Ino Bakamboni Bakwe Yehova Balakubona Buyani Kulekana?
Tulakonkela Baibo nshoyaamba pamakani acikwati akulekana. Lesa ndyaakatalika cikwati, taakalinga kusuniiwo ayi musankwa amwanakashi banolekana. Baibo ilaamba ayi beebene inga balekanabo na womwi pakati kabo wacita bulale.—Mateyo 19:5, 6, 9.
Sa Bakamboni Bakwe Yehova balapa lucafwo kubeebene bacite lipenshi mucikwati cabo?
Ncakwiila, kwiinda munshila shiinji:
Mabuku. Liinji mumabuku esu mulacanika makani eenga acafwa bali mucikwati, nabi kubaabo babona ayi inga tacikonsheki kutolelela kuba mucikwati. Kucakubonenaako, amubone mutwi wamu Cisungu waamba ayi “Maintaining Commitment in Your Marriage,” awaamba ayi “Rebuilding Trust in a Marriage” alimwi awamu Chitonga waamba ayi “Mbomukonzya Kulekelela.”
Mabungano. Tulabandika Baibo nshoyaamba pa cikwati ndyetuli kukubungana kwamukati ka nsondo, kukubungana kwalubasu, alimwi a kukubungana kunene.
Bamanene. Bamanene mulibungano balacafwa beebene kusebensesha malembo mbuli Bene Efeso 5:22-25.
Sa bamanene balyeelete kusuminisha kulekana kwa Bakamboni Bakwe Yehova?
Sobwe. Nabi kwaamba ayi beebene basenga bamanene ayi babacafweko kumana lipenshi limwi, bamanene tabacite nkusu shakulwiita beebene abo nshobeelete kucita. (Bene Galatiya 6:5) Nacibi boobo, bamwi balasalawo kulekana kuteshi kwamu Malembo. Sombi na muntu wacita boobo, taangulukite kweeba na kweebwa alimwi.—1 Timoti 3:1, 5, 12.
Ino Bakamboni balakubona buyani kupansaana?
Baibo ilayuminisha bali mucikwati kutolelela kuba pomwi nabi beende mumapensho apusenepusene. (1 Bene Kolinto 7:10-16) Mapensho aanji inga amana na kabapaila kuswa panshi lya moyo kuli Yehova, kukonkela njiisho shamu Baibo, alimwi akunootondeshanya lusuno.—1 Bene Kolinto 13:4-8; Bene Galatiya 5:22.
Nacibi boobo, mubukaalo buyumu abuumbi mbuli butokonkelaawo, Beneklistu bamwi balasalawo kupansaana awooyo ngobeebenaakwe:
Kutalangweta mukwashi shiyandika mukashanga.—1 Timoti 5:8.
Kuumwa na kupenshekwa abuumbi.—Kulumbaisha 11:5.
Kucita sheenga shanyonyoola bushicibusa buli pakati ka wooyo ngwaeebenaakwe a Yehova. Kucakubonenaako, musankwa na mwanakashi uteshi Kamboni inga wakakatisha ngwaebeneakwe Kamboni kupwaya milawo yakwe Lesa. Aboobo inga wasalawo kupansaana anguwe kwaamba ayi ’anyumfwile Lesa, kuteshi bantu sobwe.’—Milimo 5:29.