Yehova Mbwaakaamba a Samwelo

Eli mupailishi munene wakalinga kucite baana basankwa bobilo bakalinga kusebensa mbuli bapailishi pa tente isalalite. Meenaabo bakalinga Ofini a Fineyasi. Baana aba tabakalinga kukonkela milawo yakwe Yehova alimwi bakalinga kupensha bantu. Na bene Isilaeli baleta nyama ya kubenga kuli Yehova, Ofini a Fineyasi bakalinga kusalawo nyama ibotu. Nabi kwaamba ayi Eli wakanyumfwa nshobakalinga kucita bana bakwe, taakuwo ncaakalinga kucitawo. Sa Yehova wakabaleka kutolelela kucita boobo?

Nabi kwaamba ayi Samwelo wakalinga mwanike pali Ofini a Fineyasi, taakwe kukonkela cakubonenaako cabo. Yehova wakalinga kukondetwe pashintu Samwelo nshaakalinga kucita. Bushiku bumwi mashiku Samwelo ndyaakalinga kulete, wakanyumfwa muntu keeta liina lyakwe. Wakabuka akuya kuli Eli, akwaamba ayi: ‘Ndime ngomwalinga kwiita, ndesa!’ Sombi Eli wakakumbula ayi: ‘Nshikwe kukwiita. Boolelabo ukoone.’ Samwelo wakaboolela kuya mukoona. Lyalo wakanyumfwa liswi alimwi. Ndyaakanyumfwa liswi linkanda lyatatu, Eli wakeshiba ayi Yehova ngowakalinga kwiita Samwelo. Wakalwiita Samwelo ayi na eete alimwi, ulyeelete kukumbula ayi: ‘Amwaambe no Yehova. Ntoonyumfwa nemusebenshi wanu.’

Samwelo wakaboolela alimwi mukoona. Lyalo wakanyumfwa alimwi kabamwiita ayi: ‘Samwelol! Samwelo!’ Alakwe wakakumbula ayi: ‘Amwaambe no Yehova. Ntoonyumfwa nemusebenshi wanu.’ Yehova wakamulwiita ayi: ‘Lwiita Eli ayi ndaakumwaanisha pomwi amukwashi wakwe. Alicishi kwaamba ayi bana bakwe batoocita shintu shibiibi pa tente isalalite, sombi taakuwo ncaatoocitaawo.’ Bushiku bwakakonkelaawo macuunsa, Samwelo wakacalula milyaango ya tente isalalite bweenka mbwaakalinga kucita lyoonse. Wakaloonda kulwiita mupailishi munene isho Yehova nshaakamulwiita. Sombi Eli wakamwiita akumwiipusha ayi: ‘Omwanaangu, ino Yehova wakulwiita nshi? Utasisi.’ Aboobo Samwelo wakalwiita Eli shoonse Yehova nshaakaamba.

Yehova wakatolelela kucafwa Samwelo ndyaakalinga kukula. Bantu boonse kuli koonse mu Isilaeli bakeshiba ayi Yehova wakasala Samwelo kuba mushinshimi a moomboloshi.