Ciiyo 11
Amukake Bupailishi Bwa Bubeshi!
Sataana a mishimu ibiibi tabasuniwo ayi munosebensela Lesa. Na inga bacikonsha inga bayanda kusandula bantu bonse kuswa kuli Lesa. Ino inga bacita buyani ubo? Nshila yomwi njobasebensesha mbupailishi bwa bubeshi. (2 Bene Kolinto 11:13-15) Bupailishi na tabwiishi sha lushinisho shicanika mu Baibolo ninshi mbwabubeshi. Bupailishi bwa bubeshi buli anga ngamaali abubeshi—inga aboneka anga ngancinencine, ono taacite ncito. Inga amuletelabo mapenshi.
Bupailishi bwa bubeshi inga tabusangalashi Yehova, Lesa wa lushinisho. Yesu ndyaakalinga pa cishi, kwakalinga beshibupailishi bakalyusuni kumucaya. Bakalinga kuyeeya ayi bakalinga kupaila mu nshila iluleme. Bakaamba ayi: “Tulicitebo ishiwesu womwibo ndondoli, Lesa.” Ino Yesu wakasuminisha? Napaceyi! Wakabaambila ayi: “Mwebo muli kulubasu lwakwe ishiwanu Satana.” (Joni 8:41, 44) Cino ciindi bantu baanji balayeeya ayi balalambila Lesa, ono tabwishi ubo, balasebensela Sataana a mishimu yakwe ibiibi!—1 Bene Kolinto 10:20.
Mbuli cisamu cibolete mbocicata shisepo shibolete, bupailishi bwa bubeshi abwalo bulicite bantu bacita shibiibi. Mu cishi muliswite mapenshi mukwiinga bantu balacita shibiibi. Mu cishi muli bubi, kulwana, kwiipa, kulyatililana, kucayana a kukakatisha koonana. Baanji bacita sha mushobo uyo balicite nkobapaila, ono mu bupailishi mobabete tababacafwi kucita shibotu. Inga tabakwe babe bashicibusa bakwe Lesa sombi na bacileka kucita shibiibi.—Mateyo 7:17, 18.
Bupailishi bwa bubeshi buleisha bantu kupaila shibumbwabumbwa. Lesa ulaamba ayi mutanopaila shibumbwabumbwa. Lesa wakacita kabotu kukasha. Sa inga mwakondwa na muntu taambiwo andimwe ulaambabo a cikoshanyo canu nabi pikica? Sa uyo muntu inga waba shicibusa wanu wancinencine? Taawu, inga taabiwo. Yehova ulisuni kwaamba ayi bantu banokwaamba kuli nguwe, tabeelete kwaamba ku shibumbwabumbwa nabi cikoshanyo citacite buumi.—Kulonga 20:4, 5.
Bupailishi bwa bubeshi buleisha ayi cilibo kabotu kucayana na kuli nkondo. Yesu wakaamba ayi bashicibusa bakwe Lesa balaakunosunana. Tatucaayi bantu mbotusuni. (Joni 13:35) Kucaya bamucita shibi akwalo nkubiibi. Balwani bakwe Yesu ndibakesa mukumucata, taakwe kuleka bashikwiiya bakwe kulwana ambabo kwaamba ayi bamufune.—Mateyo 26:51, 52.
Bupailishi bwa bubeshi buleisha ayi bamucita shibi balaakunopenga mu mulilo. Nacibi boobo, Baibolo ileisha ayi bubi bulatola ku lufu. (Bene Loma 6:23) Yehova ngu Lesa wa lusuno. Sa Lesa ucite lusuno inga wapensha bantu mu mulilo kwa muyayaya? Taawu! Mu Paladaiso, mulaakubabo bupailishi bomwi, ubo Yehova mbwaasuminisha. (Ciyubululo 15:4) Bupailishi bonse bwiisha sha bubeshi shakwe Sataana bulaakuloba.