Ino Ncito Yesu Yakushimikila Sha Bwaami Ileendeleshekwa Buyani?

Ndyaakalinga pafwaafwi akufwa, Yesu wakaamba ayi: ‘Lyalo makani abotu aya aamba sha Bwaami bwa kwiculu, alaakushimikilwa mucishi coonse kwaamba ayi akabe mbobukamboni kubantu boonse, kuswawaawo mamanino alaakushika.’ (Mateyo 24:14) Ino ncito iyi yakalinga kusa mukukumanishikwa buyani? Kwiinda mukukonkela cakubonenaako cakwe Yesu ncakatushiila ndyaakalinga pacishi.—Luka 8:1.

Tulaya mumaanda abo. Yesu wakaiisha bashikwiiya bakwe kushimikila makani abotu kuŋanda aŋanda. (Mateyo 10:11-13; Milimo ya Batumwi 5:42; 20:20) Beneklistu bakutaanguna bakapekwa musena wakushimikilaako. (Mateyo 10:5, 6; 2 Bene Kolinto 10:13) Mbocibete amunshiku shino, libungano lili lyoonse lilicite musena wakushimikilaako. Ici cilatucafwa kushimikila bantu baanji kwaamba ayi tukumanishe mulawo wakwe Yesu “wakushimikila makani abotu kubantu.”—Milimo ya Batumwi 10:42.

Tulashimikila bantu kulikoonse nkobacanika. Cakubonenaako cimwi Yesu ncakatupa nkushimikila mumisena mwakalinga kucanika bantu baanji, mbuli kulubasu lwa Lweenge na kumikalo nkobakalinga kuteka maanshi. (Maako 4:1; Joni 4:5-15) Bweenka mbuli Yesu, aswebo tulashimikila makani amuBaibo kulikoonse kucanika bantu—munshila, mumisena ya makwebo na pafooni. Na twaba acoolwe tulashimikila akubantu mbotubambenaabo, mbotusebensaabo, mbotwiiyabo alimwi abeshikamukowa. Nshila ishi shapa coolwe bantu baanji pacishi coonse kwaamba ayi banyumfwe ‘makani abotu alupulusho.’—Kulumbaisha 96:2.

Sa kuliko muntu ngweenga mwasuna kulwiitaako makani abotu aBwaami bwakwe Lesa alimwi ansheshi bukacite? Amulwiiteeko bamwi makani abulindilishi, cakufwambaana!

• Ino ngamakani abotu ali ngotweelete kushimikila?

• Ino Bakamboni Bakwe Yehova balakonkela buyani cikoshanyo cakwe Yesu pamakani akushimikila?