Ino Betelo Nciinshi?

Betelo ndiina lya ciEbulu, lyaamba ayi “Ŋanda yakwe Lesa.” (Matalikilo 28:17, 19) Ndiina lyeelela maanda ngobasebensesha Bakamboni Bakwe Yehova mumisena ipusenepusene pacishi coonse, incito yakushimikila nkoyeendeleshekwa akucafwikwa. Likoto Litanjilila lilasebensela kumaofesi anene mu New York, ku U.S.A., alimwi lilabona ncito icitwa paBetelo mushishi shipusenepusene. Boonse basebensela pa Betelo baleetwa ayi, Bamukwashi wa Betelo. Balekala pomwi anga mbamukwashi, balalita pomwi, balasebensela pomwi akwiiya Baibo pomwi.—Kulumbaisha 133:1.

Ngumusena ulibetele mukwashi wa Betelo nkobasebensa cakulyaaba. Mumisena yoonse ya Betelo, mulacanika Beneklistu basankwa alimwi abanakashi bakalyaaba kucita kuyanda kwakwe Lesa alimwi anciito ya Bwaami kwaciindi coonse. (Mateyo 6:33) Taakuwo ufola maali na malipilo, nacibi boobo boonse balapekwa musena kwakoona, shakulya alimwi amaali aniini akulicafwilisha. Boonse bacanika paBetelo balicite ncito yakucita, bamwi balasebensela mumaofesi, mukicini na muŋanda yakulita. Bamwi balasebensela kumabuku, kubotesha mumaanda, kucapa shakufwala, kubotesha musena, na kucita ncito shimwibo.

Musena kucitwa ncito shicafwilisha ncito yakushimikila sha Bwaami. Nciito inene icitwa mumaanda a Betelo nkucafwa kwaamba ayi cancine camu Baibo cishike kubantu baanji. Buloshuwa iyi ncakubonenaako comwibo ca ncito icitwa ku Betelo. Yakalembwa kwiinda mukutanjililwa a Likoto Litanjilila. Yakatumwa mumisena ipusenepusene kutubunga twabamakwesu basansulula mucishi coonse kwiinda mukusebensesha makompyuta, lyalo yakapulintwa kusebensesha mashini ipulinta mabuku aanji paciindi ciniinibo, kuswawaawo yakatumwa kumabungano eendilila  115,000. Kwaamba ayi incito iyi icitwe kabotu, bamukwashi wa Betelo balacafwilisha muncito iyandika abuumbi yeelete kucitwa cakufwambaana—Kushimikila makani abotu.—Maako 13:10.

• Ino mbaani basebensela paBetelo, alimwi ino balacafwikwa buyani?

• Ino paBetelo palacitwa ncito nshi iyandika cakufwambaana?