola bantu babiibi bamu Sodoma. Kwiinda mubaanjelo bakwe, Yehova wakalwiita Loti musankwa ululeme, kucicila kumusena watulundu. Loti wakaloonda kucicila kumusena uyo. Aboobo wakasenga ayi lakwe amukwashi wakwe bacicile ku Sowa, ndabala iniini yakalinga kweelete kunyonyoolwa. Yehova naakwiinga wakayumabo ayi Loti acicile kutulundu. Nacibi boobo, Yehova wakasuminisha Loti kucicila ku Sowa alimwi taakwe kwinyonyoola ndabala iyi. (Mata. 19:​18-22) Ndyepakeenda myaaka iinji, Yehova wakatondesha nkumbu ku bantu bamundabala ya Ninife. Wakatuma Jona kuya mukwaambilisha makani akunyonyoolwa kwa ndabala iyi pomwi abantu bakalinga kukalaamo. Sombi bene Ninife ndyebakaana, Yehova wakabanyumfwila nkumbu alimwi taakwe kwinyonyoola ndabala.—Jona 3:​1, 10; 4:​10, 11. w23.07 pe. 21 pala. 5

Ino nshiinshi nsheenga tweeya kuswa kucakubonenaako cakwe Joashi? Wakalinga mwaami uyo wakalinga kucinkitebo manungo mulucafwo lwakwe Jeoiyada. Aboobo Jeoiyada uyo wakalinga kumucafwa ndyaakafwa, Joashi wakatalika kukutika kubaabo batakalinga kukonkela milawo yakwe Yehova alimwi mukuya kwaciindi wakacileka kushomeka kuli Yehova. Shakacitikila Joashi shilatondesha ayi tatweelete kunyumfwilabo Lesa ceebo cakwaamba ayi bamumukwashi wesu abamwi mulibungano balanyumfwila Yehova. Kwaamba ayi tutolelele kuba abushicibusa buyumu a Yehova, tulyeelete kwiiya kumusuna akunoomulemeka abuumbi kwiinda mukunookwiiya lyoonse, kukutumana kuyeeyawo alimwi akupaila. (Jele. 17:​7, 8; Kolo. 2:​6, 7) Yehova taatulangili kucita nsheenga tatucikonshi. Nshatulangila kucita shililembetwe palilembo lya Shikushimikila 12:​13, apo paamba ayi: ‘Koloonda Lesa wancine akukonkela milawo yakwe yoonse mukwiinga uyu ngomulimo woonse wakapekwa muntu.’ Aswebo na katuloonda Yehova, tulaakutolelela kushomeka kuli nguwe nabi tukeende mubukaalo buli buyani kunembo. Taakuwo ceshi cikanyonyoole bushicibusa bwesu a Yehova. w23.06 pe. 19 mapa. 17-19

Vesi 5 ilatalika amaswi akwaamba ayi: “Ukala pacuuna ca bwaami.” (Ciyu. 21:5a) Maswi aya alilibetele mukwiinga ndyelinkanda lyakutaanguna pa mankanda otatwe Yehova mwiine ndyaakaamba, pamakani ngotucana mulibuku lya Ciyubululo. Aboobo Yehova mwiine ngowakaamba maswi aya, kuteshi kwiinda mumunjelo na kwiinda muli Yesu pesule lyakubushikwa! Cancine ici cilatondesha ayi inga twashoma maswi atokonkelaawo ngaakaamba. Ino nceebonshi? Mukwiinga Yehova ngu “Lesa utabeci.” (Taita. 1:2) Aboobo maswi ngotucana pa Ciyubululo 21:​5, 6 alaakukumanishikwa. Atubandike paliswi lyakwaamba ayi ‘Amubone!’ Liswi lyamu ciGiliki lyakasansululwa ayi ‘amubone!’ lilasebenseshekwa mankanda aanji mulibuku lya Ciyubululo. Ino nshiinshi shakakonkelaawo Lesa nshaakaamba? Wakaamba ayi: “Shintu shoonse ntooshipanga cipya.” Yehova wakalinga kwaamba nsheshi akacite kunembo. Ano mukwiinga alicishi ayi alaakukumanisha cishomesho cakwe, wakaamba anga cacitika kale.—Isa. 46:10. w23.11 mape. 3-4 mapa. 7-8

Kuli shintu shimwi mutumwi Pita nshaatakwe kucita kabotu. Amuyeeye pashakubonenaako shiniini shitokonkelaawo. Yesu ndyaakasansulula mbwaakalinga kusa mukupenshekwa alimwi akucaikwa kwaamba ayi bushinshimi bwamu Baibo bukumanishikwe, Pita wakamukalalila. (Maako 8:​31-33) Alimwi mankanda aanji Pita abatumwi bamwi bakapikishanya pamakani awakalinga munene. (Maako 9:​33, 34) Mashiku Yesu kaatana kufwa, Pita wakasutula litwi lya musankwa umwi. (Joni 18:10) Mashiku eenka alya, Pita wakakaka Yesu mankanda otatwe ceebo cakuloonda bantu. (Maako 14:​66-72) Pita ndyaakacita boobo, wakalila abuumbi. Pita wakalefuka abuumbi ceebo cashintu shimwi nshaatakwe kucita kabotu. Nacibi boobo, Yesu taakwe kumukaka. Yesu ndyaakabushikwa, wakapa Pita coolwe cakutondesha ayi acimusuni. Wakapa Pita mukuli wakweembela mbelele shakwe. (Joni 21:​15-17) Pita wakakonkela Yesu nshaakamulwiita. Aboobo wakalinga ku Jelusalemu pabushiku bwa Pentekositi alimwi wakalinga pa bashikwiiya bakutaanguna abo bakananikwa amushimu usalashi. w23.09 pe. 22 mapa. 6-7

Mutumwi Pita wakayuminisha bamanenenyina ayi: “Amweembele litanga lyakwe Lesa.” (1 Pit. 5:​1-4) Na mutosebensa mbuli munene, tulicishi kwaamba ayi mulibasuni bamakwesu abenankashi alimwi mulisuni kubayuminisha. Nacibi boobo, cimwi ciindi inga kamulinyumfwa ayi mulicite shakucita shiinji na ayi mwalema abuumbi cakwaamba ayi inga tamucikoonshi kukumanisha mukuli uyu. Ino nshiinshi nsheenga mwaciita? Amupaile kuli Yehova akumulwiita mbomutolinyumfwa. Pita wakalemba ayi: “Uyo woonse usebensa . . . ulyeelete kusebensa kweelana ankusu Lesa nshaamupa.” (1 Pit. 4:11) Mpashi bashominyinaanu inga kabeenda mumapensho eenga abula kumana mucishi cino cibiibi. Sombi munokwiibaluka ayi Yesu Klistu “mweembeshi munene,” inga wabacafwa kwiinda ambweenga mwabacafwa. Inga wabacafwa pacecino ciindi alimwi amucishi cipya. Yehova ncaasuni ayi bamanene banoocita nkusuna bashominyinaabo, kubayuminisha, akuba cakubonenaako kuli mbabo. w23.09 mape. 29-30 mapa. 13-14

Tulyeelete kuleya kuyeeya kwa bantu abo batalemeki milawo yakwe Yehova. Na katuyeeya mbuli bantu abo batalemeki milawo yakwe Yehova, aswebo inga twacileka kukonkela milawo yakwe. (1 Koli. 3:19) Liinji ‘busongo bwa mucishi ici’ bulapa kwaamba ayi bantu batanonyumfwila Lesa. Beneklistu bamwi bamulibungano lya Pegamamu alya Tiyatila bakalinga kuyungwa abantu abo bakalinga kucita bufuule akulambila shibumbwabumbwa. Yesu wakalulika cankusu mabungano aya oonse obilo ceebo cakusuminisha bantu bakalinga kucita bufuule kutolelela kuba pakati kabo. (Ciyu. 2:​14, 20) Munshiku shino, bantu bakumusena nkotukala inga batuyunga kunoocita shintu shitabete kabotu. Bamumukwashi wesu alimwi abantu mbotushibenaabo inga beelesha kutupa kushoma ayi tulaciindilisha kukonkela milawo yakwe Yehova alimwi ayi palibo kabotu nabi twabula kwiikonkela. Kucakubonenaako, mpashi inga batulwiita ayi taciyandiki kutolelela kuba amibo ibotu, alimwi ayi njiisho shamu Baibo shaamba pamakani akulilemeka nshakale kale. Cimwi ciindi mpashi inga twayeeya ayi butanjilishi Yehova mbwaatupa teshi buubu kunyumfwisha. Alimwi mpashi inga tweeleshekwa ‘kwiindilila shintu shilembetwe.’—1 Koli. 4:6. w23.07 pe. 16 mapa. 10-11

Maliya banyina Yesu wakalinga kuyandika kuyuminishikwa. Wakalinga kusa mukumita nabi kwaamba ayi taakalinga kweebetwewo. Nabi kwaamba ayi taakalinga kucishiiwo bwakulama mwaana, wakalinga kusa mukulama mwaana musankwa uyo wakalinga kusa mukuba Mesiya. Paciindi ici Maliya kaatana kukumanaawo kale amusankwa, sombi wakalinga kweelete kulwiita Josefu ayi alicite lifumo. Cilyeelete tacakalinga cuubu kulwiita Josefu makani aya. (Luka 1:​26-33) Ino Maliya wakayuminishikwa buyani? Wakasenga lucafwo kuswa kubamwi. Kucakubonenaako, wakasenga Gabuliyelo kwaamba ayi amucaafwe kushibilaawo ashimwi pa mukuli uyu. (Luka 1:34) Lyalo ndyepakeendabo ciindi ciniini, wakaya “mundabala yakalinga mutulundu” mucishi ca Juda mukufwakashila Lisabeti shikamukowa wakwe. Lisabeti wakalumba Maliya alimwi wakatanjililwa amushimu usalashi kwaamba bushinshimi buyuminisha pa mwaana musankwa Maliya ngwaakalinga kusa mukutumbuka. (Luka 1:​39-45) Maliya wakaamba ayi ‘lyaansa lyakwe [Yehova] lyacita shintu shankusu shikankamika.’ (Luka 1:​46-51) Yehova wakayuminisha Maliya kwiinda mukusebensesha Gabuliyelo a Lisabeti. w23.10 mape. 14-15 mapa. 10-12

Bashikwiiya bakwe Klistu baniini bakananikwa amushimu usalashi alimwi balicite bushicibusa bulibetele a Yehova. Bashikwiiya aba bali 144,000 balaakusebensa mbuli bapailishi pomwi a Yesu kwiculu. (Ciyu. 14:1) Musena Usalalite wakalinga mu tente yakulambililaako, uleemikaninaako bushicibusa mbobacite a Lesa mbuli bana bakwe mbwaakananika amushimu usalashi ndyebacili pacishi. (Loma. 8:​15-17) Musena Usalalite Wiindaawo wakalinga mu tente yakulambililaako, uleemikaninaako kwiculu uko Yehova nkwaakala. ‘Cisani cishitilisha’ ico cakalinga kupansaanya Musena Usalalite a Musena Usalalite Wiindaawo, cileemikaninaako mubili wakwe Yesu wa buntu. Yesu naakwiinga wakatolelela kuba amubili wa buntu, naakwiinga taakwe kuya kwiculu mbuli Mupailishi Munene wiindaawo mu tempele yakumushimu. Aboobo Yesu ndyaakafwa akwaaba mubili wakwe wa buntu, wakapa kwaamba ayi cikonsheke ku Beneklistu bananikitwe boonse kunoobushikwa akuya kwiculu. Abalo balyeelete kutaanguna kufwa akubushikwa amubili wamushimu, kwaamba ayi batambule cilambu cabo cakuya kwiculu.—Ebu. 10:​19, 20; 1 Koli. 15:50. w23.10 pe. 28 pala. 13

Gidyoni wakakumbula cakulibombya bene Efuleemu ndyebakamutongooka. (Boombo. 8:​1-3) Gidyoni taakwe kubakumbula cabukali. Wakatondesha kuliceesha kwiinda mukubakutika ndyebakalinga kumutongooka akwiinda mukubakumbula cakulibombya. Ici cakapa kwaamba ayi batolelele kunyumfwana. Bamanene basongo balakonkela cakubonenaako cakwe Gidyoni kwiinda mukukutika cakubikila maano alimwi akukumbula cakulibombya bamwi ndyebatobatoongooka. (Jemu. 3:13) Aboobo balapa kwaamba ayi mulibungano mutolelele kuba luumuno. Gidyoni ndyebakamulumbaisha pesule lyakukoma bene Midyani, wakalumbaisha Yehova. (Boombo. 8:​22, 23) Ino bamanene inga bacikonkela buyani cakubonenaako cakwe Gidyoni? Balyeelete kulumbaisha Yehova pashintu shoonse nshobacikonsha kucita. (1 Koli. 4:​6, 7) Kucakubonenaako, na munene bamulumba ceebo cakwaamba ayi alicishi kabotu kwiisha, inga waamba ayi nshaamba shaswa mu Maswi akwe Lesa alimwi soonse tutokwiiya kuswa ku libunga lyakwe Yehova. Cimwi ciindi bamanene balyeelete kuyeeyawo na balaiisha munshila yeenga yapa kwaamba ayi Yehova alumbaishikwe nabi na balasuna bamwi ayi babalumbaishe. w23.06 pe. 4 mapa. 7-8

Na Yehova taakwe kutupa ncetwamusenga, inga twaliipusha ayi, ‘Sa ntopailila pacintu ceelete?’ Liinji tulayeeya ayi tulicishi kabotu nshetutoyandika. Sombi shintu nsheenga katupaililaawo, mpashi teshi nshoshintu nsheenga katuyandika. Na tutopailila palipenshi ndyetutokwiindaamo, mpashi inga kakuli nshila ili kabotu lipenshi ilyo mbweenga lyamana, kwiinda njetutopaililaawo. Alimwi shintu shimwi nshotupaililaawo inga kashiteendelani akuyanda kwakwe Yehova. (1 Joni 5:14) Kucakubonenaako, amuyeeye ayi bashali basenga Yehova kwaamba ayi acafwe mwanaabo kutolelela kumusebensela. Palibo kabotu bashali kupailila pamakani aya. Sombi Yehova taakakatishi muntu uli woonse kumusebensela. Alisuni kwaamba ayi soonse, kwiilikaawo abana besu, tusalewo kumulambila. (Duto. 10:​12, 13; 30:​19, 20) Aboobo bashali balyeelete kusenga Yehova kwaamba ayi abacaafwe kwiisha mwanaabo munshila yeenga yamushika pamoyo, kwaamba ayi asune Yehova akuba shicibusa wakwe.—Tus. 22:6; Efe. 6:4. w23.11 pe. 21 pala. 5; pe. 23 pala. 12

Ino nceebonshi kuyuminisha bamwi njenshila iyandika mbweenga twatondesha ayi tulibasuni? Libuku limwi lyaamba pamakani amu Baibo lyakaamba ayi, liswi lyakwaamba ayi “kuyuminisha” Paulo ndyaakasebensesha, lilasansulula “kuba pafwiifwi amuntu kwaamba ayi tumucaafwe ndyaatokwiinda mubukaalo buyumu.” Aboobo na twayuminisha mukwesu utokwiinda mumapensho, tulamucafwa kutolelela kusebensela Yehova cakushomeka. Alimwi lyoonse na twayuminisha mukwesu, tulatondesha ayi tulimusuni. (2 Koli. 7:​6, 7, 13) Ino kutondesha nkuumbu akuyuminisha shilicatene buyani? Muntu ucite nkuumbu alayuminisha bamwi ndyebatokwiinda mumapensho akubacafwa. Aboobo kunyumfwila bamwi inkumbu, kulatupa kubayuminisha. Amubone Paulo mbwakasansulula nkuumbu mboshipa Yehova kuyuminisha bamwi. Wakaamba ayi Yehova ngu “Ishiwesu shinkumbu uyo utucafwa.”—2 Koli. 1:3. w23.11 mape. 9-10 mapa. 8-10

Bashikwiiya bakwe Klistu boonse inga balangila kwiinda mumapensho. Amuyeeye pa shakacitikila mutumwi Paulo. Wakalwiita Beneklistu baku Tesalonika ayi: “Nditwakalinga amwebo, twakamulwiitila limwi ayi tulaakupenshekwa alimwi kweelana ambomwishi ici cakacitika cancinencine.” (1 Tesa. 3:4) Alimwi wakalwiita Beneklistu baku Kolinto ayi: ‘Nobamakwesu, tulisuni kwaamba ayi mwishibe mapensho ngotwakeendaamo . . . Tetwakalinga kushoma kwaamba ayi inga katucili boomi.’ (2 Koli. 1:8; 11:​23-27) Munshiku shino, Beneklistu abalo inga balangila kwiinda mumapensho amwi. (2 Timo. 3:12) Mpashi beshicibusa abeshikamukowa bakamupenshawo kale ceebo cakwaamba ayi mwakashoma muli Yesu akuba shikwiiya wakwe. Na mpashi bakamunjisha ncito nabi mbomusebensaabo balamupensha ceebo cakwaamba ayi mulashomeka. (Ebu. 13:18) Sa bamumfulumeende bakamupenshawo kale ceebo cakwaamba ayi mulashimikilako bamwi pakulangila nkomucite? Tacicite mulandu amapensho ngeenga tweendaamo, Paulo wakaamba ayi tulyeelete kusangalala. w23.12 mape. 10-11 mapa. 9-10

Jakobo wakeenda mumapensho aanji. Bana bakwe Jakobo basankwa bobilo, Simyoni a Lefi, bakasebaanya mukwashi akusebaanya liina lyakwe Yehova. Kwiilikaawo, Lakelo mwanakashi ngwaakalinga kusuni abuumbi, wakafwa ndyaakalinga kutumbuka mwaana wabili. Alimwi mucishi mwaakalinga kwikala ndyemwakaba nsala inene, Jakobo wakalongela ku Ijipiti, paciindi ici kaali wacembela. (Mata. 35:​16-19; 37:28; 45:​9-11, 28) Nabi kwaamba ayi Jakobo wakeenda mumapensho oonse aya wakatolelela kushoma muli Yehova alimwi amushishomesho Shakwe. Yehova alakwe wakatondesha ayi wakalinga a Jakobo. Kucakubonenaako, Yehova wakapa kwaamba ayi Jakobo abe ashintu shiinji lwakumubili. Alimwi amuyeeyebo mbwakasangalala akulumba Yehova ndyaakabonana a Josefu mwanaakwe musankwa—uyo ngwakalinga kuyeeya ayi wakafwa! Jakobo wakacikonsha kuliyumya mumapensho oonse aya ceebo cakwaamba ayi wakalinga kucite bushicibusa buyumu a Yehova. (Mata. 30:43; 32:​9, 10; 46:​28-30) Aswebo na twatolelela kuba abushicibusa buyumu a Yehova, inga twacikonsha kuliyumya ndyetutokwiinda mumapensho ngotwatalinga kulangila. w23.04 pe. 15 mapa. 6-7

Mu Kulumbaisha 23, Defedi wakaamba cakutatoonsha ayi Yehova alimusuni alimwi alamutondesha nkuumbu. Wakasansulula bushicibusa buyumu mbwaakalinga kucite a Yehova uyo ngwaakaamba ayi Mweembeshi wangu. Defedi wakalinga kulinyumfwa kushitilishikwa kutanjililwa a Yehova, alimwi wakalinga kucinka manungo cakumaninina muli nguwe. Defedi wakalinga kucishi ayi Yehova alaakunoomutondesha lusuno mubuumi bwakwe boonse. Ino nciinshi cakamucafwa kushoma cakutatoonsha ayi Yehova alimusuni? Defedi wakalinyumfwa ayi Yehova wakalinga kumulama kabotu mukwiinga wakalinga kumupa shintu shoonse nshaakalinga kuyandika. Kwiilikaawo, Defedi wakalinga kucishi ayi Yehova ngu shicibusa wakwe alimwi ayi wakalinga kukondetwe pali nguwe. Aboobo wakalinga kucishi ayi tacicite mulandu ashintu sheenga shamucitikila, Yehova alaakutolelela kunoomupa nshayandika. Mukwiinga Defedi wakalinga kushomete ayi Yehova alimusuni alimwi ananomubikilako maano, wakatolelela kuba alusangalalo akukwana anshaakalinga kucite, muciindi cakulisukama.—Kulu. 16:11. w24.01 pe. 29 mapa. 12-13

Kuswabo ciindi Inkondo Yapacishi Coonse Yabili ndyeyakamana, bantu bakwe Yehova mushishi shiinji balicite luumuno alwaanguluko lwakushimikila. Bantu baanji bamushiba Yehova alimwi basebenshi bakwe batoshimikila nsengwe yoonse. Munshiku shino, bamu Likoto Litanjilila batolelela kukonkela butanjilishi bwakwe Klistu. Balisuni kwaamba ayi bamakwesu banoobona ayi butanjilishi mbobabapa bulaswa kuli Yehova a Yesu. Alimwi balasebensesha bamatanjilili balubasu abamanene kupa butanjilishi kumabungano. Bamanene bananikitwe kwiilikaawo abamanene boonse mumabungano, bali “mulyaansa lyalulyo” lyakwe Klistu. (Ciyu. 2:1) Kwalo, bamanene boonse tabamaninite alimwi balabisha. Paciindi cimwi Mose a Joshuwa bakabisha alimwi batumwi abalo bakalinga kubisha. (Shakube. 20:12; Joshu. 9:​14, 15; Loma. 3:23) Sombi tutoobona ayi ncakwiila Klistu atotanjilila cakubikila maano musebenshi ushomeka abamanene bakasalwa mumabungano, alimwi alaakutolelela kucita boobo. Aboobo kuli sheebo shibotu sheelete kutupa kushoma butanjilishi mbwaatupa kwiinda mubaabo mbaakasala kututanjilila. w24.02 mape. 23-24 mapa. 13-14

Munshiku shino, inga twasangalasha Yehova kwiinda mukwaamba pali nguwe munshila itondesha mbotumulumba ambotumusuni abuumbi. Ndyetutoshimikila, luyaando lunene nkucafwa bamwi kuba abushicibusa a Yehova akunoolinyumfwa bweenka mbotulinyumfwa pali Ishiwesu wakwiculu. (Jemu. 4:8) Tulasangalala kucafwa bantu kushiba Baibo nshoyaamba pali Yehova mbuli lusuno ndwaacite, bululami, busongo, nkusu alimwi amibo imwi ibotu njaacite. Alimwi tulalumbaisha Yehova akumusangalasha na katweelesha kukonkela cakubonenaako cakwe. Na katucita boobo, bamwi inga babona ayi tulipusene abantu bamucishi cino cibiibi. (Mate. 5:​14-16) Ndyetutoocita shintu shimwi pomwi ambabo, mpashi inga twacikonsha kubasansulwita ncotucitila shintu shipusene abantu bamucishi. Aboobo bantu basuni kwiiya balasuna kuba bushicibusa a Lesa wesu. Na katulumbaisha Yehova munshila ishi, tulamusangalasha.—1 Timo. 2:​3, 4. w24.02 pe. 10 pala. 7

Kwaamba ayi mube musankwa Mwineklistu ushimpite lwakumushimu, mulyeelete kwiiya kucita shintu shimwi sheenga shamucafwa. Kwiiya kucita shintu isho inga kwamucafwa kukumanisha mikuli mulibungano, kucana ncito kwaamba ayi kamulicafwa na kucafwa mukwashi wanu alimwi akuba abushicibusa bubotu abamwi. Kucakubonenaako, amwiiye kulemba akubelenga kabotu. Baibo ilaamba ayi muntu usangalete alimwi uswitilila, alabelenga Maswi akwe Lesa bushiku abushiku akukutumana kuyeeyawo. (Kulu. 1:​1-3) Kubelenga Baibo bushiku abushiku, kulamucafwa kushiba Yehova mbwayeeya, ico ceenga camucafwa kunooyeeya kabotu akukonkela nshatokwiiya. (Tus. 1:​3, 4) Bamakwesu abenankashi balayandika lucafwo lwa basankwa bashimpite lwakumushimu beenga bacikoonsha kwiisha kabotu akupa butanjilishi bwamu Baibo. Na kamucishi kulemba akubelenga kabotu, inga kamwaamba makani ashikumbulo sheenga shacafwa bamwi akuyumya lushomo lwabo. Alimwi mulaakunocikonsha kulemba shiteente sheenga shamucafwa kuyumya lushomo lwanu akuyuminisha bamwi. w23.12 mape. 26-27 mapa. 9-11

Na mwaloonda, amukutumane kuyeeya Yehova nsheshi akamucitile kunembo na Satana akanyonyoolwe. Mucitondesho ncotwakeebela pakubungana kunene kwamu 2014, cakatondesha mushali musankwa kabandika amukwashi wakwe mbweenga lilembo lya 2 Timoti 3:​1-5 lyabelengwa, naakwiinga shaambwa mumavesi aya shilaamba pasheshi shikacitike mu Paladaiso. Wakaamba ayi: “Ono shiba kwaamba ayi mucishi cipya, kulaakuba shiindi shisangalasha abuumbi. Mukwiinga bantu balaakuba basuni bamwi, basuni cancine, balibombya, baliceesha, balumbaisha Lesa, banyumfwila bashali, balumba, bashomeka, basuni mikwashi yabo abuumbi, basuni shipangano, lyoonse baamba shibotu pabamwi, balitibuka, bacata moyo, basuni shintu shibotu, batabeci, balwiitikwa, babona bamwi ayi balabeendaawo, basuni Lesa kwiinda kusuna shakulikondelesha, basuni kusebensela Lesa kuswa paanshi lyamoyo; bantu bamushobo wooyo utapansaani ambabo.” Sa mulabandika abamumukwashi wanu na bashominyinaanu pa buumi mbweshi bukabe mucishi cipya? w24.01 pe. 6 mapa. 13-14

Cilayuminisha kushiba ayi Yehova alikondetwe pa bantu bakwe! Baibo ilaamba ayi: ‘Yehova alakondwa mubantu bakwe.’ (Kulu. 149:4) Nacibi boobo, cimwi ciindi inga twalefuka akutalika kuliipusha ayi, ‘Sa ncakwiila Yehova alikondetwe pali ndime?’ Baanji baambwa mu Baibo abo bakasebensela Yehova cakushomeka, cimwi ciindi bakalinga kulinyumfwa ayi taakondetwe pali mbabo. (1 Samwe. 1:​6-10; Jobo 29:​2, 4; Kulu. 51:11) Baibo ilatondesha patuba ayi Yehova inga wakondwa pa bantu batamaninite. Munshila nshi? Tulyeelete kushoma muli Yesu Klistu akubombekwa. (Joni 3:16) Na twacita boobo tulatondesha kubantu boonse ayi twakaana kushibiibi shesu alimwi twakashomesha kucita kuyanda kwakwe Lesa. (Milimo 2:38; 3:19) Yehova alasangalala abuumbi na twaciita shintu ishi kwaamba ayi tube abushicibusa anguwe. Na twacita nsheenga twacikonsha kwaamba ayi tutolelele kucita kweelana anshotwakamushomesha, Yehova alakondwa pali ndiswe alimwi tulaba abushicibusa buyumu anguwe.—Kulu. 25:14. w24.03 pe. 26 mapa. 1-2

Inga twakonkela cakubonenaako ca batumwi kwiinda mukutolelela kushimikila nabi kwaamba ayi mfulumeende yatukasha. Alimwi inga twashoma cakutatoonsha kwaamba ayi Yehova alaakutucafwa kukumanisha ncito yesu yakushimikila. Aboobo amupaile kwaamba ayi Yehova amucaafwe kuba bataloondi akumupa busongo, akumusenga kwaamba ayi amucaafwe kuliyumya ndyemutokwiinda mumapensho. Sobaanji tutokwiinda mumapensho mbuli kuciswa, kulisukama, kufwitwa shikamukowa na shicibusa, mapensho mumukwashi, kupenshekwa na mapensho amwi. Alimwi mapensho mbuli malwashi anene ankoondo apa kwaamba ayi cibe ciyumu kuliyumya mumapensho aya ngotutokwiindaamo. Aboobo amumulwiite Yehova mapensho anu oonse. Amumulwiite bukaalo mbomutokwiindaamo bweenka mbweenga mwalwiita shicibusa ngomusuni. Amushome kwaamba ayi Yehova alaakumucafwa. (Kulu. 37:​3, 5) Kutolelela kupaila kulaakutucafwa ‘kuliyumya ndyetutokwiinda mumapensho.’ (Loma. 12:​12, NWT) Yehova alishi mapensho basebenshi bakwe ngobatokwiindaamo alimwi “ulanyumfwa kulila kwabo.”—Kulu. 145:​18, 19. w23.05 mape. 5-6 mapa. 12-15

Na tulisuni kusalawo shakucita pamakani ayandika, tulyeelete ‘kweelesha kwishiba sheesho Yehova nshaasuni,’ akucita kweelana anshaasuni. (Efe. 5:17) Kulangoola njiisho shamu Baibo nsheenga twakonkela mubukaalo mbotubeteemo, kulatondesha ayi tulisuni kushiba Yehova mbwaabona makani ayo. Lyalo na twakonkela njiisho shakwe, tulaakucikonsha kusala kabotu shakucita. Satana mulwani wesu “Mubiibi,” alisuni kwaamba ayi tubikile maano abuumbi kucita shintu shamucishi kwaamba ayi tutabi aciindi cakucita shiinji muncito yakwe Lesa. (1 Joni 5:19) Mwineklistu inga watalika kubikila maano kukuba amaali, kuba alwiiyo lwakumubili, na kuncito yakumubili muciindi cakubikila maano kunshila sha mbweenga wasebensela Yehova. Na wacita boobo, inga watondesha ayi watalika kuyeeya anga mbantu batasebenseli Yehova. Kwalo kuba ashintu ishi teshi cibiibi, sombi tasheelete kuba shintu shiyandika abuumbi mubuumi bwesu. w24.03 pe. 24 mapa. 16-17