Aana Wakasenga Kuba Amwaana Musankwa

Elikana wakalinga kweebete banakashi bobilo, Aana a Penina, sombi wakalinga kusuni bunene Aana. Penina lyoonse wakalinga kuseka Aana ceebo cakwaamba ayi taakalinga kucitewo mwaana, sombi lakwe wakalinga kucite baana baanji. Mwaaka amwaaka Elikana wakalinga kutola mukwashi wakwe ku tente yakulambililaamo ku Shilo. Bushiku bumwi ndyebakalinga ku tente isalalite, Elikana wakabona ayi Aana uyo ngwakalinga kusuni abuumbi atoolila. Wakamulwiita ayi: ‘Aana Cileke kulila. Uli mukaangu alimwi ndikusuni.’

Lyalo Aana wakaya mukupaila eenka. Wakalinga kulila ndyaakalinga kupaila kuli Yehova kwaamba ayi amucaafwe. Wakashomesha ayi: ‘Yehova, na mwaampa mwaana musankwa, ndashomesha ayi ndaakumupa kuli ndimwe kwa buumi bwakwe boonse.’

Mupailishi Munene Eli ndyaakabona Aana kaalila, wakayeeya ayi mpashi wakolwa. Aana wakakumbula ayi: ‘Sobwe, nshikoletweewo nkambo. Ndicite lipenshi linene ndyentopaililawo kuli Yehova.’ Eli wakashiba ayi taakwe kwaamba kabotu, aboobo wakalwiita Aana ayi: ‘Lesa aakupe ncewamusenga.’ Aana wakalinyumfwako kabotu lyalo akuya. Kapatana kwiinda a mwaaka, Aana wakaba a mwaana musankwa ngwaakatumba ayi Samwelo. Yeeyabo Aana mbwaakasangalala!

Aana taakwe kuluba ncaakashomesha Yehova. Aboobo ndyaakamuleshabo Samwelo, wakamutola kuya mukusebensela pa tente isalalite. Wakalwiita Eli ayi: ‘Uyu ngomwaana ngondakalinga kupaililaawo, aboobo ntoomupa kuli Yehova.’ Elikana a Aana bakalinga kufwakashila Samwelo mwaaka amwaaka akumutolela cakufwala cipya cifwiifwi maansa. Yehova wakapa Aana baana abamwi basankwa botatwe abanakashi bobilo.