Lushomo Lwakwe Mbolwakeeleshekwa

Abulaamu wakeeisha Isaki mwanaakwe kusuna Yehova akushoma shishomesho shakwe Yehova shoonse. Ano Isaki ndyaakakwanisha myaaka pafwiifwi a 25, Yehova wakalwiita Abulaamu kucita cintu cimwi cakalinga ciyumu abuumbi. Ino ncintu nshi?

Lesa wakalwiita Abulaamu ayi: ‘Bwesa mwanaako musankwa eenkabo ngoocite, uyo ngoosuni abuumbi akuya mukumubenga mbuli mulambu pakalundu kucishi ca Moliya.’ Abulaamu taakalinga kucishiwo Yehova ncaakamulwitila kucita boobo. Nacibi boobo, wakanyumfwila.

Bushiku bwakakonkelaawo macuunsa cuunsa, Abulaamu wakabwesa Isaki abasebenshi bakwe bobilo akuya kucishi ca Moliya. Pesule lyakweenda nshiku shotatwe, bakatalika kubona tulundu palaamfu. Abulaamu wakalwiita basebenshi bakwe ayi balindile lakwe a Isaki ndyebatooya mukubenga mulambu. Abulaamu wakapa Isaki inkuni kwaamba ayi anyamune, lyalo lakwe wakabwesa naifi. Isaki wakeepusha baishi ayi: ‘Ino mulambu ngotutooya mukubenga uli kuli?’ Abulaamu wakakumbula ayi: ‘Mwanaangu, Yehova atootupa.’

Ndyebakashika pakalundu, bakayaka cipaililo. Lyalo Abulaamu wakaanga Isaki kumaansa akumyeendo akumubika pacipaililo.

Abulaamu ndyaakabwesabo naifi, munjelo wakwe Yehova wakoolobesha kuswa kwiculu ayi: ‘Abulaamu! Utamucayi mwanike! Mukwiinga ndashiiba ano kwaamba ayi ulicite lushomo muli Lesa ceebo walinga kulibambite kubenga mwanaako.’ Lyalo Abulaamu wakabona mbelele isankwa keecatitwe meeca mutusamu. Cakufwambaana wakamwaangulula Isaki akubenga mbelele muciindi cakubenga mwanaakwe.

Kuswabo bushiku ubu, Yehova wakatalika kwiita Abulaamu ayi shicibusa wakwe. Sa ulishi cakalengesha? Abulaamu wakalinga kucita shili shoonse Yehova nshaakalinga kusuni ayi acite, nabi kaatacishi kabotu Yehova ncaakamulwitila.

Yehova wakabooshawo alimwi kushomesha Abulaamu ayi: ‘Ndaakukupa shoolwe, alimwi ndaakukulengesha kuba abaana baanji.’ Kusansulula ayi bantu boonse bacita shibotu bakalinga kusa mukutambula shoolwe kwiinda mumukwashi wakwe Abulaamu.