CIIYO 8
Abulaamu a Saala Bakanyumfwila Lesa
Ndabala ya Babelo yakalinga pafwiifwi a ndabala ya Ulu. Bantu baanji mundabala iyi tabakalinga kulambila Yehova, sombi bakalinga kulambila balesa baanji. Nacibi boobo, kwakalinga musankwa womwi mundabala iyi wakalinga kulambila Yehova eenkabo. Liina lyakwe wakalinga Abulaamu.
Yehova wakalwiita Abulaamu ayi: ‘Shiya ŋanda yako abeshikamukowa bako akuya kumusena nkweshi nkutondeshe.’ Lyalo Lesa wakamushomesha ayi: ‘Ndaakukupa bamulunyungu lwako baanji, alimwi ndaakucita shintu shiinji shibotu pacishi coonse ca panshi ceebo ca ndiwe.’
Abulaamu taakalinga kucishiiwo Yehova nkwakalinga kumutuma, sombi wakamushoma. Abulaamu, Saala mukaakwe, baishi ba Tela, a Loti mwicwa wakwe, bakalongela shintu akutalika lweendo lwabo.
Abulaamu wakalinga kucite myaaka 75 paciindi ndyebakashika kumusena Yehova ngwaakalinga kusuni ayi babone. Musena uyu wakalinga kwiitwa ayi cishi ca Kenani. Lesa wakabandika a Abulaamu akumushomesha ayi: ‘Musena woonse uyu ngootobona, ndaakuupa ku bana bako.’ Sombi Abulaamu a Saala bakalinga bacembela alimwi tabakalinga kucitewo mwaana. Aboobo ino Yehova wakalinga kusa mukukumanisha buyani cishomesho cakwe?
“Ndushomo lwakalengesha ayi Abulaamu anyumfwile Lesa ndyakalwiitwa kuya kucishi ico Lesa mwiine ncaakashomesha ayi ulaakumupa. Wakaswa mucishi cine mishaabo kaateshi ankwaakalinga kuya.”—Bene Ebulu 11:8