Makani Akusebensesha Amukabuku Kamabungano Abuumi Anciito
AUGUST 6-12
BUBONI BUCANIKA MUMASWI AKWE LESA | LUKA 17-18
“Amutondeshe Kulumba”
nwtsty makani acafwa kwiiya pali Luka 17:12, 14
basankwa likumi bakalinga kucite manata: Muciindi camu Baibo, bantu balwashi manata bakalinga kubungana na kukala pantu pomwi mumakoto, aboobo bakalinga kucikonsha kucafwana. (2 Baami 7:3-5) Kweelana amulawo wakwe Lesa, bantu aba bakalinga kweelete kukala beenka. Alimwi bakalinga kweelete koolobesha na baboona muntu akwaamba ayi: “Nshisalalite, nshisalalite!” (Lefi 13:45, 46) Aboobo kweelana aMulawo uyu, beshimanata bakalinga kwiimfwi kulaale a Yesu.—Amubone maswi akwaamba ayi “Leprosy; Leper “ alimwi a palubasu lwa Glossary mu Baibo yacisungu
kooya ukalitondeshe kubapailishi: Mukwiinga Yesu Klistu wakalinga kukonkela Mulawo ndyaakalinga pacishi, wakalinga kucishi bubambo bwabapailishi kwiinda mu bene Aloni, aboobo ncakalwitila beshimanata mbwakashilika ayi baye ku bapailishi. (Mate. 8:4; Maako 1:44) Kweelana aMulawo wakwe Mose, mupailishi ngowakalinga kweelete kushinisha na shimanata ncancine woola. Shimanata washilikwa wakalinga kweelete kuya ku tempele akutola mulambu wa cipo ca tuyuni tobilo tuumi tusalalite, kasamu ka sida, kasani kasalala afuute.—Lefi 14:2-32.
w08-CG 10/1 14-15 mapa. 8-9
Ino Nceebonshi Tulyeelete Kutondesha Kulumba?
Sa Yesu wakabasuulabo abo batakwe kumulumba? Baibo ilatolelela akwaamba ayi: “Yesu wakakumbula ayi: ‘Sa te baba kabotu balinga likumi? Ino bamwi bosanwe abone bali kuli? Ino Nceebonshi kwaboolabo muswamashi eenka mukulumba Lesa?’”—Luka 17:17, 18.
Teshi kwaamba ayi aba bamwi bali 9 bakalinga bantu babiibi. Mukwiinga pakutaanguna bakatondesha ayi bakalinga kucite lushomo muli Yesu alimwi bakakonkela Yesu nshakabalwiita kucita, nkonkwaamba ayi kuya ku Jelusalemu mukulitondesha ku bapailishi. Cakutatoonsha bakalumba abuumbi pankumbu nshakabatondesha Yesu, nacibi boobo bakaalilwa kumutondesha kulumba uku. Ici tacikwe kukondelesha Klistu. Ino swebo? Na muntu umwi watucitila cintu cibotu, sa tulafwambaana kwaamba ayi ndalumba, alimwi na kacikonsheka kulemba nkalata yakulumba?
Kulangoola Buboni Bwakumushimu
(Luke 17:7-10)
nwtsty makani acafwa kwiiya pali Luka 17:10
swebo tuli basebenshibo: nkokwaamba ayi “batacite ncito.” Yesu taakalinga kwaamba ayi basebenshi bakwe na bashikwiiya balyeelete kulibona ayi mbantu batacite ncito. Kweelana amakani atokwaambwawo, maswi akwaamba ayi “tuli basebenshibo” alasansulula ayi basebenshi balyeelete kuba baliceesha, kuteshi mbuli bantu basuni kupekwa bulemu bulibetele na kulumbaishikwa. Beshikwiiya bamwi balaamba ayi aya ngamaswi acikoshanyo asansulula ayi “tuli basebenshi bateelete kupekwa kulumba kulibetele.”
nwtsty makani acafwa kwiiya pali Luka 18:8
lushomo ulu: Na “lushomo lwa mushobo uyu.” Kweelana amaswi aciGiliki akwaamba ayi “lushomo ulu” alatondesha ayi Yesu takalinga kwaambabo palushomo luli loonse sobwe, sombi wakalinga kwaamba lushomo lwa mushobo womwi, mbuli lulya lwakatondesha mwanakashi mukalubinje ngwakaamba mucikoshanyo. (Luka. 18:1-8) Ici cileelikaawo akushoma mumupailo alimwi akushoma ayi Lesa alaakucitila bantu bakwe mbwakasala shintu shiluleme. Citoboneka kwaamba ayi Yesu taakwe kupa cikumbulo kumwiipusho wa lushomo kwaamba ayi bashikwiiya bakwe bacale kabayeeya sha mbobeelete kuyumya lushomo lwabo. Cikoshanyo ici ca makani amupailo alushomo cakalinga kweelela mukwiinga Yesu wakaswa mukwaamba sha meelesho bashikwiiya ngobakalinga kusa mukucana kunembo.—Luka 17:22-37.
Kubelenga Baibo
(Luke 18:24-43)
AUGUST 13-19
BUBONI BUCANIKA MUMASWI AKWE LESA | LUKA 19-20
“Nsheenga Tweeya Kuswa kucikoshanyo Camamaina Likumi”
jy 232 mapa. 2-4
Cikoshanyo Camamaina Likumi
Aboobo wakaamba ayi: “Musankwa umwi wa mumukwashi wa mwaami wakaya kucishi ca kulaale ayi akapekwe bwaami akuboolela alimwi.” (Luka 19:12) Lweendo ulo lulatola ciindi cilaamfu. Cakutatoonsha Yesu ngo “musankwa wamumukwashi wa mwaami” uyo “wakaya kucishi ca kulaale,” nkokwaamba ayi kwiculu, Baishi nkobakamupa Bwaami.
Kweelana acikoshanyo, “musankwa wamumukwashi wa mwaami” kaatana kuya, wakeeta basebenshi bakwe likumi akubapa maina asilifa, akubalwiita ayi: “Amucite makweebo kushikila nkaboole.” (Luka 19:13) Mamaina eene asilifa ngamaali acite mpindu. Maina yomwi ileelana amaali apekwa musebenshi wa mumuunda pesule lya myeenshi yotatwe akwiindawo.
Bashikwiiya balyeelete bakeshiba ayi mbobakalinga kwimikaninako basebenshi likumi mucikoshanyo, mukwiinga Yesu wabakoshanishawo kale abeshikutebula. (Mateyo 9:35-38) Ncakwiila, taakwe kubasenga ayi balete nshebatebula. Sombi beshikutebula mbaabo beenga bacana musena muBwaambi bwakwe Lesa. Bashikwiiya bakalinga kweelete kusebensesha nshebakalinga kucite kwaamba ayi balete baanji beshi bakapyane Bwaami.
(Luke 19:16-19)
jy 232 pala. 7
Cikoshanyo Camamaina Likumi
Na bashikwiiya bakeshiba ayi Yesu mbwakalinga kukoshanisha abasebenshi bakasebensesha kabotu buboni bwabo kwaamba ayi bacafwe bamwi kuba bashikwiiya, nkokwaamba ayi tabakwe kutoonsha ayi Yesu wakakondwa anshebakacita. Alimwi bakashoma ayi alaakubapa cilambu. Nacibi boobo, bashikwiiya bakwe Yesu bakalinga kucite nkusu abukaalo bupusene pusene. Ano Yesu, uyo wakapekwa “bwaami,” alakushiba akubapa shoolwe pakushomeka kwabo muncito yakucafwa bamwi kuba bashikwiiya.—Mateyo 28:19, 20.
(Luke 19:20-24)
jy 233 pala. 1
Cikoshanyo Camamaina Likumi
Musebenshi uyu wakanyaikwa anshakalinga kucite ceebo cakwaalilwa kutola panembo buboni bwa mwaami wakwe. Batumwi bakalinga kulangila Yesu kutalika kulela mu Bwaami bwakwe Lesa. Aboobo balyeelete bakeshiba kwaamba ayi teshi bakenjile mu Bwaami na bakaalilwe kusebensa cankusu, bweenka mbuli musebenshi wakweelaako.
Kulangoola Buboni Bwakumushimu
nwtsty makani acafwa kwiiya pali Luka 19:43
shisamu shisompete: Na “lilinga.” Liswi lyamuci Giliki khaʹrax lilacanikabo palilembo ili lyeenka mu Malembo aciGiliki. Lilasansululwa ayi “cisamu cisompete na shisamu nshebasebensesha kuyaka lilinga” alimwi “ashisamu shakalinga kusebensesha bashilumamba pakuyaka.” Maswi akaamba Yesu akakumanishikwa mu 70 C.E. ciindi Taitasi ndyaakapa bene Loma mulawo wakuyaka lubumbu na lilinga kushinguluka Jelusalemu. Taitasi wakalinga kusuni shintu shotatwe—kukasha bene Juda kwaamba ayi bataloboki, sombi balyaabebo beenka, akulengesha kwaamba ayi banyumfwile balwani babo ceebo ca nsala. Bashilumamba ba bene Loma bakatema shisamu shoonse shakalinga muluundu kwaamba ayi bayake lilinga kushinguluka Jelusalemu.
nwtsty makani acafwa kwiiya pali Luka 20:38
kuli nguwe boonse mboomi: Na “boonse mboomi kweelana akubona kwakwe.” Baibo ilatondesha ayi abo bataciti kuyanda kwakwe Lesa nabi mboomi balifwite kweelana akubona kwakwe Lesa. (Efe. 2:1; 1 Timo. 5:6) Aboobo, nabi basebenshi bakwe Yehova abo bakalinga kucita kuyanda kwakwe bakafwa, mboomi kuli nguwe, mukwiinga teshi akaalilwe kukumanisha cishomesho cakwe cakubabusha.—Loma. 4:16, 17.
AUGUST 20-26
BUBONI BUCANIKA MUMASWI AKWE LESA | LUKA 21-22
“Kulubulwa Kwanu Kuli Pafwaafwi”
kr 226 pala. 9
Bwaami Bwakwe Lesa Bwanyonyoola Balwani Bambubo
9 Cintu ciloondesha kwiculu. Yesu wakaambila limwi ayi: “Lisuba lilakushiya mweenshi teshi ukape mumuni, alimwi nyenyeshi shilaakuwa kuswa kwiculu.” Bamatanjilishi babupailishi teshi bakabe mbuli mumuni, nkokwaamba ayi bantu balaakukaka butanjilishi bwabo. Sa Yesu wakalinga kwaamba apashintu shikankamika sheshi shikacitike kwiculu? Mpashi. (Isa. 13:9-11; Jowelo 2:1, 30, 31) Ino bantu balaakucita buyani na bakabone shintu sha mushobo uyu? “Balaakulisukama” mukwiinga ‘balaakubulwa cakucita.’ (Luka 21:25; Sefa. 1:17) Ncakwiila, balwani ba Bwaami bwakwe Lesa, ‘ba maami a basha,’ ‘balaakuwisuka ceebo cakuloonda akulindila sheshi shikacitike alimwi balaakucica akuya mukuyuba.’ Sombi teshi bakacane musena nkweenga bayuba bukali bwa Mwaami wesu.—Luka 21:26; 23:30; Ciyu. 6:15-17.
w16.01 mape. 10-11 pala. 17
“Amutolelele Kusuna Bamakwesu Abenankashi”!
17 “Amube bataloondi.” (Amubelenge Bene Ebulu 13:6.) Kushoma Yehova kulatupa kutaloonda, nabi tucane mapensho ali woonse. Kutaloonda uku, kulatucafwa kutalisukama abuumbi. Kusuna bamakwesu abenankashi kwiilikaawo akutalisukama abuumbi kulaakutucafwa kuyuminisha bashominyineesu. (1 Tesa. 5:14, 15) Nabi ciindi mapensho anene ndyeshi akashike, tulaakucikonsha “teshi tukaloonde,” mukwiinga tulakushiba kwaamba ayi kulubulwa kwesu kuli pafwiifwi.—Luka 21:25-28.
w15 7/15 mape. 17-18 pala. 13
“Kulubulwa Kwanu Kuli Pafwiifwi”!
13 Ino bantu bali mbuli mpongo balaakucita buyani na bakeshibe ayi batooya ‘mukunyonyoolwa kwamuyayaya? “Balaakulyuma pacaamba akulila.” (Mate. 24:30) Ano ino bamakwabo Klistu abambelele shimwi balaakucita buyani? Mukwiinga balashoma Yehova Lesa aMwanaakwe, Yesu Klistu, balaakucita Yesu nshakaamba ayi: Ono na shintu ishi shikatalike kucitika, mukanyamuke akwiinuna mitwi yanu ceebo kulubulwa kwanu kuli pafwiifwi.” (Luka 21:28) Ncakwiila, teshi tukalisukame alimwi teshi tukatoonshe ayi Lesa atootupulusha.
Kulangoola Buboni Bwakumushimu
nwtsty makani acafwa kwiiya pali Luka 21:33
Liculu alimwi acishi ca panshi shilaakumana: Malembo amwi alatondesha ayi liculu acishi ca panshi shilaakubaako kwamuyayaya. (Mata. 9:16; Kulu. 104:5; Shi. 1:4) Aboobo Yesu alyeelete wakalinga kwaamba cikoshanyo, kusansulula ayi nabi kwaamba ayi cintu ceenga tacicitiki mbuli liculu acishi kumana, maswi akaamba Yesu alaakukumanshikwa. (Amweelanye a Mate. 5:18.) Nacibi boobo, liculu a cishi shitokwaambwa waawa shilyeelete nshacikoshanyo shilya shaambwa pa Ciyubululo 21:1 ayi “liculu lyakale kale acishi ca panshi cakale kale”.
sombi maswi angu teshi akamaneewo, sobwe: Na “maswi angu ndushinisho teshi akamaneewo.” Kweelana ambwasebenseshekwa muci Giliki maswi aya alatondesha kukaka muyeeyo, aboobo alayuminisha ayi maswi akwe Yesu teshi akamane.
w14 10/15 16-17 mapa. 15-16
Mulaakuba “Bwaami Bwabapailishi”
15 Ndyakatalika Mulalilo wa Mwaami, Yesu wakapanga cipangano abashikwiiya bakwe bashomeka, ico liinji ciitwa ayi Cipangano ca Bwaami. (Amubelenge Luka 22:28-30.) Ici cipangano cilipusene ashipangano shimwi shoonse mukwiinga Yehova tabetemo lubasu, ici ncipangano cakwe Yesu abashikwiiya bakwe. Yesu ndyakaamba ayi, “bweenka mbuli baTa mbobakapanga cipangano andime,” Yesu wakalinga kwaamba cipangano Yehova ncakapangana akwe cakuba “mupailishi wamuyayaya bweenka bwakalinga Melikisedeki.”—Ebu. 5:5, 6.
16 Batumwi bashomeka bali 11 bakatolelela kuba a Yesu mumapensho.’ Cipangano ca Bwaami cakabacafwa kushinisha kwaamba ayi balaakuba anguwe kwiculu akukala pashuuna sha bwaami akusebensa mbuli bapailishi. Nacibi boobo, teshibo bali 11 beenka beshi bakapekwe coolwe ici. Yesu wakabonekela kuli Joni mucili anga nciloto akwaamba ayi: “Uyo eshi akakome ndaakumusuminisha alakwe kwikala pacuuna cangu ca bwaami, bweenka mbondakakoma akwikala aba Ta pacuuna cabo ca bwaami.” (Ciyu. 3:21) Aboobo, bali mucipangano ca Bwaami mBeneklistu bananikitwe bali 144,000. (Ciyu. 5:9, 10; 7:4) Ici ncecipangano cipa kwaamba ayi baye mukulela pomwi a Yesu kwiculu. Aba bali mbuli anga ngu nabwinga utoswa kumukwashi ubile uyo utokweebwa ku mwaami alimwi eshi akaabanemo munkusu shakweendelesha shicite ibaye. Nceceeco Malembo ncaambila Beneklistu bananikitwe ayi bali mbuli “nabwiinga” wakwe Klistu, “mooye utana kukumanawo kale amusankwa” wakashomeshekwa kweebwa kuli Klistu.—Ciyu. 19:7, 8; 21:9; 2 Koli. 11:2.
AUGUST 27–SEPTEMBER 2
BUBONI BUCANIKA MUMASWI AKWE LESA | LUKA 23-24
“Amube Balibambite Kulekelela Bamwi”
cl 297 pala. 16
“Kushiba Lusuno Lwakwe Klistu”
16 Bweenka mbuli Baishi Yesu wakatondesha lusuno munshila imwi iyandika abuumbi—wakalinga “kulibambite kulekelela.” (Kulumbaisha 86:5) Lusuno ulu wakalutondesha nabi ndyaakalinga pacisamu cakupenshesha. Ndyebakamucaya alufu lulensha nsoni, kumupoopa misipikili kumaansa akumyeendo, ino Yesu wakaambawo nshi? Sa wakapaila kuli Yehova kwaamba ayi ese acaye balwani bakwe? Sobwe, pamaswi akweelaako ngakaamba pakalinga ayi: “Ta, amubalekelele, mukwiinga tabeshi ncebatoocita.”—Luka 23:34.
g 2/08 p. 10 mapa. 5-6
Sa Lesa Alalekelela Shibiibi Shinene?
Yehova taalangibo pacibiibi muntu ncacita sombi alalanga amuntu uyo mbwatolinyumfwa. (Isaya 1:16-19) Kucakubonenaako amuyeeye bantu babiibi bobilo bakapoopwa pomwi a Yesu pacisamu. Citoboneka kwaamba ayi bantu bobilo aba bakacita shibiibi shinene mukwiinga womwi pabaabo wakasumina ayi: “tutootambula cilambu ceelete pashintu nshetwakalinga kucita, ono lakwe uyu taaku cibiibi ncaakacita.” Maswi akaamba musankwa uyu shimucita shibiibi alatondesha ayi kwalinga shimwi nshakalinga kucishi pali Yesu. Alimwi ayi isho sheenka nsheshakamucafwa kwaalula miyeeyo yakwe. Twaamba boobo ceebo ca maswi ngakaamba ndyaakalinga kusenga Yesu ayi: “mukanjibaluke mwakunjila mu Bwaami bwanu.” Ino Klistu wakakukumbula buyani kusenga uku kwakaswa panshi lya moyo? Lyalo wakaamba ayi; “Ncakwiila sunu ntokulwiita ayi, ulaakuba andime mu Paladaiso.”—Luka 23:41-43.
Ano amuyeeyebo: Maswi akwe Yesu akweelaako akalinga ankumbu kumuntu wakasumina ayi wakacita mulandu wakucaikwa. Ici cilayuminisha abuumbi! Inga twashoma kwaamba ayi Yesu alimwi a Yehova, balaakunyumfwila nkumbu bantu boonse beshikulekelela kuswa panshi lya moyo, nabi kwaamba ayi bakacita shibiibi shinene.—Bene Loma. 4:7.
cl 297-298 mapa. 17-18
“Kushiba Lusuno Lwakwe Klistu”
17 Mpashi cakubonenaako cibotu citondesha Yesu mbwakalinga kulekelela bamwi ncilya ncakalekelela mutumwi Pita. Inga tatutoonshi kwaamba ayi Pita wakalinga kumusuni abuumbi Yesu. Pa Nisan 14, mashiku akweelaako abuumi bwakwe Yesu, Pita wakamulwiita ayi: “Nkambo, nebo ndilibambite kuya amwebo muntolongo nabibo kufwa.” Ano ndipakeenda maola aniinibo, Pita wakamukaka Yesu mankanda otatwe! Baibo ilatulwiita shakacitika Pita ndyaakalinga kwaamba maswi akukaka lyatatu: “Lyalo Mwaami wakapiluluka akulangilisha Pita.” Mukwiinga cakamucisa abuumbi cibiibi ncaakacita, Pita “wakaswita pansengwe, waya walila abuumbi.” Yesu ndyakafwa, Pita alyeelete wakatalika kuyeeya ayi, ‘Sa Mwaami wangu wakandekelela?’—Luka 22:33, 61, 62.
18 Pita takwe kulindila ciindi cilaamfu kwaamba ayi ashibe cikumbulo. Yesu wakabushikwa macuunsa pa Nisan 16, alimwi citoboneka bushiku bweenka bulya, wakaya kuli Pita. (Luka 24:34; 1 Bene Kolinto 15:4-8) Ino nceebonshi Yesu ncakabikila maano abuumbi kumutumwi uyo wakamukakila limwi ayi taamushiiwo? Yesu alyeelete wakalinga kusuni kuyuminisha Pita uyo wakalilekelela kubisha kwakwe ayi wakalinga kumusuni alimwi acicite mpindu kulinguwe. Sombi Yesu wakacita shiinji kwaamba ayi ayuminishe Pita.
Kulangoola Buboni Bwakumushimu
nwtsty makani acafwa kwiiya pali Luka 23:31
kucisamu cicili citontola, . . . caakuyuma: Citoboneka Yesu apa wakalinga kwaamba bene Juda. Bakalinga anga ncisamu citooya buyuma sombi cicitontolaako paniini, mukwiinga Yesu wakalingawo alimwi abene Juda bamwi bakalinga kumushoma. Nacibi boobo, Yesu alaakucaikwa conoono, alimwi bene Juda bashomeka balaakunanikwa amushimu usalashi akuba lubasu lwa bene Isilaeli bakumushimu. (Loma. 2:28, 29; Gala. 6:16) Paciindi ico, bene Isilaeli bakumubili balaakuba bafwite lwakumushimu, bweenka mbuli cisamu ciyumu.—Mate. 21:43.
nwtsty shakweebela
Musipikili Mulifuwa lya Cimpanta
Ici ncikope ca lifuwa lya cimpanta cakulipangila cakatululwa amusipikili wanshimbi ulaampa masentimita 11.5 na mainci ali (4.5). Cikope cakutaanguna bakacicana mumwaaka wa 1968, ndyebakalinga kukaba kumatwa kwa Jelusalemu, ico cakalinga camuciindi cabene Loma. Shakukaba ishi shilapa bumboni bwakwaamba ayi kale kale bantu balyeelete bakalinga kucaikwa kwiinda mukupopelwa pacisamu kusebensesha misipikili. Musipikili uyu ulyeelete ulikoshenye ayeeyo yakasebensesha bashilumamba babene Loma kupopa Yesu Klistu pacisamu. Cikope ici bakacicana mubokosi lya libwe, liitwa ayi ossuary, umo mobakalinga kubika mafuwa amuntu ufwite pesule lyakwaamba ayi mubili wabola. Ici cilatondesha ayi muntu wacaikwa pacisamu inga watolwa kucuumbwe.—Mate. 27:35.
Bible Reading
(Luke 23:1-16)