MIIPUSHO BACANIKE NJOBEEPUSHA
Ino Inga Ndacita Buyani na Mubyaanji Wankalasha?
Nshomweelete kushiba
Soonse inga twakalasha babyesu. Ceebo cakwaamba ayi tatumaninite, shicibusa wanu nabi muntu ngomubona ayi mulanyumfwanaakwe abuumbi inga waamba nabi kucita shintu sheenga shamukalasha. Cancine ncakwaamba ayi amwebo tamumaninitewo. Aboobo sa tamuna kukalashawo kale bamwi?—Jemusi 3:2.
Intaneti inga yapa kwaamba ayi bamwi bamukalashe. Kucakubonenaako, wacanike waliina lya David wakaamba ayi: “Na uli pa intaneti lyalo wabona shikope mubyo nshakakopwa ndyaakalinga kukubungana kumwi, inga watalika kuyeeya ayi ino nceebonshi nebo tabakwe kunjitawo! Inga mwakalala akulinyumfwa cibiibi.”
Inga mwacikonsha kumana lipenshi ndyemucite.
Nsheenga mwaciita
Amulishibe kabotu. Baibo ilaamba ayi: “Utafwambaani kukalala mumoyo wako, ceebo bukali bulacanwa kubaluya.”—Shikushimikila 7:9.
“Cimwi ciindi, na peenda ciindi ndyeenga wesa mukushiba ayi nshowalinga wakalala taakuwo amboshibete.”—Alyssa.
Ncomweelete kuyeeyawo: Sa mulafwambaana kukalala? Sa kuli nsheenga mwaciita kwaamba ayi mutanokalala abuumbi pashintu babyanu nsheenga bacita?—Shikushimikila 7:21, 22.
Amuyeeye pabubotu mbweenga mwacaana na kamulekelela bamwi. Baibo ilaamba ayi: ‘Cilabota kusuula shilubo.’—Tushimpi 19:11.
“Cilayandika abuumbi kulekelela kuswa panshi lya moyo nabi kwaamba ayi mulicite ceebo ceenga capa kwaamba ayi mutongooke. Alimwi ici cilaamba ayi tamweelete kucita shintu nabi kwaamba maswi eenga apa kwaamba ayi muntu wakamukalasha eebaluke nshaakamucitila lyalo akulilekelela. Na mwalekelela mubyaanu, tamweelete kunokwiibaluka nshaakamucitila.”—Mallory
Ncomweelete kuyeeyawo: Sa nga makani anene abuumbi? Sa inga mwamulekelela kwaamba ayi mupange lumuuno?—Bene Kolose 3:13.
Na lyoonsebo kamubandika amubyaanu palipenshi lili lyoonse ndyeenga mwabaalyo, cilibo anga nkunoocalula kumulyaango ciindi aciindi kwaamba ayi muŋanda mutolungula kabotu munjile muuwo utontola
Amutondeshe ayi mulamubikilako maano mubyaanu. Baibo ilaamba ayi: ‘Munoobikila maano kushintu shicafwa bamwi kuteshibo kusheesho shicafwa ndimwe nweenka.’—Bene Filipi 2:4.
“Na beshicibusa kabasunene alimwi kabapaana bulemu, cilaba cuubu kufwambaana kumana mapensho. Mwakasebensa cankusu kwaamba ayi mupange bushicibusa, aboobo inga kamutasuni kwaamba ayi bushicibusa bumane.”—Nicole.
Ncomweelete kuyeeyawo: Sa mulabikila maano kumakani shicibusa wanu ngeenga waamba?—Bene Filipi 2:3.
Ncomweelete kushiba: Mulyeelete kushiba ayi na mukakule mulaakuyandika kunooshiba shakucita na bamwi bamukalasha. Mulyeelete kwiiya kunoocita boobo pacecino ciindi.