Makani Akusebensesha amu Kabuku Kamabungano Abuumi Anciito
NOVEMBER 4-10
BUBONI BUCANIKA MUMASWI AKWE LESA | 1 JONI 1-5
“Mutasuni Cishi Capanshi Alimwi Ashintu Shoonse Shiliimo”
(1 Joni 2:15, 16) Mutasuni cishi ca panshi alimwi ashintu shoonse shiliimo. Ceebo na muntu wasuna cishi ca panshi, nkokwaamba ayi taasuni Ishiwesu; 16 mukwiinga shoonse sha mucishi ca panshi, nkokwaamba ayi isho mubili nshookumbwa, shoonse bantu nshebakumbwa na bashibona alimwi asheesho shoonse shilengesha bantu kulisumpula, tashiswi kuli Ishiwesu, sombi shilaswa mucishi ca panshi.
w05 1/1 10 pala. 13
Amukonkele Cakubonenaako Cakwe Yesu
13 Bamwi inga bayeeya ayi teshi shintu shoonse sha mucishi shibiibi. Nacibi boobo, cishi alimwi ashintu sha mucishi inga shatupilinganya kwaamba ayi tutasebenseli Yehova. Alimwi taakuwo cintu nabi comwi camucishi ceenga catucafwa kuba bushicibusa a Lesa. Aboobo, na twasunishisha shintu sha mucishi, nabi kwaamba ayi shintu isho nshibotu, nkokwaamba ayi tuli panshila itabete kabotu. (1 Timoti 6:9, 10) Alimwi cishi ciliswitebo ashintu shibiibi isho sheenga shanyonyoola miyeeyo yesu. Kweebela mafilimu nabi mapulogilamu apa TV atondesha shakulwana, kusunishisha maali, na shabulale, inga kwapa kwaamba ayi tutalike kushibona anga shilibo kabotu, akutalika kushikumbwa abuumbi. Na lyoonse katucanika abantu basuni bunene shintu shakumubili na makweebo, aswebo inga twatalika kubona anga shintu ishi shilayandika abuumbi mubuumi bwesu.—Mateyo 6:24; 1 Bene Kolinto 15:33.
(1 Joni 2:17) Cishi alimwi ashintu shoonse shiliimo isho bantu nshebakumbwa shitooya bumana, sombi uyo ucita kuyanda kwakwe Lesa ulaakuba abuumi butamaani.
w13 8/15 27 pala. 18
Amuyeeye Mushobo wa Muntu Ngomweelete Kuba
18 Cintu cimwi ceenga catucafwa kukaka “shintu sha mucishi,” nkuyeya maswi akaamba mutumwi Joni ayi: “Cishi alimwi ashintu shoonse shiliimo isho bantu nshebakumbwa shitooya bumana, sombi uyo ucita kuyanda kwakwe Lesa ulaakuba abuumi butamaani.” (1 Joni 2:17) Bweende bwakwe Satana bulaboneka anga mbubotu abuumbi alimwi anga teshi bukamanewo. Nacibi boobo, bushiku bumwi bulaakumana. Taakuwo cintu cili coonse ca mucishi cakwe Satana ceshi cikatolelele kubaako. Kwiibaluka cancine ici, kulaakutucafwa kuleya kuyungoolwa atoose twakwe Satana.
Kulangoola Buboni Bwakumushimu
(1 Joni 2:7, 8) Nomusunikwi, nshintoomulembela mulawo upya, sombi ngukulukulu uyo ngomwakalinga kwishi kuswa kumatalikilo. Mulawo uyu ukulukulu ngomakani eenka ngomwakanyumfwa. 8 Nakubi boobo mulawo uyu ngoontoomulembela ngupya mukwiinga lushinisho lwa nguwo lulaboneka muli Klistu alimwi amuli ndimwe. Ono munshinshe utooya cimana alimwi mumuni wancinencine watalika kale kubala.
w13 9/15 10 pala. 14
Milawo Yakwe Yehova Ilashomeka
14 Mu Malembo aCigiliki aBwineklistu mulacanika milawo iinji ituyuminisha kusunana. Yesu wakaamba ayi mulawo wabili unene ‘nkusuna mubyo bweenka mboolisuni omwiine.’ (Mate. 22:39) Alakwe Jemusi mukwabo Yesu, wakeeta lusuno ayi “mulawo wa mwaami.” (Jemu. 2:8) Mutumwi Joni wakalemba ayi: “Nomusunikwi, nshintoomulembela mulawo upya, sombi ngukulukulu uyo ngomwakalinga kwishi kuswa kumatalikilo.” (1 Joni 2:7, 8) Ino Joni wakalinga kusansulula nshi ndyakaamba ayi “mulawo ukulukulu”? Wakalinga kwaamba pa mulawo wakusunana. Wakalinga “ukulukulu” munshila yakwaamba ayi Yesu wakapa mulawo uyu myaaka iinji yainda kwisule, “kuswa kumatalikilo.” Alimwi wakalinga “upya” munshila yakwaamba ayi kwakalinga kuyandika kulyaaba, uko bashikwiiya nkobakalinga kuyandika kutondesha mubukaalo bupya. Mbuli bashikwiiya bakwe Klistu, sa tulalumba kucenjeshekwa nkotutambula kutucafwa kwaamba ayi tutabi a mushimu wakulisuna uyo upukite mu cishi weenga walengesha ayi tunyonyoole lusuno ndotucite ku babyesu?
(1 Joni 5:16, 17) Ono na umwi wabona mubye kaacita cibiibi citola kulufu, amupailileeko kwaamba ayi Lesa amupe buumi. Ntokwaambabo bacita shibiibi shitatoli kulufu. Sombi nkocili cibiibi citola kulufu, aboobo nshintokwaamba ayi inga wapailila mubye pali ncico. 17 Kucita cintu citaluleme cilicoonse nkubisha, sombi kuli shibiibi shimwi shitaleteli lufu.
it-1 862 pala. 5
Kulekelela
Ncintu cibotu kupaila kuli Lesa kwaamba ayi alekelele bamwi nabi libungano lyoonse. Mose mbwaakacita ubo kumushobo wa bene Isilaeli, wakabaambililako shibiibi shabo akusenga ayi Yehova abalekeleleeko, alimwi Yehova wakamukutika. (Shakube. 14:19, 20) Kwiilikaawo, Solomoni alakwe, ndyaakalinga kwaaba tempele kuli Yehova, wakapaila kuli Yehova ayi anolekelela bantu bakwe na baana kuswa kushibiibi shabo. (1Ba 8:30, 33-40, 46-52) Esila wakeemikaninaako bene Juda ndibakaswa mubusha akubaambililaako shibiibi shabo. Mupailo wakwe uyu uyuminisha alimwi uswa panshi lya moyo wakapa kwaamba ayi bantu bacitewo comwi alimwi akutambula kulekelelwa kuswa kuli Yehova. (Esila 9:13–10:4, 10-19, 44) Jemusi wakayuminisha mulwashi lwakumushimu ayi alyeelete kwiita banene bamulibungano kwaamba ayi bamupailile, alimwi “shibiibi shoonse nshaakacita shilakulekelelwa.” (Jemu. 5:14-16) Nacibi boobo, “nkocili cibiibi citola kulufu,” kubishisha mushimu usalashi, na muntu wacita cibiibi kashangabo inga talekelelwiiwo. Mwineklistu taeelete kupailila bantu babisha munshila ya mushobo uyu.—1 Joni 5:16; Mate. 12:31; Ebu 10:26, 27.
Kubelenga Baibo: (1 Joni 1:1–2:6)
NOVEMBER 11-17
BUBONI BUCANIKA MUMASWI AKWE LESA | 2 JONI 1–JUDI
“Tulyeelete Kusebensa Cankusu Kwaamba ayi Tutolelele Kuba Mucancine”
(Judi 3) Nomusunikwi, ndakalinga kusuni abuumbi kumulembela nkalata kwaamba ayi musansulwite lupulusho ndotucite swebo sobashomi soonse. Sombi ndakabona ayi inga caba kabotu kumulembela nkalata yakumuyumya ayi mulame camaansa obilo lushomo ulo Lesa ndwaakapa bantu bakwe linkanda lyomwibo.
w04 9/15 11-12 mapa. 8-9
“Amutolelele Kuyuma mu Mwaami”
8 Malembo alatulwiita kabotu nshila Satana nshasuni kusebensesha, aboobo tulicishi kabotu bucenjeshi bwakwe. (2 Bene Kolinto 2:11) Satana ndyaakalinga kupensha Jobo muntu ushomeka, wakanyonyoola buboni bwakwe, wakacaya bayandwa bakwe, wakalengesha beshikamukowa kumupikisha, wakamuletela bulwashi alimwi beshicibusa bakwe bakamubekesha makani akubeca. Jobo wakalinyumfwa cibiibi alimwi wakalinga kubona anga Lesa wamulekelesha. (Jobo 10:1, 2) Munshiku shino teshi lyoonse Satana ndyeenga waleta mapensho amushobo uyu, nacibi boobo mapensho mbuli aaya alakuma Beneklistu baanji, alimwi Satana inga wasebensesha mapensho mbuli aaya kwaamba ayi atweeleshe.
9 Munshiku shino shakweelaako, kuli shintu shiinji abuumbi sheenga shatupilinganya lwakumushimu. Tulekala mucishi bantu mobabona buboni kuba cintu ciyandika abuumbi kwiinda shintu shakumushimu. Liinji makani ngotweebela pa Tv, alimwi angotubelenga mumanyusipepa na pa intaneti alatondesha ayi bulale bulapa lusangalalo kuteshi mapensho. Alimwi bantu baanji ‘balisuni shakulikondelesha kwiinda kusuna Lesa.’ (2 Timoti 3:1-5) Aboobo kuyeeya kwamushobo uyu kulakonsha kutunyonyoola lwakumushimu na twabula ‘kulwanina lushomo lwesu.’—Judi 3.
Kulangoola Buboni Bwakumushimu
(Judi 4) Ndakacita boobo mukwiinga bantu bamwi batasuni kucita kuyanda kwakwe Lesa bakenjila mulikoto lyanu cabushishi; bantu aba balapilinganya lwaanguluko ndotucite kwaamba ayi bacaninemo nshila yakunoocita shintu shilensha nsoni, kwiilikaawo balakaka Yesu Klistu mufundishi alimwi ngo Mwaami wesu eenkabo. Shamulandu wa bantu aba shakalembwa kale kale muMalembo akwe Lesa.
(Judi 12) Bantu aba bali anga ngamabwe ataboneki mumaanshi mushakulya shapakusekelela kwakutondesha lusuno, mbalyaabi, bayeeyabo shabo beene . Bali anga ngamakumbi atolaanishikwabo amuuwo, sombi taaleti mfula. Alimwi bali anga nshisamu shitacati shisepo na cashikila ciindi, nabi shisamu shakashulwa akuyuma cakumaninina.
it-2 279
Kusekelela Kwakutondesha Lusuno
Baibo taisansululi kusekelela kwakutondesha lusuno nabi ciindi ndyekwakalinga kucitika. (Judi 12) Yesu Klistu nabi batumwi tabakwe kwaamba ayi kusekelela uku kulyeelete kunoocitwa alimwi citoboneka ayi takwakalinga kweelete kunoocitwa lyoonsebo. Bamwi balaamba ayi paciindi ici Beneklistu bakalinga babile bakalinga kwiita bashomi abo bakalinga bakandu kukusekelela. Bana banshiwa, bamuka lubiinje, babile, abakandu bakalinga kulya akusangalala pantu pomwi mubwanabwankashi.
it-2 816
Mabwe
Liswi lyamu ciGiliki lyakwaamba ayi spi·lasʹ, ilyo lisebenseshekwa pamakani aya, lilasansulula libwe lili panshi pa maanshi. Judi wakasebensesha liswi ili kwaamba pa bantu bakesa mulibungano lya Bwineklistu abo bakalinga kucite miyeeyo ibiibi yeenga yanyonyoola ba mulibungano. Bweenka mbuli mabwe ashisitwe mumaanshi mbweenga anyonyoola maato, abalo basankwa aba bakalinga kusuni kupilinganya bamwi mulibungano. Judi wakaamba ayi: ‘Bantu aba bali anga ngamabwe ataboneki mumaanshi mushakulya shapakusekelela kwakutondesha lusuno.’—Judi 12.
(Judi 14, 15) Mbobaaba mbwaakashinshima Enoki, wasanu abobilo mubushalwe kuswa kuli Adamu, ndyakaamba ayi: “Amubone! Yehova wakesa abaanjelo bakwe basalalite bali shuulu ashuulu 15 Wakesa mukoombolosha akupa mulandu bantu boonse, batamunyumfwili, pashibiibi nshebakacita mububi bwabo, mukutalulama kwabo alimwi aceebo ca maswi abiibi bamucita shibi aba ngobakamucobola.”
wp17.1 12 pala. 1
“Wakakondelesha Lesa”
Ino mbushinshimi nshi Enoki mbwaakaamba? Wakaamba ayi: “Amubone! Yehova wakesa abaanjelo bakwe basalalite bali shuulu ashuulu 15 Wakesa mukoombolosha akupa mulandu bantu boonse, batamunyumfwili, pashibiibi nshebakacita mububi bwabo, mukutalulama kwabo alimwi aceebo ca maswi abiibi bamucita shibi aba ngobakamucobola.” (Judi 14, 15) Ano na mwaboona, Enoki wakaamba anga shintu shakacitika kale alimwi anga Lesa wakakumanisha kale shakaambwa mubushinshimi ubu. Ubu mbocibete abushinshimi buunji bwakalembwa mu Baibo. Muyeeyo ngwakwaamba ayi: Mushinshimi ndyaakalinga kwaamba pacintu cimwi wakalinga kushinishite alimwi wakalinga kubona anga cintu ico cacitika kale!—Isaya 46:10.
wp17.1 12 pala. 3
“Wakakondelesha Lesa”
Lushomo Enoki ndwaakalinga kucite lulatupa kuliipusha kubona na tulabona cishi Lesa mbwaacibona. Boomboloshi Enoki mbwaakaamba cakutaloonda bulatukuma amunshiku shino. Kweelana akucenjesha kwakwe Enoki, Yehova wakaleta Muyoba unene uyo wakanyonyoola bantu babiibi bamu ciindi cakwe Nowa. Shakacitika pa ciindi cilya shilatondesha bunyonyooshi bunene bweshi bukabeeko kunembo. (Mateyo 24:38, 39; 2 Pita 2:4-6) Bweenka mbocakalinga kale kale, Lesa ulilibambite pomwi abaanjelo bakwe basalalite bali shuulu ashuulu kuleta boomboloshi pa bantu boonse bacita shibiibi. Aboobo soonse tulayandika kubikila maano kukucenjesha uku Enoki nkwaakaamba alimwi akunoolwiitako bamwi. Bamumukwashi wesu alimwi ababyesu balakonsha kututalamuka. Alimwi cimwi ciindi inga twalinyumfwa kuba sweenka. Amunshiku shino, Yehova tabalekeleshiwo basebenshi bakwe bashomeka bweenka mbuli mbwaakacita kuli Enoki!
Kubelenga Baibo: (2 Joni 1-13)
NOVEMBER 18-24
BUBONI BUCANIKA MUMASWI AKWE LESA | CIYUBULULO 1-3
“Milimo Yako Ndiishi”
(Ciyubululo 1:20) Ano kwaamba pamakani abushishi akwe Lesa anyenyeenshi shosanwe ashobilo shili mulyaansa lyangu lyalulyo alimwi ashakubikaawo malampi sha golodi shili shosanwe ashobilo. Nyenyeenshi shosanwe ashobilo shileemikaninaako baanjelo bamumabungano osanwe aobilo, ashalo shakubikaawo malampi shosanwe ashobilo shileemikaninaako mabungano osanwe aobilo.
w12 10/15 14 pala. 8
Ino Mulatondesha Mushimu wa Buyani?
8 Kwaamba ayi tucikoonshe kuleya mushimu uyu, tulyeelete kwiibaluka ayi Baibo ilatondesha Yesu kaacite ‘nyenyeenshi 7 mulyaansa lyakwe lyalulyo.’ “Nyenyeenshi” ishi shileemikaninaako bamanene bananikitwe kwiilikaawo abamanene boonse bali mumabungano. Yesu ulacikonsha kweendelesha “nyenyeenshi” ishi shili mulyaansa lyakwe kweelana ambwaasuni. (Ciyu. 1:16, 20) Mukwiinga ngomutwi walibungano lya Bwineklistu, alicite nkusu pa bamanene boonse. Na umwi wabamanene utoyandika kululikwa, Uyo “ucite meenso aboneka anga ngumulilo utoonyaka” ulaakushinisha kwaamba ayi munene uyo walulikwa paciindi ceelete. (Ciyu. 1:14) Yesu kaatana kucitawo cilicoonse, tulyeelete kutolelela kutondesha bulemu kubamanene bakasalwa amushimu usalashi, mukwiinga Paulo wakaamba ayi: “Amunyumfwile bamatanjilili banu kwiinda mukukonkela milasho yabo. Lyoonse balalama buumi bwanu cakutookesha mukwiinga balaakusansulwita Lesa mbuli mbobakasebensa milimo yabo. Na kamubanyumfwila, balaakusebensa milimo yabo iyo cakusangalala. Sombi na kamutabanyumfwili, balaakusebensa cabuumba, aboobo ici teshi cikamucafweewo, sobwe.”—Bene Ebulu 13:17.
(Ciyubululo 2:1, 2) Munjelo walibungano lyaku Efeso umulembele ayi: Aya ngamakani aamba wooyo ucite nyenyeenshi shili shosanwe ashobilo mulyaansa lyalulyo alimwi weenda pakati ka shakubikaawo malampi sha golodi shili shosanwe ashobilo. 2 ‘Utokwaamba ayi, milimo yako ndiishi ambuli mboosebensa cankusu alimwi akutaboola pesule ceebo ca mapensho. Ndishi alimwi kwaamba ayi inga toolangibo bamucita shibi. Abo balibanda ayi mbatumwi, wakabeelesha akucana ayi mbabeshi.
w12 4/15 29 pala. 11
Yehova Ulatushitilisha Kwaamba ayi Tukapuluke
11 Shili anga nshiloto nshetucana mucapita 2 a 3 mulibuku lya Ciyubululo, shilatondesha Klistu mbuli Mwaami utoofwakashila mabungano 7 aku Esha Maina. Shili anga nshiloto ishi shilatondesha ayi Klistu wakabona shintu shancine shakalinga kucitika mumabungano aya. Mumabungano amwi wakacikonsha kwaamba ameena abaabo bakalingaamo. Wakalumba alimwi akupa kululika libungano lyomwi alyomwi. Ino ici cilatondesha nshi? Mukukumanishikwa kwa cili anga nciloto ici, mabungano 7 aleemikaninako Beneklistu bananikitwe kutalika mu 1914, alimwi nshaakalwiita mabungano 7 alya shilasebensa akumabungano oonse abantu bakwe Lesa munshiku shino. Aboobo cakutatonsha inga twaamba ayi, Yehova ngoototanjilila bantu bakwe kwiinda mu Mwanaakwe. Ino inga twacita buyani kwaamba ayi tufubileemo mubutanjilishi ubu?
w01 1/15 20-21 pala. 20
Amukonkele Butanjilishi bwa Libunga Lyakwe Yehova
20 Kwaamba ayi tukonkele butanjilishi bwa libunga lyakwe Yehova litooya panembo, tulyeelete kutaanguna kushiba kwaamba ayi Lesa wakasala Yesu Klistu kuba “mutwi wa libungano.” (Bene Efeso 5:22, 23) Cimwi ncotweelete kubikila maano nceeco ncetucana palilembo lya Isaya 55:4, lyaamba ayi: “Amubone! ndakamusala kuba kamboni kubantu boonse, ndakamulengesha kuba mutanjilili alimwi munene wabashilumamba kumishobo yoonse.” Ncakwiila Yesu alicishi kabotu bwakutanjilila. Alimwi mbelele shakwe ulishishi kabotu amibo yanshisho. Nceceeco ndyaakafwakashila mabungano 7 aku Esha Maina, ncakaambila mankanda osanwe ayi ‘ndiishi milimo yako.’ (Ciyubululo 2:2, 19; 3:1, 8, 15) Bweenka mbuli Baishi, Yesu alishi nshetuyandika. Kaatana kwaamba mupailo wacikoshanyo, Yesu wakaamba ayi: “Ceebo Ishiwanu ulishi shoonse nshemutacite kamutana kumusenga.”—Mateyo 6:8-13.
Kulangoola Buboni Bwakumushimu
(Ciyubululo 1:7) Amubone! Atoosa amakumbi, bantu boonse balaakumubona kubikaawo abaabo boonse bakamuyasa. Mishobo yoonse mucishi ca panshi ilaakulila ceebo ca nguwe. Ameni.
kr 226 pala. 10
Bwaami Bwakwe Lesa Bwanyonyoola Balwani Bakwe Lesa
10 Ciindi ca boomboloshi. Balwani boonse ba Bwaami bwakwe Lesa, balaakubona shitondesho shankusu isho sheshi shikabape kuba aboowa. Yesu wakaamba ayi: “Mpomunyaawo bantu balaakubona Mwanaamuntu keesa mumakumbi ankusu shiinji alimwi abulemu.” (Maako 13:26) Shitondesho shankusu ishi shilakutondesha ayi Yesu, wesa mukoombolosha. Mulubasu lumwi lwabushinshimi bweenka ubu bwaamba pa nshiku shakweelaako, Yesu wakeelikaawo makani aamwi asheshi shikacitike paciindi ico. Makani aya tulaacana mucikoshanyo ca mbelele ampongo. (Amubelenge Mateyo 25:31-33, 46.) Bantu bashomeka ku Bwaami bwakwe Lesa, balaakomboloshekwa ayi ‘nimbelele’ alimwi ‘balaakunyamuna akwiinuna mitwi yabo’ ceebo ‘kulubulwa kwabo kuli pafwiifwi.’ (Luka 21:28) Sombi balwani ba Bwaami balaakomboloshekwa ayi “nimpongo” alimwi “balaakulyuma pacaamba akulila,” mukwiinga balaakushiba ayi “batoonyonyoolwa kwamuyayaya.”—Mate. 24:30; Ciyu. 1:7.
(Ciyubululo 2:7) Uyo ucite matwi, aanyumfwe sheesho Mushimu Usalashi nshootokwaambila mabungano: uyo eshi akakome bubi, ndaakumusuminisha kulya kucisamu ca buumi cili muPaladaiso yakwe Lesa.
w09 1/15 31 pala. 1
Shiteente Shinene Shitocanika Mulibuku lya Ciyubululo—Lubasu I
2:7—Ino “Paladaiso yakwe Lesa nciinshi”? Mukwiinga maswi aya alaamba pa Beneklistu bananikitwe, paladaiso itokwaambwa palilembo ili, ilyeelete ilaamba paladaiso yakwiculu kwiine kukala Yehova Lesa. Beneklistu bananikitwe balaakupekwa coolwe cakulya “kucisamu cabuumi.” Balaakupekwa buumi butafwi.—1 Koli. 15:53.
Kubelenga Baibo: (Ciyubululo 1:1-11)
(Ciyubululo 1:1-11)
NOVEMBER 25–DECEMBER 1
BUBONI BUCANIKA MUMASWI AKWE LESA | CIYUBULULO 4-6
“Basankwa Bone Batantite pa Maaki”
(Ciyubululo 6:2) Ndindakalangilisha, ndakabona liaki lituba, kapatantite muntu wakalinga kucite buta alimwi wakapekwa amushini wa bwaami. Lyalo wakaya mukukoma akwaamba ayi amanishe kukoma.
wp17.3 4 pala. 3
Ino Basankwa Bone Batantite pa Maaki Mbaani?
Ino ngani utantite pa liaki lituba? Tulacana cikumbulo kumwiipusho uyu mu libuku lya Ciyubululo, ilyo lyaamba pawooyo utantite pa liaki ili ayi “Maswi akwe Lesa.” (Ciyubululo 19:11-13) Yesu Klistu ngo Maswi, mukwiinga ulasebensa mbuli shikwiimikaninaako Lesa. (Joni 1:1, 14) Kwiilikaawo, uleetwa ayi “Mwaami wa baami Mweendeleshi wa beendeleshi” alimwi uleetwa ayi “Ushomeka alimwi Wancine.” (Ciyubululo 19:16) Aboobo Yesu ngu Mwaami alimwi ulicite nkusu, sombi tasebenseshi nkusu nshaacite munshila iteelete. Sombi kuli miipusho njeshi tukumbule.
wp17.3 4 pala. 5
Ino Basankwa Bone Batantite pa Maaki Mbaani?
Ino ndilili basankwa bone ndyebakatanta pamaaki? Baibo ilatondesha ayi Yesu ngowakalinga wakutaanguna kutanta pa liaki, alimwi wakatanta pa liaki ndyaakapekwabo mushini wa bwaami. (Ciyubululo 6:2) Ino ndilili Yesu ndyaakaba Mwaami kwiculu? Teshi ciindi ndyaakabushikwabo akuya kwiculu. Baibo ilatondesha ayi wakalinga kweelete kulindila kwaamba ayi abe Mwaami. (Bene Ebulu 10:12, 13) Yesu wakalwiita bashikwiiya bakwe shitondesho sheshi shikabacaafwe kushiba ayi ciindi cakwe cakulindila kuba mwaami camana alimwi ciindi ca kwaamba ayi abe Mwaami cashikila. Yesu wakaamba ayi, na akatalike kweendelesha kwiculu, shintu pacishi shilaakubicilaako. Kulaakuba nkondo, nsala, alimwi amalwashi. (Mateyo 24:3, 7; Luka 21:10, 11) Inkondo ya pacishi coonse ndyeyakatalika mu 1914, cakashibikwa kwaamba ayi ici nceciindi Baibo ncoyakaambila limwi ayi ‘inshinku shakweelaako.’—2 Timoti 3:1-5
(Ciyubululo 6:4-6) Mpeeke mwakaswa liaki limwi, lyalo lyakalinga lisalala. Uyo wakalinga kutantiteewo wakapekwa nkusu shakubusha nkondo mucishi capanshi kwaamba ayi bantu bacayane. Lakwe wakapekwa mupeni unene. 5 Mwanaambelele ndyaakalamatula kalamatila watatu, ndakanyumfwa cilengwa cuumi catatu kacaamba ayi: “Kosa!” mpomunyaawo mwakaswa liaki limwi, lyalo lyakalinga kushiya. Wakalinga kutantiteewo wakalinga kucite cipimo mulyaansa lyakwe. 6 Pesule, ndakanyumfwa cakalinga kunyumfwika anga ndiswi, kuswa pakati kashilengwa shuumi shone isho lyakwaamba ayi: ‘Kilo yomwi ya witi ilaulwa dinali yomwi alimwi makilo otatwe a maila alaulwa dinali yomwi. Sombi mutanyonyooli mafuta amaolifi alimwi awaini.’
wp17.3 5 pala. 2
Ino Basankwa Bone Batantite pa Maaki Mbaani?
Utantite paliaki lisalala utokwiimikaninaako nkondo. Amubone kwaamba ayi shikutanta liaki ili wakakusha luumuno kuteshi mushishi shiniinibo sombi mushishi shoonse shili pacishi capanshi. Mu 1914, inkondo yapacishi coonse itana kucitikawo kale yakatalika. Kuswawaawo kwakacitika nkondo yabili iyo yakacaya bantu baanji kwiinda yakutaanguna. Lipooti imwi yakatondesha ayi bantu bakafwa ceebo ca nkondo kuswa mu 1914 balyeelete baleendilila 100 miliyoni! Alimwi baanji bakalicisa abuumbi.
wp17.3 5 mapa. 4-5
Ino Basankwa Bone Batantite pa Maaki Mbaani?
“Kosa! mpomunyaawo mwakaswa liaki limwi, lyalo lyakalinga kushiya. Wakalinga kutantiteewo wakalinga kucite cipimo mulyaansa lyakwe. Pesule, ndakanyumfwa cakalinga kunyumfwika anga ndiswi, kuswa pakati kashilengwa shuumi shone isho lyakwaamba ayi: ‘Kilo yomwi ya wiiti ilaulwa dinali yomwi alimwi makilo otatwe a maila alaulwa dinali yomwi. Sombi mutanyonyooli mafuta amaolifi alimwi awaini.’”—Ciyubululo 6:5, 6.
Utantite pa liaki lishiya utokwiimikaninaako nsala. Wakalinga kutantite pa liaki ili wakaleta nsala cakwaamba ayi kilo yomwi ya wiiti yakalinga kuulwa dinali yomwi, alimwi iyi njendalama muntu njaakalinga kupekwa pesule lyakusebensa bushiku boonse. (Mateyo 20:2) Alimwi mu ndalama yeenka iyi wakalinga kuulamobo makilo otatwe a maila. Ici cilatondesha ayi teshi cikabe cuubu kucana maali akuula cakulya ceenga cakwana mukwashi woonse. Bushinshimi bwakaamba sha mafuta amaolifi alimwi awaini mukwiinga ishi nsheshakalinga shakulya bantu nshebakalinga kucinkitemo manungo. Ici ncitondesho cakwaamba ayi munshiku shakweelaako, nabi shakulya isho bantu nshebacinkitemo manungo teshi cikabe cuubu kushicana.
(Ciyubululo 6:8) Ndindakalangilisha ndakabona liaki litubulukite. Uyo wakalinga kutantiteewo liina lyakwe wakalinga lufu. Lyalo musena wabafu wakamukonkela pesule. Balo bakapekwa nkusu shakucaya cipansha comwi ca shone ca bantu boonse pacishi capanshi. Nkusu shabo shakalinga shakucaya kwiinda munkondo, nsala, malwashi alimwi abanyama bakali bamuluundu.
wp17.3 5 mapa. 8-10
Ino Basankwa Bone Batantite pa Maaki Mbaani?
Utantinte pa liaki litubulukite aleemikaninaako lufu lusa ceebo ca malwashi alimwi ashintu shimwi. Ndipakeendabo myaaka iniini kuswa mu 1914, bulwashi bwiitwa ayi Spanish flu bwakacaya bantu baanji abuumbi. Bantu bashika cakuma 500 miliyoni bakaciswa bulwashi ubu, nkokwaamba ayi muntu omwi pa bantu botatwe abo bakalingaako paciindi ico!
Bulwashi ubu bwakalingabo matalikilo. Beshikulangoola makani bakaamba ayi mumyaaka yamuma 1900 bantu baanji abuumbi bakafwa abulwashi bwiitwa ayi smallpox. Kushika apacecino ciindi, bantu baanji balafwa ceebo ca bulwashi bwa AIDS, TB, alimwi amaleliya, nabi kwaamba ayi bantu batokweelesha cankusu kumana malwashi aya.
Bantu baanji balafwa ceebo ca nkondo, nsala, na malwashi amwi. Cuumbwe catolelela kubwesa bantu alimwi tacipi bulindilishi buliboonse.
Kulangoola Buboni Bwakumushimu
(Ciyubululo 4:4) Cuuna ca bwaami cakalinga kushingulukitwe ashuuna shimwi sha bwaami shili 24, apo pakalinga kushiite bamanene 24 kabafwete shisani shituba alimwi amishini ya golodi kumitwi.
(Ciyubululo 4:6) Kunembo lya cuuna ico kwakalinga cintu cakalinga kuboneka anga ndweenge lwakalinga kubeka anga ndibwe lya maanshi. Mumbasu shoonse shone sha cuuna ca bwaami ico, mwakalinga shilengwa shuumi shone isho shakalinga kuswitebo meenso mubili woonse, kunembo akwisule koonse.
re 76-77 pala. 8
Bulemu bwa Cuuna ca Bwaami Cakwe Yehova ca Kwiculu
8 Joni wakalinga kucishi ayi bapailishi bakalinga kusalwa kwaamba ayi banosebensela pa tente isalalite. Aboobo mpashi wakakankamana ndyakaamba pashintu nshaakabona, wakaamba ayi: “Cuuna ca bwaami cakalinga kushingulukitwe ashuuna shimwi sha bwaami shili 24, apo pakalinga kushiite bamanene 24 kabafwete shisani shituba alimwi amishini ya golodi kumitwi.” (Ciyubululo 4:4) Muciindi ca bapailishi, wakabona bamanene 24 kabashiite pashuuna sha bwaami alimwi kabafwete amishini mbuli baami. Ino bamanene aba mbaani? Mbananikitwe bamulibungano lya Bwineklistu, bakabushikwa akuya kwiculu kweelana a Yehova mbwaakabashomesha. Ino tulishi buyani?
re 80 pala. 19
Bulemu bwa Cuuna ca Bwaami Cakwe Yehova ca Kwiculu
19 Ino shilengwa ishi shileemikaninaako nshi? Cili anga nciloto mushinshimi Esekelo ncaakabona cilatucafwa kucana cikumbulo kumwiipusho uyu. Esekelo wakabona Yehova kashiite pacuuna ca bwaami peculu lya cikoci ca kwiculu, ico cakalinga kushingulukitwe ashilengwa shuumi isho shikoshenye asheesho nshaakaambawo Joni. (Esekelo 1:5-11, 22-28) Pesule, Esekelo wakabona cikoci cilya alimwi cicite cuuna ca bwaami kacishingulukitwe ashilengwa shuumi. Ano paciindi ici, Esekelo wakeeta shilengwa shuumi ayi bakelebu. (Esekelo 10:9-15) Aboobo shilengwa shuumi shone isho Joni nshaakabona shilyeelete shileemikaninaako bakelebu baanji bakwe Lesa, shilengwa shicite musena wapeculu mulibunga lyakwe lyakumushimu. Joni taakwe kukankamana kubona bakelebu kabashiite pafwiifwi abuumbi a Yehova, mukwiinga muciindi cakwisule patente isalalite, pakalinga bakelebu ba golodi bobilo peculu lya libokoshi lya cipangano, lyakalinga kwimikaninaako cuuna ca Bwaami cakwe Yehova. Yehova wakalinga kupa milawo bene Isilaeli, kuswa pakati ka bakelebu aba.—Kulonga 25:22; Kulumbaisha 80:1.
(Ciyubululo 5:5)
cf 36 mapa. 5-6
“Amubone! Inkalamu ya Mumukowa Wakwe Juda”
5 Inkalama ncinyama citaloondi. Sa mwakakumanyawo kale inkalamu inene isankwa? Na mwakaibonaawo, mpashi mwakalinga palaale, na mpashi mwakalinga kunsengwe lya waya mobasungila nkalamu. Alimwi nacibi boobo mulyeelete mwakaloonda. Na mwacilanga pameenso cinyama ici, inga mwabona kwaamba ayi taakuwo cinyama cimwi cili coonse ceenga caciloondesha. Baibo ilaamba ayi ‘inkalamu ilicite nkusu kwiinda shinyama shoonse alimwi teeloondi cili coonse.’ (Tushimpi 30:30) Uko nkokutaloonda kucite Klistu.
6 Atubandike nshila shotatwe Yesu mbwaakatondesha kutaloonda bweenka mbuli inkalamu: tutobandika mbwaakatondesha kutaloonda ndyaakalinga kushitilisha cancine, kucita shiluleme alimwi andyaakalinga kupikishikwa. Alimwi tutobandika ambweenga soonse twacikonsha kukonkela cakubonenaako cakwe Yesu cakutondesha kutaloonda nabi tube bantu bacite boowa kukashalilo nabi sobwe.
Kubelenga Baibo: (Ciyubululo 4:1-11)