CIIYO 10
Inga Mwashiba Buyani Bupailishi bwa Lushinisho?
1. Sa kulibo bupailishi bwa lushinisho bomwi?
“Amucenjele abalaluki babubeshi.”—MATEYO 7:15.
Yesu wakeisha bashikwiya bakwe bupailishi bomwi, bupailishi bwa lushinisho. Buli anga ni nshila itola ku buumi butamaani. Yesu wakaamba ayi: “Bantu baikonkela mbaniini.” (Mateyo 7:14) Lesa ulasumina bupailishi bukonkela shiswa mu Maswi akwe Baibo. Boonse balambila mu lushinisho balashoma lushomo lomwi.—Amubelenge Joni 4:23, 24; 14:6; Bene Efeso 4:4, 5.
2. Nshiinshi Yesu nshakaamba pa Bene Klistu babubeshi?
“Balaamba ayi Lesa balimwishi, sombi micito yabo ilakaka sheesho nshebaamba.”—TAITASI 1:16.
Yesu wakacenjesha ayi balaluki babeshi balakubisha buKlistu. Balalibonesha anga mbene Klistu balushinisho. Macalici abo alaboneka anga nga buKlistu. Ono bantu bamushobo uyo inga mwabashiba ayi teshi bene Klistu bancinencine. Ino inga mwabashiba buyani? Bupailishi bwa lushinisho bweenkabo mbobucite bene Klistu bancinencine bashibikwa kwiinda mu mibo yabo a nshobacita.—Amubelenge Mateyo 7:13-23.
3. Ino inga mwabashiba buyani bapaila mu lushinisho?
Amubone sha kushibilaako shosanwe:
Bapaila mu lushinisho balalemeka Baibo ayi nga Maswi akwe Lesa. Baleelesha cankusu kucita shintu kweelana amilawo icanika mu Baibo. Aboobo bupailishi bwa lushinisho bulishiyene a bupailishi bukonkela milawo ya bantu. (Mateyo 15:7-9) Bapaila mu lushinisho balacita nshobeisha bantu bamwi kucita.—Amubelenge Joni 17:17; 2 Timoti 3:16, 17.
Bashikwiiya bakwe Yesu balushinisho balalemeka liina lyakwe Lesa—Yehova. Yesu wakalemeka liina lyakwe Lesa kwiinda mu kwiisha bantu. Wakacafwa bantu kushiba Lesa alimwi wakabeisha kunopaila ayi liina lyakwe Lesa lilemekwe. (Mateyo 6:9) Sa nkomukalila, mbuli bupailishi bwiisha bantu liina lyakwe Lesa?—Amubelenge Joni 17:26; Bene Loma 10:13, 14.
Bene Klistu balushinisho balashimikila pa Bweene bwakwe Lesa. Lesa wakatuma Yesu mu kushimikila makani abotu a Bweene. Bweene bwakwe Lesa bwenkabo mbweshi bukamane mapenshi. Yesu wakatolelela kwaamba pa Bweene kushikila ndyaakafwa. (Luka 4:43; 8:1; 23:42, 43) Wakaamba ayi bashikwiiya bakwe balaakunoshimikila pa Bweene. Na muntu wesa mu kwaamba kuli ndimwe pa Bweene bwakwe Lesa, ino inga mwayeeya ayi ngwa mu bupailishi buli?—Amubelenge Mateyo 24:14.
Bashikwiiya bakwe Yesu tabeshi ba mu cishi cino cibiibi. Inga mwabashiba mukwiinga tabalibiki mu mapolitiki nabi shimwi sha kupikishanya mu cishi. (Joni 17:16; 18:36) Alimwi tabaciti milawo ibiibi ya mu cishi.—Amubelenge Jemusi 4:4.
Bene Klistu balushinisho balasunana abuumbi. Kwiinda mu Maswi akwe Lesa, baleeya kulemeka bantu bamishobo yoonse. Nacibi ayi bupailishi bwa bubeshi bulacafwilisha maningi nkondo, bapaila mulushinisho balo tabaciti boobo. (Mika 4:1-3) Sombi bene Klistu balushinisho balo balasebensesha ciindi cabo a nshobacite kucafwilisha a kuyuminisha bamwi.—Amubelenge Joni 13:34, 35; 1 Joni 4:20.
4. Sa mwabushiba bupailishi bwa lushinisho?
Mbuli bupailishi bwiisha shiswa mu Maswi akwe Lesa, bulemeka liina lyakwe Lesa, a kushimikila ayi Bweene bwakwe Lesa bweenkabo mbweshi bukamane mapenshi? Mbuli bupailishi butondesha lusuno a kutacafwilisha nkondo? Ino mutoyeeya ayi mbaani?—Amubelenge 1 Joni 3:10-12.