Ino Incito Yakushimikila Makani Abotu Itoocitwa Buyani?

Conoonobo Yehova kwiinda mu Bwaami bwakwe alaakumana mapensho oonse bantu ngobeendaamo. Aya ngamakani abotu abuumbi, aboobo tulyeelete kulwiitako bamwi. Yesu wakalinga kusuni ayi bashikwiiya bakwe bashimikile makani aya kubantu boonse! (Mateyo 28:19, 20) Ino Bakamboni Bakwe Yehova balaukonkela buyani mulawo Yesu ngwakaamba?

1. Ino Mateyo 24:14 itookumanishikwa buyani munshiku shino?

Yesu wakaambila limwi ayi: “Makani abotu a Bwaami aya alaakushimikilwa mucishi coonse.” (Mateyo 24:14) Bakamboni Bakwe Yehova balikondetwe kwaabanamo lubasu muncito iyi iyandika. Tutoshimikila makani abotu nsengwe yoonse mumishobo iindilila 1,000! Incito inene abuumbi iyi ilayandika kusebensa cankusu alimwi akubika bubaambo bubotu. Inga tacikonsheki kwiikumanisha kwakubula lucafwo lwakwe Yehova.

2. Ino tulacita buyani kwaamba ayi tucikoonshe kushimikila bantu?

Tulashimikila kuli koonse nkweenga twacaana bantu. Bweenka mbuli Beneklistu bamuciindi ca batumwi, tulashimikila “kuŋanda aŋanda.” (Milimo 5:42) Kushimikila munshila iyi kulatucafwa kubandika abantu baanji mwaaka amwaaka. Mukwiinga teshi lyoonse bantu ndyebacanika pamaanda, tulashimikila akumisena kucanika bantu baanji. Lyoonse tuleelesha kucana coolwe cakushimikila bamwi pali Yehova akuyanda kwakwe.

3. Ino mbaani beelete kushimikila makani abotu?

Beneklistu bancine boonse balyeelete kushimikila bamwi makani abotu. Tulabikila maano abuumbi kumukuli wesu. Tuleelesha kucita shoonse nsheenga twacikonsha kwaamba ayi twaabanemo lubasu muncito yakushimikila mukwiinga tulishi kwaamba ayi inga yapulusha buumi bwa bantu. (Amubelenge 1 Timoti 4:16.) Tatupekwi maali muncito iyi, mukwiinga Baibo ilaamba ayi: ‘Mwakapekwabo, amwebo mukapebo.’ (Mateyo 10:7, 8) Teshi boonse basumina kukutika kumakani ngotushimikila. Nacibi boobo, tulatolelela kushimikila mukwiinga ndubasu lwakulambila kwesu alimwi kucita boobo kulasangalasha Yehova.

AMWIIYILEWO ASHIMWI

4. Tulasebensa cankusu kwaamba ayi tucikoonshe kushimikila bantu boonse

VIDYO: Kushimikila “Kulubasu lwa Kulaale kwa Cishi Capanshi” (7:33)

• Ino nshiinshi shimunyumfwisha kabotu pa Bakamboni Bakwe Yehova mbobasebensa cankusu muncito yakushimikila?

Amubelenge Mateyo 22:39 a Bene Loma 10:13-15, akubandika miipusho iyi:

• Ino ncito yesu yakushimikila ilatondesha buyani ayi tulabikila maano kubamwi?

• Ino Yehova alalinyumfwa buyani pabaabo bashimikila makani abotu?—Amubone vesi 15.

5. Tuli basebenshinyina bakwe Lesa

Kuli shicitika shiinji shitondesha kwaamba ayi Yehova ngototanjilila ncito yakushimikila. Kucakubonenaako, kucishi ca New Zealand mukwesu waliina lya Paul ndyaakalinga kushimikila bushiku bumwi malumwi kuŋanda aŋanda, wakacana mwanakashi umwi, uyo pabushiku bweenka ubu macuunsa wakapaila kuli Lesa kwiinda mukwaamba liina lyakwe Yehova. Wakasenga Yehova kwaamba ayi alisuni muntu umwi kumufwakashila. Mukwesu Paul wakaamba ayi: “Ndipakeendabo mawoola otatwe, ndakapola paŋanda ya mwanakashi uyu.”

Amubelenge 1 Bene Kolinto 3:9, akubandika mwiipusho uyu:

• Ino shicitika mbuli ceeci cakacitika ku New Zealand shilatondesha buyani ayi Yehova ngototanjilila ncito yakushimikila?

Amubelenge Milimo 1:8, akubandika mwiipusho uyu:

• Ino nceebonshi tulayandika lucafwo lwakwe Yehova kwaamba ayi tucikoonshe kukumanisha ncito yakushimikila?

Sa mulishi?

Nsondo ansondo kumabungano esu amukati kansondo, tuleeya mbweenga twashimikila kabotu. Na mwakacanikako kale kumabungano aya, ino mutoyeeya buyani pa lwiiyo ndotutambula?

6. Tulakonkela mulawo wakwe Lesa wakwaamba ayi tulyeelete kushimikila

Muciindi ca batumwi, beshikupikisha bakeelesha kukasha bashikwiiya bakwe Yesu kwaamba ayi bacileeke kushimikila. Beneklistu bakutaanguna ‘bakashitilisha makani abotu mumulawo.’ (Bene Filipi 1:7) Bakamboni Bakwe Yehova abalo mbobacita munshiku shino.a

VIDYO: Kushitilisha Makani Abotu Mumulawo (2:28)

Amubelenge Milimo 5:27-42, akubandika mwiipusho uyu:

• Ino nceebonshi teshi tukacileeke kushimikila?—Amubone mavesi 29, 38, a 39.

CITEENTE CINENE

Yesu wakalwiita bashikwiiya bakwe kushimikila makani abotu nsengwe yoonse. Yehova atoocafwa bantu bakwe kucita ncito iyi.

Kwiindulukaamo

• Ino makani abotu atooshimikilwa buyani nsengwe yoonse?

• Ino ncito yakushimikila ilatondesha buyani ayi tulisuni bamwi?

• Sa mutoobona ayi kwaabanamo lubasu muncito yakushimikila inga kwamupa kuba alusangalalo? Ino nceebonshi?

AMULANGWETEEWO ASHIMWI

Amubone Bakamboni Bakwe Yehova mbobashimikila mumisena mucanika bantu baanji.

Kushimikila Kulibetele Mumisena Mucanika Bantu Baanji ku Paris (5:11)

Ino Bakamboni Bakwe Yehova balacita buyani kwaamba ayi bacafwe baabo bakacica kushishi shinemishaabo?

Kwaabila Shakulya Shakumushimu Kubaabo Bakacica Kushishi Shinemishaabo (5:59)

Amunyumfwe umwi mbwatosansulula kusebensa ncito yakushimikila yaciindi coonse mbokwakamupa kuba usangalete.

Ndikondetwe Kwaamba ayi Ndakasala Ncito Iyi (6:29)

Amwiiye pamilandu njotwakawina mumakooti kwaamba ayi cibe cuubu kushimikila makani abotu.

“Beshikushimikila sha Bwaami Batola Mulandu Wabo ku Kooti” (Bwaami Bwakwe Lesa Butoolela!, mutwi 13)