Ciiyo 7
Inga Tweeya Nshi Kushakacitika Kalekale?
Yehova teshi akasuminishe bamucita shibi kunyonyoola Paladaiso. Bashicibusa bakwe Lesa beenkabo mbeshi bakakalemo. Ino cilaakuba buyani ku beshi kucita shibiibi? Pa kwaamba ayi mushibe sheshi shikacitike, amunyumfwe shakacitika mu ciindi cakwe Nowa. Nowa wakalinga kukala pa cishi kalekale. Wakalinga muntu mubotu alimwi wakalinga kweelesha cankusu kucita kuyanda kwakwe Yehova. Ono bantu bamwi pa cishi bakalinga kucita shibiibi. Lyalo Yehova wakaambila Nowa ayi ulaakuleta muyoba kwaamba ayi ukanyoonyole bamucita shibi bonse. Wakaambila Nowa kuyaka bwaato kwaamba ayi lakwe a beshikamukowa bakapulukilemo na Muyoba ukese.—Matalikilo 6:9-18.
Nowa a beshikamukowa bakayaka bwaato. Nowa wakacenjesha bantu ayi kulaakusa Muyoba, ono tabana kumunyumfwila. Bakatolelela kunocita shibiibi. Bwaato ndi bwakamana, Nowa wakenjisha shinyama mu bwaato, lakwe a beshikamukowa abalo bakenjila. Lyalo Yehova wakaleta cipuupu cinene. Mfula yakaloka abuumbi pa nshiku 40 malumwi a mashiku. Maanshi akesula pa cishi coonse.—Matalikilo 7:7-12.
Bamucita shibi bakafwa, ono Nowa a beshikamukowa bakapuluka. Yehova wakabapulusha ku Muyoba a kubaboosha mu cishi mwaakakusha bamucita shibi. (Matalikilo 7:22, 23) Baibolo ilaamba ayi kunembo Yehova ulakunyonyoola bakaka kucita shiluleme. Baluleme teshi bakanyonyoolwe. Balaakukala mu Paladaiso pa cishi kwa muyayaya.—2 Pita 2:5, 6, 9.
Cino ciindi bantu balacita shibiibi. Mu cishi muli mapenshi anji. Yehova ulatuma Bakamboni bakwe muciindi amuciindi mu kucenjesha bantu, nacibi boobo bantu baanji tabasuni kunyumfwa makani akwe Yehova. Tabasuni kusandula mibo yabo. Tabasuni kushoma nshaamba Lesa ayi nshibotu nabi ayi nshibiibi. Nshiinshi sheshi shikacitike ku bantu bamushoboyo? Sa kulaakuba ciindi ndyeshi bakasanduke? Baanji teshi bakasandukewo. Ciindi cilaakusa ndyeshi bamucita shibi bakanyonyolwe, cakumaninina, teshi bakabe abuumi alimwi.—Kulumbaisha 92:7.
Cishi teshi cikanyonyoolwe; cilaakuba Paladaiso. Abo baba bashicibusa bakwe Lesa balaakukala muyayaya mu Paladaiso pa cishi.—Kulumbaisha 37:29.