Adamu a Efa Tabakwe Kunyumfwila Lesa

Bushiku bumwi Efa ndyaakalinga eenka, insoka yakabandika anguwe. Yakaamba ayi: “Sa ncakwiila Lesa wakamukasha kulya shisepo sha cisamu cili coonse mumuunda muno?” Efa wakakumbula ayi: ‘Inga twalya shisepo sha cisamu cili coonse mumuunda, sombi kukushakobo cisamu comwi. Na tukacite boobo, tulaakufwa.’ Lyalo nsoka yakaamba ayi: ‘Teshi mukafweewo sobwe. Na mukalye mulaakuba mbuli nguwe.’ Ano sa cakalinga cancine? Sobwe, ubu bwakalinga bubeshi. Sombi Efa wakashoma. Efa ndyaakabona cisamu ico mbocakalinga kuboneka kabotu, ashisepo mboshakalinga kuboneka kubota kulya, wakayapaako akulya akupako Adamu. Wakalinga kucishi ayi balaakufwa na bakabule kunyumfwila Lesa. Nacibi boobo, Adamu wakalya.

Pabushiku bweenka bulya, Yehova wakabandika a Adamu a Efa. Wakabeepusha ncebatakwe kumunyumfwila. Efa wakaamba ayi insoka njoyakalengesha, alakwe Adamu wakaamba ayi Efa ngowakalengesha. Yehova wakabakusha mumuunda wa Edeni ceebo cakwaamba ayi tabakwe kumunyumfwila. Lyalo Yehova wakabika baanjelo a naifi yakalinga kunyaka mulilo pakunjilila mumuunda kwaamba ayi batakabooleliimo.

Yehova wakaamba ayi alakwe uyo wakabeca Efa alaakwaanishikwa. Teshi nsoka iine yakabandika a Efa. Yehova taakwe kulenga nsoka shaamba. Munjelo mubiibi ngowakalengesha nsoka kwaamba ceebo cakwaamba ayi wakalinga kusuni kumubeca. Munjelo mubiibi uyu ngu Satana. Yehova alaakunyonyoola Satana kwaamba ayi atatoleleli kuyunga bantu mukucita shibiibi.