Defedi a Saulo

Defedi ndyaakacaya Golyati, Mwaami Saulo wakamubika kuba munene wa likoto lya masoja akwe. Defedi wakakoma munkondo shiinji, alimwi ici cakapa kwaamba ayi ashibikwe abuumbi. Lyoonse na Defedi waswa kunkondo, banakashi bakalinga kumutambula kabashana akwiimba ayi: ‘Saulo wakacaya balwani baanji, sombi Defedi wakacaya baanji abuumbi kwiindaawo!’ Saulo wakanyumfwila Defedi munyono aboobo wakalinga kusuni kumucaya.

Defedi wakalinga kucishi kabotu kulisha kalumbu. Bushiku bumwi ndyaakalinga kulishila Saulo kalumbu, Saulo wakalinga kusuni kumucaya alisumo. Defedi wakacikonsha kuleya, lyalo lisumo lyakayasa mulubumbu. Kuswabo ciindi ici, Saulo wakeelesha mankanda aanji kucaya Defedi. Mukuya kwaciindi, Defedi wakaloboka akuya mukuyuba muluundu.

Saulo wakanyamuka a likoto lya masoja ali 3,000 kuya mukulangoola Defedi. Wakenjila mucimfwengo mweenka Defedi abasankwa bakwe mobakalinga kuyubite. Basankwa bakwe Defedi bakamutepetesha ayi: ‘Ici ncecoolwe cako cakucaya Saulo.’ Lyalo Defedi wakabendelela Saulo akutimbula cakufwala ncaakalinga kufwete. Sombi Saulo taakwe kushiba. Pesule lyakucita boobo, Defedi wakalinyumfwa cibiibi abuumbi kwaamba ayi taakwe kutondesha bulemu ku mwaami Yehova ngwaakasala. Wakakasha basankwa bakwe ayi batamucayi Saulo. Alimwi wakeeta Saulo akumushibisha ayi walinga kucite coolwe cakumucaya. Ano sa ishi shakacitika shakapa Saulo kucileka kulangoola Defedi kwaamba ayi amucaaye?

Sobwe. Saulo taakwe kucileka kulangoola Defedi kwaamba ayi amucaaye. Bushiku bumwi mashiku, Defedi a mwicwa wakwe Abishayi bakaya mutente mwakalinga kulete Saulo. Abina shikulindilila Saulo alakwe wakalinga kulete. Abishayi wakaamba ayi: ‘Ici ncoolwe cesu! Amuleke mucaaye.’ Defedi wakakumbula ayi: ‘Yehova ngweshi akoomboloshe Saulo. Atunyamunebo lisumo akankuli kakwe ka maanshi lyalo tunooya.’

Defedi wakaya mukwiimikana pa kalundu kakalinga pafwiifwi a tente yakwe Saulo. Lyalo wakoolobesha ayi: ‘Abina, ino nceebonshi tookwe kushitilisha mwaami wako? Ino kankuli ka maanshi alisumo lyakwe Saulo shili kuli?’ Saulo wakalishiba liswi lyakwe Defedi akwaamba ayi: ‘Nakwiinga wancaaya, sombi tookwe kucita boobo. Ndicishi ayi ndiwe weshi ukabe mwaami wa bene Isilaeli.’ Saulo wakaboolela kuŋanda yakwe ya bwaami. Sombi teshi boonse mumukwashi wakwe Saulo bakalinga kupatite Defedi.