Cishomesho Cakwe Jefuta

Bene Isilaeli bakacileka alimwi kulambila Yehova akutalika kupaila balesa bakubeca. Bene Amoni ndyebakalwana bene Isilaeli, balesa bakubeca abo tabakwe kubacafwa. Aboobo bakapenga kwa myaaka iinji. Lyalo bakalwiita Yehova ayi: ‘Twabiisha. Twasenga amutupulushe kubalwani besu.’ Aboobo bene Isilaeli bakapwayoola shibumbwabumbwa shabo akutalika alimwi kulambila Yehova. Yehova taakalinga kusuniiwo ayi banoopenga.

Bakasala musoja ucishi kabotu kulwana waliina lya Jefuta kutanjilila bene Isilaeli mukulwana bene Amoni. Jefuta wakalwiita Yehova ayi: ‘Na mukatucaafwe kukoma munkondo, ntoshomesha ayi na nkaboolele kuŋanda, uyo weshi akataangune kuswa muŋanda yangu ndaakumubenga kuli ndimwe.’ Yehova wakakutika mupailo wakwe Jefuta akumucafwa kukoma munkondo.

Jefuta ndyaakaswa ku nkondo, mwanaakwe mwanakashi ngowakataanguna kuswa muŋanda. Uyu ngomwaana eenkabo ngwaakalinga kucite. Wakaswa kaashana akulisha musebe. Ino Jefuta wakacita buyani? Wakeebaluka nshaakashomesha Lesa, lyalo wakaamba ayi: ‘Maawe omwanaangu! Wampeensha ceebo ndakashomesha cakulumbila kuli Yehova. Aboobo ndyeelete kukutuma kuya mukusebensela pa tente isalalite ku Shilo.’ Sombi mwanaakwe wakakumbula ayi: ‘Na mwakashomesha Yehova, amucite kweelana ambomwakashomesha. Ntoosengakobo munsuminishe kuya ababyaanji kutulundu kwa myeenshi yobilo. Lyalo ndaakuya.’ Mwanaakwe Jefuta wakasebensela pa tente isalalite kwa buumi bwakwe boonse. Mwaaka amwaaka, babye bakalinga kumufwakashila ku Shilo.