Bantu Bali 8 Bakapuluka Akunjila Mucishi Cipya

Nowa, mukwashi wakwe, alimwi ashinyama bakenjila mu bwaato. Yehova wakacalaako kumulyaango, lyalo mfula yakatalika. Yakaloka abuumbi cakwaamba ayi bwaato bwakatalika kuseela pamaanshi. Mukuya kwaciindi, cishi coonse cakasulabo maanshi. Bamucita shibiibi boonse batakalinga mu bwaato bakafwa. Sombi Nowa amukwashi wakwe bakapuluka. Yeeyabo mbobakalinyumfwa kabotu kwaamba ayi bakanyumfwila Yehova.

Imfula yakaloka abuumbi kwanshiku 40 mashiku amalumwi, lyalo yakacileka. Maanshi akatalika kuya buceya paniini paniini. Mukuya kwaciindi bwaato bwakekala patulundu. Sombi maanshi akalinga aanji pacishi coonse, aboobo Nowa amukwashi wakwe bakatola ciindi kuswa mu bwaato.

Maanshi akalinga kuya buyuma paniini paniini. Nowa amukwashi wakwe bakekala mu bwaato mwaaka womwi akwiindaawo. Lyalo Yehova wakabalwiita ayi inga baswa mu bwaato akunjila mucishi cakalinga anga ncipya. Bakakondwa abuumbi kwaamba ayi Yehova wakabapulusha, alimwi bakatondesha kulumba kwiinda mukubenga mulambu kuli nguwe.

Yehova wakakondwa pa mulambu uyu. Wakashomesha ayi teshi akanyonyoolewo shintu shoonse pacishi ku muyoba unene alimwi. Wakatondesha nkongolo yakutaanguna kwiculu, mbuli citondesho ca cishomesho cakwe. Sa wakaibonawo kale nkongolo?

Lyalo Yehova wakalwiita Nowa amukwashi wakwe kushala baana akususha cishi.