Ciiyo 10
Mbwenga Mwacana Bupailishi Bwa Lushinisho
Na mulisuni kuba bashicibusa bakwe Lesa mulyeelete kupaila kweelana anshayanda. Yesu wakaamba ayi abo beshikulambila ba Ta mulushinisho balaakubalambila kwelana a ‘lushinisho.’ (Joni 4:23, 24) Kulibo nshila yomwi ya lushinisho ya kulambila Lesa. (Bene Efeso 4:4-6) Bupailishi bwa lushinisho bulatola ku buumi butamaani, bupailishi bwa bubeshi bwalo bulatola mu kunyonyoolwa.—Mateyo 7:13, 14.
Bupailishi bwa lushinisho inga mwabushiba na mwabona bapailamo nshebacita. Mukwiinga Lesa ulacita shibotu, abo beshi kumulambila mu lushinisho balyeelete kucita shibotu. Bweenka mbuli cisamu cibotu ca mango mbocikonsha kucata mango ibotu, kupaila kwa lushinisho akwalo kulakoonsha kuba a bantu bacita shibotu.—Mateyo 7:15-20.
Bashicibusa bakwe Yehova balalemeka maningi Baibolo. Balishi ayi Baibolo yakaswa kuli Lesa. Balasuminisha nshoyaamba ayi shinobatangilila mu bukaalo, kululika shitaluleme alimwi ilabacafwa kwiiya shakwe Lesa. (2 Timoti 3:16) Baleelesha ca nkusu kucita nshebeisha.
Bashicibusa bakwe Yehova balisunene. Yesu wakatondesha lusuno ku bantu kwiinda mu kubeisha shakwe Lesa a kushilika bakalinga balwashi. Abo balambila mu lushinisho abalo balasuna bantu bamwi. Kukosha Yesu, tabasalululi ayi aba mbapenshi nabi ayi mbamushobo umwi. Yesu wakaamba ayi bantu balaakushiba bashikwiiya bakwe kwiinda mukusunana kwabo.—Joni 13:35.
Bashicibusa bakwe Lesa balalemeka liina lyakwe Lesa, Yehova. Sa muntu na wakaka kusebensesha liina lyanu, inga waba mubyaanu wancinencine? Taawu! Na muntu ngu mubyeesu, tulasebensesha liina lyakwe alimwi tulaamba shintu shibotu pali nguwe ku bantu bamwi. Aboobo basuni kwaamba ayi babe bashicibusa bakwe Lesa balyeelete kusebensesha liina lyakwe alimwi akunoolwita bantu bamwi pali nguwe. Yehova ulisuni ayi tunoocita boobo.—Mateyo 6:9; Bene Loma 10:13, 14.
Kukosha Yesu, bashicibusa bakwe Lesa baleisha bantu sha Bweene bwakwe Lesa. Bweene bwakwe Lesa mbweendeleshi bwa kwiculu bweshi bukasandule cishi kuba paladaiso. Bashicibusa bakwe Lesa balashimikila makani abotu aamba sha Bweene bwakwe Lesa ku bantu bamwi.—Mateyo 24:14.
Bakamboni bakwe Yehova balayandisha kuba bashicibusa bakwe Lesa. Balalemeka Baibolo alimwi balisunene. Alimwi balalemeka, a kusebensesha liina lyakwe Lesa a kwiisha bantu bamwi sha Bweene bwakwe Lesa. Cino ciindi Bakamboni bakwe Yehova mbobalambila mu lushinisho pa cishi.