Makani Akusebensesha amu Kabuku Kamabungano Abuumi Anciito
© 2025 Watch Tower Bible and Tract Society of Pennsylvania
MAY 5-11
BUBONI BUCANIKA MUMASWI AKWE LESA TUSHIMPI 12
Tulaakucana Cilambu Na Katusebensa Cankusu
w16.06 pe. 30 pala. 6
Mibo Yakwe Lesa Ilayandika Abuumbi Kwiinda Mabwe a Dayamondi
Basebenshi bakwe Yehova bamwi inga cabayumina abuumbi kucana maali akuula shiyandika mubuumi. Nacibi boobo, muciindi cakusebensesha nshila shuubu sombi shitabete kabotu, balasebensa cankusu. Kwiinda mukucita boobo, balatondesha ayi kushomeka alimwi amibo ibotu imwi yakwe Lesa, ilayandika abuumbi kwiinda shintu shakumubili.—Tus. 12:24; Efe. 4:28
w15 2/1 pe. 5 mapa. 4-6
Nsheenga Mwaciita Kwaamba ayi Munoosangalala Kusebensa Cankusu
Mwiipusho uyu wakweelaako ulayandika kuyeeyawo abuumbi, ceebo cakwaamba ayi tulacana lusangalalo mukusebensa cankusu kwesu na twabona mbokucafwa bamwi. Yesu wakaamba ayi: “Kupa kulasangalasha abuumbi kwiinda kutambula.” (Milimo 20:35, NWT) Kwiilika pabaabo bafubilaamo mukusebensa cankusu kwesu mbuli beshikuula shintu kuli ndiswe na mpashi abo bakatunjisha ncito, kuli abamwi bafubilaamo mbuli bamumukwashi abaabo bayandika lucafwo.
Bamumukwashi wesu. Na mutwi wa mukwashi kaasebensa cankusu kulangweta bamumukwashi wakwe shiyandika alabacafwa mumbasu shobilo. Cakutaanguna, alashinisha ayi bamumukwashi wakwe balicite nshebayandika lwakumubili mbuli shakulya, shakufwala, a mwakoona. Na wacita boobo alakumanisha mukuli Lesa ngwaakamupa “wakulama bamumukwashi wakwe.” (1 Timoti 5:8, NWT) Cabili, mutwi wa mukwashi usebensa cankusu alatondesha cakubonenaako cibotu abuumbi ku bamumukwashi wakwe. Ba Shane abo bakaambwaawo mumutwi wamana, bakaamba ayi: “Bata balatondesha cakubonenako cibotu abuumbi cakusebensa cankusu. Basebensa cakushomeka alimwi cankusu kwabuumi bwabo boonse, muncito yabo yabu kaapenta. Cakubonenaako cabo cancafwa kubona kuyandika kwa kusebensa cankusu akubona mbweenga kwacafwa bamwi.”
Abo bayandika lucafwo. Mutumwi Paulo wakayuminisha beneklistu ‘kusebensa cankusu . . . kwaamba ayi banoolicafwa akucafwako bapenshi.’ (Bene Efeso 4:28) Na twasebensa cankusu kulangoola nshetuyandika ashiyandika mumukwashi wesu, inga twacikonsha kucafwako bamwi batoyandika lucafwo. (Tushimpi 3:27) Aboobo kusebensa cankusu inga kwatucafwa kuba alusangalalo ceebo cakupako bamwi.
Buboni Bwakumushimu
ijwyp mutwi 95 mapa. 10-11
lno Ndimuyumu Buyani?
● Amubone mbwaabete kukomena mapensho anu. Amwiiye kupansaanya mapensho anene alimwi mapensho aniini. Baibo ilaamba ayi: “Na muluya wakalala ulafwambaana kutondesha bukali bwakwe, sombi ucenjete uloongulushabo na watukanwa.” (Tushimpi 12:16) Teshi mapensho oonse ngomweelete kubikilako bunene maano.
“Kucikolo, beshicikolonyinaangu bakalinga kutongooka apashintu shitaaku mboshibete. Alimwi na babyaabo pa intaneti babalwiita ayi nshebakalinga kucita shakalingabo kabotu bakalinga kukalalilaako. Ici cakapa kwaamba ayi bataamani kabotu mapensho ngobakalinga kwiindaamo.”—Joanne
MAY 12-18
BUBONI BUCANIKA MUMASWI AKWE LESA TUSHIMPI 13
Mutacenjeekwi a Lilampi lya Bamucita Shibi
it-2 pe. 196 mapa. 2-3
Lilampi
Mbolisebenseshekwa munshila yacikoshanyo. Cintu muntu ncaacinkamo manungo kumumunikila nshila yakwe inga cakoshanishikwa ku lilampi. Munshila yacikoshanyo maswi a tushimpi alaamba bupusano buli pamuntu ululeme amuntu utaluleme ayi: “Baluleme bali anga ndilampi linyakisha, sombi bamucita shibi bali anga ndilampi litooyanda kushimika.” (Tu 13:9) Lilampi lya bantu baluleme lilaya cinyakilakobo, sombi lilampi lya bantu bataluleme nabi kwaamba ayi inga lyaboneka kunyakisha akuboneka anga nshila yabo ili kabotu, Lesa alaakushinisha ayi lilampi lyabo likashimike akuba mumunshinshe kwaamba ayi bataluleme bakalisuntule. Shintu shamushobo uyu nsheshi shikacitikile muntu ushinganya baishi abanyina.—Tu 20:20.
Maswi akwaamba ayi ‘lilampi lyakwe lilaakushimishikwa’ inga asansulula ayi muntu uyu alaakunyonyoolwa. Maswi amwi acanika mu tushimpi alaamba ayi: “Ceebo lakwe taaku ncalangila munshiku shili kunembo alimwi lilampi lya buumi bwa mucita shibi lilaakushimikwa.”—Tu 24:20.
w12 7/15 pe. 12 pala. 3
Amusebensele Lesa upa Lwaanguluko
3 Na Satana wakacikonsha kuyunga bantu bobilo bamaninite alimwi abaanjelo baanji kukaka kweendeleshekwa a Lesa, nkokwaamba ayi aswebo inga watuyunga. Nshila Satana nshaasebensesha kuyunga bantu tashaalukiiwo. Aleelesha kutuyunga ayi tunoyeeya ayi milawo yakwe Lesa njiyumu, alimwi ayi ilatupa kutaba alusangalalo. (1 Joni 5:3) Kucanika abantu bayeeya munshila yamushobo uyu inga kwapa kwaamba ayi aswebo tutalike kuyeeya mbuli mbobayeeya. Nankashi ucite myaaka 24 uyo wakalinga kucita bufuule wakaamba ayi: “Kucanika a bantu bacite mibo ibiibi kwakankuma abuumbi ceebo cakuloonda kubona shintu munshila ipuseneeko ababyaanji.” Mpashi amwebo babyaanu bakamukakatishaawo kale kucita shintu shibiibi.
w04 7/15 pe. 31 pala. 6
“Muntu Ucenjete Ulataanguna Kuyeeya Katana Kucita Cintu Cili Coonse”
Muntu ucenjete alimwi ucita shintu cabusongo ulaakupekwa shoolwe. Solomoni wakaamba ayi: “Baluleme balalya mbuli mbobasuni, sombi bamucita shibi baleendabo ansala.” (Tushimpi 13:25) Yehova alishi kabotu nshetuyandika mubuumi bwesu mbuli mumukwashi wesu, mubushicibusa bwesu abamwi, muncito yesu yakushimikila, na ciindi ndyetutolulikwa. Alimwi na katukonkela shaamba Maswi akwe Lesa, tulaakunosangalala abuumbi mubuumi bwesu.
Buboni Bwakumushimu
‘Amukutike Maswi Abasongo’
15 Baibo ilatuyuminisha kusenga kululikwa. Lilembo lya Tushimpi 13:10 lilaamba ayi: ‘Busongo bulacanwa mubaabo basenga kubapandaako maano.’ Maswi aya ngancine! Liinji abo basenga kululikwa balaya panembo lwakumushimu, kwiinda baabo batasengi kubapandaako maano. Aboobo amucitewo comwi kwiinda mukusenga kululikwa.
16 Ino ndilili mpashi ndyeenga twasenga kululikwa kuswa kubashominyineesu? Amuyeeye pabukaalo ubu butokonkelaawo. (1) Nankashi wasenga shikushimikila ucishi kabotu kwiisha kwaamba ayi ayaakwe kuciiyo, lyalo pesule wasenga kumucafwa kushiba mbweenga waya panembo mukwiisha. (2) Nankashi utabete mucikwati alisuni kuula shakufwala, aboobo wasenga nankashi ushimpite lwakumushimu kumucafwa kushiba na shakufwala nshaasuni kuula shilibo kabotu. (3) Mukwesu ndyaapekwa lubasu lwakwaamba likani lya Baibo kwaciindi cakutaanguna, wasenga mukwesu ucishi kabotu kwaamba makani kwaamba ayi amukutike cakubikila maano, lyalo pesule amulwiiteko mbasu nshaeelete kusebenselawo kwaamba ayi aye panembo. Nabibo mukwesu waamba makani kwamyaaka iinji, inga wacita kabotu na wasenga bamakwesu bacishi kabotu kwaamba makani kwaamba ayi bamulwiiteko nshaeelete kusebenselawo lyalo akweelesha kukonkela nshobamulwiita.
17 Munshiku shitoosa kunembo, soonsebo tulaakululikwa kuswa mu Maswi akwe Lesa, mabuku aamba shamu Baibo na kuswa kuumwi. Na mukalulikwe, amukeebaluke nshotweeya mumutwi uyu. Amukatolelele kuliceesha, kubikila maano kumakani ngeshi bakamulwiite kuteshi nshila mbweshi bakamululike alimwi akukonkela kululikwa. Taakuwo ushalwa kaali musongo. Sombi Maswi akwe Lesa alatushomesha ayi ‘tulaakuba basongo’ na katusumina kululikwa.—Tus. 19:20.
MAY 19-25
BUBONI BUCANIKA MUMASWI AKWE LESA TUSHIMPI 14
Amuyeeyewo Cakubikila Maano Kamutana Kusala Shakucita Ndyekwacitika Mapensho Anene
Amutondeshe Kulumba Pacipo ca Buumi Lesa Ncaakatupa
10 Cimwi ciindi taakuwo nsheenga twaciita kwaamba ayi mapensho amwi atacitiki. Alimwi liinji ubu mbociba na kwacitika mapensho acitika cakuteengashila, kwapola malwashi alimwi andyekwabuka nkoondo. Na shintu shamushobo uyu shacitika, inga tweelesha kucita nsheenga twacikonsha kwaamba ayi tulishitilishe kwiinda mukukonkela milawo kuswa kumfulumeende itokwaamba pakuswaako kumusena uko na milawo imwi. (Loma. 13:1, 5-7) Inga cakonsheka kulishitilisha kumapensho amwi acitika cakuteengashila kwiinda mukukonkela milawo abutanjilishi kuswa kumfulumeende kwaamba ayi tube balibambite. Kucakubonenaako, inga twabikaako maanshi amwi ngeenga twasebensesha, shakulya shitafwambaani kunyonyooka ashintu shimwi shiyandika.
11 Ino nshiinshi nsheenga twaciita na kumusena nkotukala kwapola bulwashi buyambukila? Tulyeelete kukonkela butanjilishi kuswa kumfulumeende mbuli kusamba kumaansa, kutalamukana, kufwala shakucala kumulomo alimwi akulipatula kubantu. Na katucita shintu ishi, tulatondesha ayi tulalumba abuumbi pacipo ca buumi Lesa ncaakatupa.
12 Ndyekwacitika mapensho acitika cakuteengashila, cimwi ciindi tulanyumfwa makani akubeca kubeshicibusa besu, kubantu mbotubambenaabo na panyusi. Muciindi cakushoma makani ali oonse ngotwanyumfwa, tulyeelete kukutika kumakani ancine kuswa kumfulumeende alimwi aku bamadokota. (Amubelenge Tushimpi 14:15.) Bamu Likoto Litanjilila abamakwesu basebensa mumaofesi a misampi, balacita nsheenga bacikonsha kwaamba ayi bashibe makani ancine kabatana kutuma butanjilishi pamakani ambotweelete kubungana akushimikila. (Ebu. 13:17) Kwiinda mukukonkela butanjilishi mbotutambula, tulalishitilisha akushitilisha bamwi. Alimwi kucita boobo inga kwapa kwaamba ayi bamwi banokwaamba shibotu pa Bakamboni Bakwe Yehova.—1 Pit. 2:12.
Amube Bataloondi Bweenka Mbuli Sadoki
11 Ino inga twatondesha buyani kutaloonda bweenka mbuli Sadoki na buumi bwa bamakwesu abenankashi buli mumapensho lyalo twasengwa kwaamba ayi tubacaafwe? (1) Amukonkele butanjilishi. Ndyetuli mubukaalo bwa mushobo uyo, cilayandika abuumbi kwaamba ayi twatolelela kuba bacatene. Amukonkele butanjilishi butooswa ku ofesi yamusampi yamucishi momukala. (Ebu. 13:17) Ciindi aciindi bamanene balyeelete kunokwiinduluka mubutanjilishi bwaamba pa mbweenga twalibambila mapensho akuteengashila ansheenga twaciita na acitika. (1 Koli. 14:33, 40) (2) Amube bataloondi sombi bacenjete. (Tus. 22:3) Amuyeeyewo kamutana kucita shintu. Amucite nsheenga mwacikonsha kwaamba ayi mulishitilishe. (3) Amucinke manungo muli Yehova. Munookwiibaluka ayi Yehova alisunishishi kwaamba ayi mwebo abashominyinaanu mushitilishikwe. Inga wamucafwa kwaamba ayi mucikoonshe kucafwa bashominyinaanu kwakubula kulicana mulipenshi.
Buboni Bwakumushimu
Iff ciiyo 35 citeente 2
Sheenga Shatucafwa Kusala Kabotu
Baibo ilaamba ayi: “Muntu ucenjete ulataanguna kuyeeya ncaaelete kucita.” (Tushimpi 14:15) Nkokwaamba ayi katutana kusala shakucita, tulyeelete kutaanguna kuyeeyawo abuumbi pasheesho nshetusuni kusala. Ndyemutoyeeyawo pashintu nsheshi musale mulyeelete kuliipusha ayi: ‘Ino ni njiisho nshi yamu Baibo njeenga ndakonkela? Ino nkusala kuli kweenga kwancafwa kuba aluumuno? Ino nsheshi nsale shitoobakuma buyani bamwi? Ciyandika abuumbi, sa nsheshi nsale shilaakusangalasha Yehova?’—Dutolonomi 32:29.
Yehova ngoocite nkusu shakutulwiita cibotu a cibiibi. Kushiba kabotu milawo yakwe alimwi anjiisho shakwe akuba bashinishite kushikonkela, kulaakutucafwa kwiisha kabotu njeelacaamba yesu. Njeelacaamba njoitucafwa kushiba na cintu cimwi cili kabotu nabi sobwe. (Bene Loma 2:14, 15) Kwiisha kabotu njeelacaamba yesu kulaakutucafwa kusala kabotu shakucita.
MAY 26–JUNE 1
BUBONI BUCANIKA MUMASWI AKWE LESA TUSHIMPI 15
Amucafwe Bamwi Kuba Alusangalalo
w10 11/15 pe. 31 pala. 16
Tunanokweenda Mubululami!
16 Jobo wakalinga kutambula beensu. (Jobo 31:31, 32) Nabi kwaamba ayi katutacite shintu shiinji lwakumubili, tulyeelete ‘kutambula beensu camaansa obilo mumaanda esu.’ (Loma. 12:13) Inga twapako bamwi nabibo tuntu tuniini ntweenga katucite na katwiibaluka ayi “ncibotu kulya nshima ya bucisa abantu bakusuni, kwiinda kulya nshima anyama ya mafuta abantu bakupatite.” (Tus. 15:17) Kulita pomwi calusangalalo Abeneklistunyineesu nabibo cakulya ciniini, inga kwapa kwaamba ayi tube basangalete akuyumishikwa lwakumushimu.
w18.04 mape. 23-24 mapa. 16-18
Katuyuminishanya Bunene Bunene Pacecino Ciindi
16 Inga tacibi kabotu na twatalika kuyeeya ayi inga tatuyuminishi bamwi ceebo cakwaamba ayi tatubandiki bunene. Teshi lyoonse ndyeenga twayandika kucita shiinji kwaamba ayi tuyuminishe bamwi, mukwiinga nabibo kumwetamweta ndyetutokwaanshanya abamwi inga twabayuminisha. Na mwaboona ayi balo tabatomweta mweta mpashi inga caba ayi kuli lipenshi ndyobacite ndyeenga basuna kulwiitako bamwi. Aboobo na mwabakutika cakubikila maano ndyebatokwaamba inga mwabayuminisha.—Jemu. 1:19.
17 Mukwesu wacanike wa liina lya Henri, wakalinga kulinyumfwa cibiibi abuumbi ciindi bamumukwashi wakwe kwiilikaawo abaishi bakalinga banene mulibungano ndyebakacileka kusebensela Yehova. Mutanjilili walubasu wakayuminisha Henri, wakayaakwe nkobanwita kofi alimwi wakamuyuminisha ayi aambe mbwaakalinga kulinyumfwa kuswa panshi lya moyo. Pesule lyakubandikishanya amutanjilili walubasu, Henri wakesa mukushiba ayi inga wacafwabo bamumukwashi wakwe kuboolela mucancine na lakwe watolelela kushomeka kuli Yehova. Alimwi wakayuminishikwa abuumbi ndyaakabelenga Kulumbaisha 46; Sefaniya 3:17; a Maako 10:29, 30.
18 Shakacitikila ba Marthe a Henri shilatondesha patuba ayi inga twayuminisha mukwesu nabi nankashi utoyandika kuyuminishikwa. Mwaami Solomoni wakalemba ayi: “Ncintu cibotu kwaamba liswi lyeelete paciindi ceelete. Ciinso cisekaseka cilasangalasha kumoyo, aalo makani abotu alakalika moyo.” (Tus. 15:23, 30) Alimwi na muntu kaabelenga Njashi Yamulindilishi na makani acanika pa jw.org inga wayuminishikwa. Paulo wakaamba ayi kwiimbila pomwi inyimbo sha Bwaami inga kwatuyuminisha. Wakalemba ayi: “Amwiimbe nyimbo shakulumbaisha, shakulemeka Lesa alimwi anyiimbo shimwi sha Mushimu wakwe Lesa. Amwiimbile Lesa amyoyo yakulumba.”—Kolo. 3:16; Milimo 16:25.
Buboni Bwakumushimu
ijwbq mutwi 39 pala. 3
Sa Mwineklistu Inga Wasumina Kushilikwa?
2. Sa inga ndeepushako bamadokota bapusenepusene bacishi kabotu bwakushilika? Inga cabota abuumbi kubandika ‘abeshikupandako maano baanji,’ bunene bunene na mutoociswa bulwashi bunene.—Tushimpi 15:22
JUNE 2-8
BUBONI BUCANIKA MUMASWI AKWE LESA TUSHIMPI 16
Miipusho Yotatwe Yeenga Yamucafwa Kusala Kabotu
w14 1/15 mape. 19-20 mapa. 11-12
Amusale Kabotu Shakucita Ndyemucili Bacanike
11 Kusebensela Yehova nkweenga kwapa kwaamba ayi tube alusangalalo lwancinencine. (Tus. 16:20) Baluki, mulembi wakwe Jelemiya wakalinga waluba cancine ici. Paciindi cimwi wakalinga wacileka kusebensela Yehova calusangalalo. Yehova wakamwaambila ayi: “Sa utooliyandweeta shintu shinene abuumbi? Utashiyandoolibo ceebo ndaakuleta kunyonyoola pabantu boonse. Sombi webo teshi ukacaikwe kuli koonse nkweshi ukaye.” (Jele. 45:3, 5) lno mutoyeeya ayi ncishi cakalinga kweelete kupa Baluki kuba alusangalalo? Sa nkulilangweeta shintu shinene na nkupuluka ceebo cakuba musebenshi wakwe Lesa ushomeka Jelusalemu ndyeyakalinga kusa mukunyonyoolwa?—Jemu. 1:12
12 Mukwesu umwi ucana lusangalalo ceebo cakusebensela bamwi ngu Ramiro. Wakaamba ayi: “Ndakashalilwa mumukwashi mobabete bakandu alimwi twakalinga kukala mumushi wakalinga Mutulundu twa Andes. Aboobo munene wangu musankwa ndyaakandwiita ayi alaakundipilila kuya ku yunivesiti, cakalinga coolwe cinene abuumbi. Sombi paciindi ici kacili ndyendaswabo mukubombekwa mbuli womwi wa Bakamboni bakwe Yehova, alimwi kwakalinga painiya umwi wakalinga kusuni ayi nkayaakwe mukushimikila mutauni iniini. Ndakaya a painiya, lyalo dakeeya bwakucesa misusu alimwi ndakatalika kucesa bantu misusu kwaamba ayi noocana maali akusebensesha. Bantu baanji bakalinga kusuni kwiiya Baibo. Mukuya kwaciindi, ndakatalika kubungana a libungano lipya lyakalinga kusebensesha mushobo ngobaamba mutauni iyi. Peenda myaaka 10 ano kuswa ciindi ndyendakatalika bupainiya. Taakuwo incito imwi yeenga yaampa kuba alusangalalo mbuli yakucafwa bantu kwiiya Baibo mumushobo wabo.”
w13 9/15 pe. 17 mapa. 1-3
Sa Mwakaaluka?
NKULILO yesu alimwi amusena nkotukala shilakuma nshetucita. Nceceeco tulasuna kulya shakulya shimwi akufwala shakufwala shimwi ceebo cakwaamba ayi bantu bakumusena nkotukala nshebasuni.
2 Nacibi boobo, kuli shintu shiyandika abuumbi kwiinda pa shakulya ashakufwala nshetusala. Kucakubonenaako, ndyetutokula tuleeya kubona shintu shimwi ayi shililuleme alimwi shilibo kabotu na kubona shintu shimwi ayi nshibiibi alimwi tashibete kabotu. Bantu baanji balabona shintu ishi munshila shipusenepusene. Alimwi njeelacaamba yesu ilatupa kusalawo kucita shintu shimwi. Baibo ilaamba ayi “baswamashi bakunsengwe tabakwe kupekwa Milawo, sombi na bacita bwaamba Milawo palwabo beene, nkokwaamba ayi babonesha ayi balicite Milawo mumyoyo yabo.” (Loma. 2:14) Ano sa ici citosansulula ayi na takuuwo mulawo wakwe Lesa waamba mukululama pa shintu shimwi ingayi tulyeeletebo kunokonkela nshobakatwiisha bashali besu na shintu nshobacita bantu bakumusena nkotukala?
3 Kuli sheebo shobilo shiyandika abuumbi shipa kwaamba ayi Beneklistu batanocita boobo. Ceebo cakutaanguna, Baibo ilaamba ayi: “Kuli nshila bantu njebabona ayi ililuleme, sombi kumeelelesho ilatola kulufu.” (Tus. 16:25) Ceebo cakwaamba ayi tatumaninitewo inga tatucikonshi kulyeendelesha. (Tus. 28:26; Jele. 10:23) Ceebo cabili, Baibo ilaamba Satana ayi “ngulesa wa bweende bwashintu ubu.” Aboobo ngootanjilila bantu nshobacita, nkokwaamba ayi nshobeelete kubona ayi nshibotu nabi shibiibi. (2 Koli. 4:4, NWT; 1 Joni 5:19) Aboobo na tulisuni ayi Yehova atusuune akutupa shoolwe tulyeelete kukonkela maswi ali pa Bene Loma 12:2.—Amubelenge.
Buboni Bwakumushimu
Mutabecekwi ‘Abusongo Bwamucishi Ici’
13 Baibo ilaamba ayi: ‘Yehova alipatite muntu uli woonse ucite moyo wakulisumpula.’ (Tus. 16:5) Ino nceebonshi Yehova alipatite bantu balisumpula? Ceebo comwi ncakwaamba ayi bantu balisumpula mbantu balisuni bweenka mbuli Satana mbwaalisuni. Ano amuyeeye ceeci: Satana wakalinga kubona anga Yesu uyo Lesa ngwaakasebensesha kupanga shintu shoonse, inga wamufukamina akumulambila! (Mate. 4:8, 9; Kolo. 1:15, 16) Bantu beshikulinyumfwa ayi taakuwo ubeenditeewo, balatondesha patuba kwaamba ayi busongo bwamucishi mbuluya kuli Lesa.
JUNE 9-15
BUBONI BUCANIKA MUMASWI AKWE LESA TUSHIMPI 17
Amube Aluumuno Mucikwati Canu
g 9/14 pe. 11 pala. 2
Mbweenga Mwaleya Kuba Amfundilishi
Amulilangelange cakushomeka. Baibo ilaamba ayi bantu bamwi ‘mbakali’ alimwi ‘balicite kamoyo kaniini.’ (Tushimpi 29:22) Sa amwebo mbomubete? Amuliipushe ayi: ‘Sa ndimukali? Sa ndafwambaana kukalala?’ Sa ndakalala apatuntu tutaaku mbotubete? Baibo ilaamba ayi “uya cibandika cilubo ca mubye ulalengesha cibusa kumana.” (Tushimpi 17:9; Shikushimikila 7:9) Ici inga cacitika akubaabo bali mucikwati. Aboobo na mulakalala bwaangu inga cabota kulipusha ayi, ‘Sa inga taciboti kulicata na ngonjebeenaakwe wankalasha?’—Njiisho yamu Baibo: 1 Pita 4:8.
w08 5/1 pe. 10 pala. 6–pe. 11 pala. 1
Mbweenga Mwamana Mapensho
1. Amusale ciindi cakubandika pa lipenshi ndyemucite. “Shintu shoonse shicitika pacishi ca panshi shilicite ciindi ca nshisho, . . . Kuli ciindi cakukutumana aciindi cakwaamba.” (Shikushimikila 3:1, 7) Kweelana akupusana nkotwabona kumatalikilo, mapensho amwi inga apa kwaamba ayi bali mucikwati bakalashanye. Na camushobo uyu camucitikila, mulyeelete kucileka kubandikishanya akuumuna, ngomweebenaakwe kaatana kukalala abuumbi. Mucikwati canu inga tamubi mapensho anene na kamukonkela maswi amu Baibo akwaamba ayi: “Kubalamuna kwaambana kuli anga nkutulula bulyango mumukuti wa cishiba. Anu ncibotu kucilekabo kwaamba pacikani ico kacitana kuya kunembo.”—Tushimpi 17:14.
Nacibi boobo kuli “aciindi cakwaamba.” Mapensho ali anga ninsaku mumuunda, alakomena na tamutocitawo comwi kwaamba ayi amane. Aboobo na mwaba lipenshi mucikwati tamweelete kukalabo akuyeeya ayi lilaakumana lyeenka, sombi mulyeelete kucitawo comwi kwaamba ayi mulimanishe. Na kuli makani ngomutana kumanisha kubandika angomweebenaakwe, inga cabota kutondesha bulemu kwiinda mukusala ciindi cimwi ndyeenga mwabandika pa lipenshi ilyo. Kucita boobo inga kwamucafwa noonse mucikwati kukonkela maswi amu Baibo akwaamba ayi: “Tamweelete kukalala cakwipisha lisuba.” (Bene Efeso 4:26) Lyalo mulyeelete kushinisha ayi mwabandikishanya paciindi ncomwakapangana.
Buboni Bwakumushimu
Kuloonda Lesa Kulatucafwa
3 Ceebo cinene ceelete kutupa kushitilisha moyo wesu wacikoshanyo, ncakwaamba ayi Yehova alalanga langa moyo wesu. Ici cilaamba ayi Yehova Lesa alabona mbotubete mukati ka moyo kuteshibo mbotuboneka pansengwe. (Amubelenge Tushimpi 17:3, NWT.) Alaakutusuna na katukutumana kuyeeya pabusongo bwakwe bweenga bwatucafwa kwikala kwamuyayaya. (Joni 4:14) Kucita boobo kulaakutushitilisha ku mibo ibiibi abubeshi bwakwe Satana abantu babiibi ba mucishi cakwe. (1 Joni 5:18, 19) Na twayumya bushicibusa bwesu a Yehova, tulamusuna akunoomulemeka abuumbi. Ceebo cakwaamba ayi tatusuni kukalasha Ishiwesu, tulaakupata nabibo kuyeeya pacintu ceenga catupa kubisha. Na tweeleshekwa kucita cintu cibiibi, tulaakuliipusha ayi, ‘Ino nceebonshi inga ndacita kashanga kukalasha Yehova uyo wakantondesha lusuno abuumbi?’—1 Joni 4:9, 10.
JUNE 16-22
BUBONI BUCANIKA MUMASWI AKWE LESA TUSHIMPI 18
Amubayuminishe abo Batokwiinda Mumapensho Akuciswa Ciswa
Busongo Bwancinencine Butokwiita
17 Amutaangune kuyeeya kamutana kwaamba. Na tatuna kucenjela, shintu nshetwaamba inga shatuletela mapensho. Baibo ilaamba ayi: “Maswi aambwa cakutayeeya alayasa anga ngumupeeni, sombi mulaka wamusongo ulashilika.” (Tus. 12:18, NWT) Inga twatolelela kuba muluumuno na katuleya kufuya pashilubo sha bamwi. (Tus. 20:19) Na tulisuni kwaamba ayi shintu nshetwaamba shinooyuminisha bamwi muciindi cakubacisa, tulyeelete kunobelenga akukutumana kuyeeya pa Maswi akwe Lesa bushiku abushiku. (Luka 6:45) Kukutumana kuyeeya Baibo nshoyaamba kulaakutupa kwaamba shiyuminisha bamwi bweenka mbuli “kantupu ka busongo.”—Tus. 18:4.
mrt mutwi 19 kabokosi
Nsheenga Mwaciita Na Mwaciswa Bulwashi Mbomwatalinga Kulangila
Amube muntu ukutika cakubikila maano. Nshila ibotu abuumbi mbweenga mwacafwa shicibusa wanu nkwiinda mukumukutika cakubikila maano ndyaatokwaamba. Tamweelete kuyeeya ayi mulyeelete kukumbulaawo pashintu shili shoonse nsheenga waamba. Cimwi ciindi nabi kukutikabo inga kwacafwa. Amweeleshe kumunyumfwishisha lyalo akuleya kumuyeeyela shintu shitabete kabotu. Mutanoyeeya ayi mulicishi shicibusa wanu mbwaatolinyumfwa, bunene bunene na bulwashi mbwaatociswa tabushibikitwe kabotu.—Tushimpi 11:2.
Amwaambe maswi ayuminisha. Mpashi inga kamutacishi shakwaamba, sombi kwaambabo maswi nabibo aniini kutondesha ayi mulibubwene bukaalo mbwaabeteemo shicibusa wanu inga kwamuyuminisha kwiinda kuumunabo. Na kamutacishiwo maswi akwaamba, amweeleshe kwaambabo maswi aniini kuswa panshi lyamoyo, mbuli akwaamba ayi: “Nshicishiwo nsheenga ndaamba sombi ndisuni ayi mushibe ayi ndaamubikilako maano.” Amuleye kwaamba maswi akwaamba ayi: “Butoya cikomenenakobo” na ayi “Cabotaako ncakwaamba ayi teshi bulwashi bwa . . .”
Inga mwatondesha ayi mulamubikilako maano shicibusa wanu kwiinda mukushiba kabotu bulwashi mbwaatociswa. Na mwacita boobo alaakulumba ceebo cakweelesha cankusu kwanu kushiba bukaalo mbweenga kabeteemo alimwi nsheshi mukanokwaamba shilaakumuyuminisha. (Tushimpi 18:13) Nacibi boobo, tamweelete kubalwiita nshebeelete kucita na tabana kumusenga.
Amubacaafwe. Muciindi cakunoyeeyelabo ayi mulicishi nceenga mwabacafwa, amubeepushe nceenga mwabacitila. Sombi munokwiibaluka ayi, mpashi shicibusa wanu inga taambi ayi atoyandika lucafwo ceebo cakuloonda ayi inga waba mukuli kuli ndimwe. Na camushobo uyu cacitika, amweeleshe kucita nsheenga mwacikonsha mbuli kumuulilako shiyandika, kumucafwako kubotesha, na incito shimwi.—Bene Galatiya 6:2.
Mutabooleli mwisule. Cimwi ciindi mpashi shicibusa wanu inga wakaka kucita nshemwakapangana na kubandika andimwe ceebo cakwaamba ayi taatonyumfwa kabotu. Amukalike moyo akumunyumfwishisha. Amutolelele kumucafwa anshatoyandika.—Tushimpi 18:24.
wp23.1 pe. 14 pala. 3–pe. 15 pala. 1
Mbweenga Twacafwa Baabo Bacite Bulwashi Bwa Mumiyeeyo
“Amwaambe maswi ayuminisha.”—1 BENE TESALONIKA 5:14, NWT.
Shicibusa wanu inga kaalisukama abuumbi, na kulinyumfwa ayi taaku mbwabete. Inga mwamucafwa akumuyuminisha kwiinda mukumutondesha ayi mulamubikilako maano, nabi kwaamba ayi inga kamutacishiiwo shiine nsheenga mwaamba.
“Shicibusa ulasuna mubye ciindi coonse.”—TUSHIMPI 17:17.
Amumucaafwe paciindi ndyaatoyandika lucafwo. Muciindi cakuyeeyabo ayi mulicishi mbweenga mwamucafwa, amumwiipushe nsheenga mwaciita kwaamba ayi mumucaafwe. Na shicibusa wanu atokwaalilwa kumulwiita nshaatoyandika, amweeleshe kumulwiitako nsheenga mwacitilako pomwi anguwe mbuli kuya bweendanaako. Alimwi mpashi inga mwamucafwako kuula shintu, kubotesha, na kumucafwako ncito shimwi.—Bene Galatiya 6:2
‘Amubakalikile moyo.’—1 BENE TESALONIKA 5:14.
Mpashi teshi lyoonse shicibusa wanu ndyeenga kaasuni kubandika. Amumucaafwe kushiba ayi inga mwamukutika cakubikila maano na wasuna kubandika. Ceebo cakuciswa mpashi shicibusa wanu inga waamba na kucita shintu sheenga shamukalasha. Alimwi mpashi inga wakaka kucita nshemwakapangana ceebo cakwaamba ayi taatonyumfwa kabotu. Amumukalikile moyo akumunyumfwishisha ndyeemutomucafwa.—Tushimpi 18:24.
Buboni Bwakumushimu
Yehova Alaakumucafwa Ndyemuli Mubukaalo Buyumu
13 Nshotuyandika kucita kwaamba ayi Yehova atucaafwe. Amuleye kulitalamusha kubamwi. Na katutasuni kuba pomwi abamwi, inga twatalika kunooyeeyabo pashintu nshotusuni sobene, a pamapensho ngotutokwiindaamo. Kucita boobo inga kwapa kwaamba ayi twaalilwe kusala kabotu shakucita. (Tus. 18:1, NWT) Kwalo, cimwi ciindi soonse tulayandika kuba sweenka bunene bunene na twacitikilwa shintu shibiibi abuumbi. Nacibi boobo, na katulitalamusha kubamwi kwaciindi cilaamfu, mpashi inga twakaka lucafwo lwa bantu Yehova mbwaatosebensesha kwaamba ayi atucaafwe. Aboobo nabi kwaamba ayi inga camubeta ciyumu kusumina lucafwo kuswa kubamwi ndyemuli mubukaalo buyumu, amusumine lucafwo kuswa ku bamumukwashi, beshicibusa, abamanene. Munoobona ayi Yehova mbwaatosebensesha kwaamba ayi amucaafwe.—Tus. 17:17; Isa. 32:1, 2.
JUNE 23-29
BUBONI BUCANIKA MUMASWI AKWE LESA TUSHIMPI 19
Amube Shicibusa Wancinencine Kubamakwesu Abenankashi
w23.11 mape. 12-13 mapa. 16-17
Nsheenga Twaciita Kwaamba ayi Tutolelele Kusunana Abuumbi
16 Amubikile maano kumibo ibotu ya bamakwesu abenankashi, kuteshi kushintu nshebataciti kabotu. Amuyeeye pacakubonenaako ici. Amuyeeye kwaamba ayi mwabungana pomwi abamakwesu abenankashi. Mutosangalala ceebo ca nshemutoocita, lyalo pesule lyakubungana uko, mwakopwa cikope pomwi. Mukuyeeya kwaamba ayi mpashi cakutaanguna tacina kuswa kabotu, mwakopwa shikope ashimwi shobilo lyalo mwaba ashikope shotatwe. Sombi mwaboona ayi pacikope cimwi mukwesu umwi wabisha pameenso. Ino inga mwacita buyani acikope ico? Inga mwacikushaamo mukwiinga mulicite shikope shimwi shobilo boonse ndyebakamweta mweta, kwiilikaawo amukwesu uyo.
17 Inga twakoshanisha shikope kushintu nshetwiibaluka. Liinji tulebaluka shintu shibotu nshetwakacita ndyetwakalinga pomwi abamakwesu abenankashi. Ano amuyeeye ayi paciindi cimwi mukwesu nabi nankashi wakaamba na kucita cintu cimwi citabete kabotu. Sa tulyeelete kutolelela kuyeeya pancaakacita? Tulyeelete kweelesha kucileka kuyeeya pancaakacita, bweenka mbweenga twakushamo cikope citana kuswa kabotu. (Tus. 19:11; Efe. 4:32) Inga twacikonsha kulubaako cilubo ciniini nceenga mukwesu nabi nankashi watucitila, na katwiibaluka shintu shibotu nshetwakacitawo pomwi anguwe. Ishi nshoshintu nshotweelete kutolelela kunokwiibaluka.
Amusune Yehova Abamakwesu Abenankashi Abuumbi
10 Aswebo tuleelesha kucana nshila sha mbweenga twacafwa bamakwesu abenankashi. (Ebu. 13:16) Amuyeeye pacakubonenaako cakwe Nankashi Anna, ngotwakambaawo mumutwi wamana. Pesule lya mfula inene yacipuupu, lakwe abeebaye bakafwakashila mukwashi umwi wa Bakamboni. Lyalo bakacana ayi ciluli ca ŋanda ya mukwashi uyo cakanyonyooka. Aboobo shakufwala shoonse shamukwashi uyo shakashipila. Ba Anna bakaamba ayi: “Twakabwesa shakufwala shabo akuya mu kushiwaasha, kushiciisa, kushipeta lyalo akushiboosha. Tacakalinga ciyumu kuli ndiswe kucita sheeshi. Sombi ceebo cakwaamba ayi twakabacafwa, tulanyumfwana abuumbi ambabo kushika apacecino ciindi.” Lusuno ba Anna abeebaabo ndobakalinga kucite pa bamakwesu abenankashi, lwakabayuminisha kucafwako bamwi.—1 Joni 3:17, 18.
11 Na katucitila bamwi shibotu akubatondesha lusuno, inga babona ayi tutokweelesha kukonkela cakubonenaako cakwe Yehova. Alimwi balalumba abuumbi pashintu shibotu nshetubacitila. Nankashi Khanh ngotwalinga twambaawo, aleebaluka baabo bakamucafwa. Wakaamba ayi: “Ndabalumba abuumbi benankashi abo bakalinga kusebensa andime muncito yakushimikila. Bakalinga kusa mukumbwesa, kunjitaako ku cakulya ca malumwi, alimwi akumboosha kuŋanda. Pacecino ciindi ndabona ayi tacakalinga cuubu kucita boobo kuli mbabo. Sombi bakalinga kusangalete kucita boobo.” Kwalo teshi boonse beenga batulumba pashintu nshotubacitila. Kwaamba pabaabo bakalinga kubacafwa, ba Khanh bakaamba ayi: “Naakwiinga anebo ndakabacitilako shibotu ceebo ca shintu shoonse shibotu nshobakancitila. Sombi nshicishiiwo boonse nkobakala pacecino ciindi. Nacibi boobo, Yehova alicishi nkobakala alimwi ntopaila ayi akabape shoolwe pashintu shibotu nshobakancitila.” Ba Khanh bakaamba cancine. Yehova alabona nabi tuntu tuniini ntotucitila bamwi kwaamba ayi tubacaafwe. Alabona kulyaaba kwesu kucafwa bamwi ayi kulayandika abuumbi alimwi anga ni nkongole njeshi akabooshe.—Amubelenge Tushimpi 19:17.
Amutolelele Kutondeshanya Lusuno Lutamaani
6 Amuyeeye pamuntu umwi wasebensa pakampani imwi kwamyaaka iinji. Mpashi kwamyaaka yoonse njasebensa pakampani iyo, taana kubonanawo kale abene kampani. Mpashi inga katakondetwe amilawo imwi ya pakampani iyo. Alimwi inga kaataisuniwo kampani, sombi watolelela kusebensa kwaamba ayi anocana maali ngaayandika. Inga watolelela kusebensa pakampani iyo kushikila wacita litaya na kushikila akacane ncito imwi ibotu kumwi.
7 Sa mwaboona bupusano buli pakati ka lusuno lutamaani ambwaalinyumfwa muntu uyu usebensa pakampani? Bupusano buliiwo, nceeco cimupa kutolelela kusebensa pakampani iyo. Muntu uyu watolelela kusebensa pakampani iyi mukwiinga njencito mwaacanina maali. Sombi ino nceebonshi basebenshi bakwe Lesa baambwa mu Baibo bakalinga kutondesha lusuno lutamaani? Abo bakatondesha lusuno lutamaani bakacita boobo kuteshi kwaamba ayi bakalinga kweelete kucita boobo na kwaamba ayi batambule cintu cimwi, sombi myoyo yabo njeyakabapa kwaamba ayi batondeshe lusuno lutamaani. Amuyeeye pacakubonenaako cakwe Defedi. Moyo wakwe wakamupa kutondesha lusuno lutamaani kuli Jonasani shicibusa wakwe ngwaakalinga kusuni abuumbi, nabi kwaamba ayi baishi Jonasani bakalinga kusuni kucaya Defedi. Ndipakeenda myaaka iinji kuswa ciindi Jonasani ndyaakafwa, Defedi wakatolelela kutondesha lusuno lutamaani kuli Mefibosheti mwanaakwe Jonasani.—1 Samwe. 20:9, 14, 15; 2 Samwe. 4:4; 8:15; 9:1, 6, 7.
Buboni Bwakumushimu
it-1 pe. 515
Kululika, Shikululika
Yehova ngoocite busongo bwiinditeewo. Lakwe eenkabo ngwaatayandiki muntu wa kumululika. (Isa 40:13; Lo 11:34) Mwanaakwe ngo ‘Shikululika Mubotu’ alimwi ngootupa butanjilishi, ceebo cakwaamba ayi wakatambula kululika kuswa kuli baIshi akukukonkela alimwi alicite mushimu wakwe Lesa. (Isa 9:6; 11:2; Jo 5:19, 30) Ici citosansulula ayi kululika kucafwa, kulyeelete kweendelana akuyanda kwakwe Yehova. Aboobo kululika kuli koonse kuteendelani akuyanda kwakwe Yehova ingayi taaku mbokubete.—Tu 19:21; 21:30.
JUNE 30–JULY 6
BUBONI BUCANIKA MUMASWI AKWE LESA TUSHIMPI 20
Sheenga Shamucafwa Kusalawo Kabotu Cakucita Ndyemutoshibana Angomusuni Kweebanaakwe
Mbweenga Mwasalawo Kabotu Cakucita Ndyemutoshibana Angomusuni Kweebanaakwe
3 Nabi kwaamba ayi musankwa amwanakashi ndyebatoshibana kabotu inga basangalala, balyeelete kushiba ayi ici ncintu ciyandika ceenga capa kwaamba ayi basalewo kweebana. Pabushiku bwa bwiinga, musankwa amwanakashi balashomesha cakulumbila kuli Yehova ayi balakutolelela kutondeshanya lusuno akupana bulemu mubuumi bwabo boonse. Kamutana kushomesha cakulumbila, mulyeelete kuyeeyawo cakubikila maano. (Amubelenge Tushimpi 20:25.) Ubu mbocibete akushomesha cakulumbila kwakuba mucikwati. Musankwa amwanakashi ndyebatoshibana kabotu balaba acoolwe cakusalawo kabotu cakucita. Cimwi ciindi inga basalawo ayi beebane nabi kusalawo kumana bushicibusa bwabo. Na basalawo kumana bushicibusa bwabo tacisansululi ayi kuli shimwi nshebatana kucita kabotu. Sombi cilasansulula ayi kushibana kabotu kwabacafwa kusalawo kabotu cakucita.
4 Bantu bobilo batabete mucikwati balyeelete kunokwiibaluka ayi luyaando lwabo lwa kushibana kabotu nkushiba na inga beebana. Na bantu batabete mucikwati kababona makani aya munshila yeelete, teshi bakatalike kushibana amuntu ngobatasuni kweebanaakwe. Nacibi boobo, teshibo bantu batabete mucikwati beelete kunoobona makani aya munshila yeelete. Soonse mbotweelete kunoabona. Kucakubonenaako, bamwi balayeeya ayi na musankwa amwanakashi batalika kushibana kabotu, balyeelete kweebana. Ino kuyeeya boobo kulabakuma buyani Beneklistu batabete mucikwati? Nankashi uteebetwe waliina lya Melissa ukala ku United States, wakaamba ayi: “Na mukwesu anankashi batoshibana kabotu, Bakamboni bamwi balabalangila ayi balaakweebana. Aboobo bamwi batoshibana kabotu balaleya kumana bushicibusa bwabo nabi kwaamba ayi shintu tashitokweenda kabotu. Bamwi batabete mucikwati balaleya kusalawo kutalika kushibana kabotu amuntu umwi. Ici inga cabapa kulisukama abuumbi.”
Mbweenga Mwacana Wakweebanaakwe Uli Kabotu
8 Ino inga mwacita buyani kwaamba ayi mube acoolwe cakubona muntu ngomusuni kweebanaakwe mbwaabete? Ndyemuli kumabungano na kukubungana kumwi, inga mwabona bushicibusa bwakwe a Yehova mbobubete, mibo njaacite anshaacita. Ino alicite beshicibusa bali buyani, alimwi ino nshiinshi nshabandikaawo bunene? (Luka 6:45) Sa nshaasuni kucita shilikoshenye anshomusuni kucita? Inga mweepusha bamanene na Beneklistu bamwi bashimpite lwakumushimu bamulibungano mwaabete abo bamwishi kabotu. (Tus. 20:18) Inga mwabeepusha pa mpuwo amibo njaacite. (Lute 2:11) Ndyemutokweelesha kubona muntu ngomusuni kubaakwe mucikwati mbwaabete, amube bashinishite kuleya kumupa kulinyumfwa kutaanguluka. Amulemeke mbwaalinyumfwa akuleya kunoocanika pomwi amuntu uyo lyoonse na kweelesha kushiba shoonse shitoocitika mubuumi bwakwe.
Mbweenga Mwasalawo Kabotu Cakucita Ndyemutoshibana Angomusuni Kweebanaakwe
7 Ino inga mwacita buyani kwaamba ayi mushibe kabotu muntu uyo mbwaabete? Nshila yomwi ibotu nkwiinda mukubandika cakwaanguluka alimwi cakuteenda mweela, akumwiipusha miipusho lyalo akukutika cakubikila maano. (Tus. 20:5; Jemu. 1:19) Mpashi inga mwasalawo kucitila pomwi shintu sheenga shapa kwaamba ayi cimubete cuubu kubandikishanya mbuli kulita pomwi, kuya cifwakasha kumusena kucanika bantu baanji akushimikila pomwi. Alimwi inga mwashibana kabotu na kamucana ciindi cakuba pomwi abeshicibusa banu abamumukwashi. Kwiilikaawo, amubike bubaambo bwakucitila pomwi shintu sheenga shamucafwa kushiba muntu uyo mbwacita shintu mubukaalo bupusenepusene alimwi andyaali pabantu bapusenepusene. Amunyumfwe ba Aschwin bakala ku Netherlands, nshobakeelesha kucita. Bakaamba paciindi ndyebakalinga kushibana aba Alicia ayi: “Twakalinga kuyeeya nsheenga twaciita sheenga shatucafwa kushibana kabotu. Liinji twakalinga kucitabo shintu shiniini niini mbuli kuteleka shakulya pomwi na kusebensako ncito imwi pomwi. Ndyetwakalinga kucita shintu ishi twakalinga kushiba mibo umwi njacite ashintu nshataciti kabotu.”
8 Alimwi inga mwashibana kabotu na kamwiiya pomwi makani amu Baibo. Na mukeebane, mulaakuyandika kunoocana ciindi cakucita kulambila kwamukwashi, kwaamba ayi Lesa akanoomucafwa mucikwati canu. (Shiku. 4:12) Aboobo mpashi inga kamucana ciindi cakunokwiiya pomwi ndyemutoshibana kabotu. Kwalo, abo basuni kweebana tabacina kuba mukwashi alimwi mukwesu taacina kuba mutwi wakwe nankashi. Nacibi boobo, na lyoonse kamwiiyila pomwi inga mwashiba bushicibusa bwanu a Yehova mbobubete. Ba Max aba Laysa beebene baku United States, bakaamba cibotu cimwi ncobakacana ceebo cakwiiyila pomwi. Ba Max bakaamba ayi: “Ndyetwakatalikabo kushibana kabotu, twakatalika kwiiya mabuku aamba pa kushibana kabotu, cikwati abuumi bwa mumukwashi. Kwiiya mabuku aya kwakatucafwa kwaanguluka kubandika pamakani amwi ayandika ayo mpashi naakwiinga akatuyumina kubandikaawo.”
Buboni Bwakumushimu
Amusebenseshe Shilengwa Kwiisha Bana Banu Pali Yehova
15 Cimwi ciindi, mpashi bashali inga cabayumina kucafwa bana babo kwaanguluka kubalwiita mapensho ngobatokwiindaamo. Na ubo mbocibete kuli ndimwe, mpashi inga mwayandika kucana nshila kwaamba ayi bana banu bamulwiite mapensho ngobatokwiindaamo. (Amubelenge Tushimpi 20:5.) Ncuubu ku bashali bamwi kucita boobo ndyebatosangalala kulangilisha shilengwa pomwi abana babo. Ino nceebonshi? Ceebo comwi ncakwaamba ayi takubi shiinji sheenga shapilinganya baana abashali. Mushali musankwa ukala ku Taiwan waliina lya Masahiko, wakaamba ceebo cimwi ndyaakaamba ayi: “Bana besu balaba baangulukite kubandika andiswe ndyetutooya bweenda mutulundu na mweela lya lweenge. Aboobo cilaba cuubu kubeepusha miipusho kwaamba ayi batulwiite mbobatoyeeya.” Ba Katya, mbotwalinga twaambawo bakaamba ayi: “Liinji na ndakotoka kucikolo, bama bakalinga kuntola kumusena ubotu. Na katuli kumusena uko, cakalinga cuubu kuli ndime kubalwita shacitika kucikolo na shintu shalinga shampa kulisukama.”