Amwiibaluke Muka Loti

Loti wakalinga kukala a bayaama bakwe ba Abulaamu, mucishi ca Kenani. Mukuya kwaciindi, Abulaamu a Loti bakaba ashifubwa shiinji cakwaamba ayi musena wakaceya. Abulaamu wakaambila Loti ayi: ‘Inga tatutoleleli kukala pomwi. Inga wasalawo nkweenga wasuna kuya, anebo ntosalawo.’ Kwiinda mukucita boobo Abulaamu wakatondesha kutalisuna.

Loti wakabona musena ubotu abuumbi pafwiifwi andabala yakalinga kwiitwa ayi Sodoma. Musena uyu wakalinga kucite maanshi abuumbi a bwiisu bubotu. Aboobo wakasalawo kulongela kumusena uyu amukwashi wakwe.

Bantu bakalinga kukala mu Sodoma amusena wa Gomola uyo wakalinga pafwiifwi, bakalinga kucita shintu shibiibi. Bakalinga kucita shintu shibiibi abuumbi cakwaamba ayi Yehova wakasalawo kunyonyoola misena iyi. Sombi Lesa wakalinga kusuni kupulusha Loti amukwashi wakwe, aboobo wakatuma baanjelo bobilo kuya mukubacenjesha ayi: ‘Cakufwambaana amusweemo mumusena uno! Yehova atoosa mukuunyonyoola.’

Loti taakwe kuswaamo cakufwambaana. Wakatalika kuwayawaya. Aboobo baanjelo bakamucata kumaansa pomwi abana bakwe banakashi bobilo amukaakwe akubakusha mumusena uyu. Bakabalwiita ayi: ‘Amucice! Mutoofwa na mubule kuswaamo muno, alimwi muteeleshi kulanga kwisule. Na mulange kwisule mutoofwa!’

Ndyebakashika kumusena wiitwa ayi Sowa, Yehova wakalosha mulilo unene abuumbi akunyonyoola misena iyi. Muka Loti taakwe kunyumfwila Lesa aboobo wakalanga kwisule, lyalo wakaaluka akuba libwe lya sauti! Sombi Loti abana bakwe banakashi bakapuluka mukwiinga bakanyumfwila Yehova. Cilyeelete cakabacisa abuumbi kwaamba ayi muka Loti taakwe kunyumfwila. Sombi bakakondwa kwaamba ayi bakakonkela butanjilishi bwakwe Yehova.