Yesu Mbwaakasala Saulo

Saulo wakalinga mwine Loma, uyo wakashalilwa mu tauni yakalinga kwiitwa ayi Tasasi. Wakalinga Mufalisi ucishi kabotu Milawo ya baJuda alimwi upatite Beneklistu. Wakalinga kucata Beneklistu basankwa abanakashi mumaandaabo, akubabika mujeele. Alimwi wakalingaawo bantu bakalinga kukalalite ndyebakooma mabwe shikwiiya Sitifini, kushikila wafwa.

Sombi Saulo taakalinga kusuni kucatabo Beneklistu bakalinga mu Jelusalemu. Wakasenga mupailishi munene ayi amusuminishe kuya ku tauni ya Damasikasi kwaamba ayi akalangoole akucata Beneklistu. Saulo ndyaakashika pafwiifwi a tauni iyi, wakabona mumuni wakabeka abuumbi pali nguwe, lyalo wakawa. Wakanyumfwa liswi kuswa kwiculu lyakaamba ayi: ‘Saulo, ino utoompenshela nshi?’ Saulo wakeepusha ayi: ‘Ino ndimwe baani?’ Liswi ilyo lyakaamba ayi: ‘Ndime Yesu. Koya mu Damasikasi, lyalo ntookutondesha nshoweelete kucita.’ Peenkaapo, Saulo wakapofola, alimwi bakacita kumucatilila kwaamba ayi aye mutauni iyi.

Mu Damasikasi mwakalinga Mwineklistu ushomeka waliina lya Ananiyasi. Mucili anga nciloto Yesu wakalwiita Ananiyasi ayi: ‘Koya ku ŋanda yakwe Judasi ili munshila iitwa ayi Nshila Iluleme, akulangoola Saulo.’ Ananiyasi wakaamba ayi: ‘Nkambo, ndimushi musankwa ngomutokwaambawo! Atokwaanga bashikwiiya banu akubabika mujeele!’ Sombi Yesu wakaamba ayi: ‘Koya ukamuboone. Ndamusala kwaamba ayi akashimikile makani abotu mushishi shiinji.’

Aboobo Ananiyasi wakacana Saulo akumulwiita ayi: ‘Mukwaabo, Saulo, Yesu wantuma ayi nkucalule meenso.’ Peenkaapo Saulo wakatalika kubona alimwi. Wakeeya pali Yesu akuba shikwiiya wakwe. Pesule lyakubombekwa akuba Mwineklistu, Saulo wakatalika kushimikila pomwi a Beneklistunyina mumisena baJuda mobakalinga kupailila. Yeeyabo baJuda mbobakakankamana kubona Saulo kaashimikila pali Yesu. Bakaamba ayi: ‘Sa teshi ngomusankwa uyu wakalinga kucata akwaanga bashikwiiya bakwe Yesu?’

Saulo wakashimikila bantu bekala mu Damasikasi kwa myaaka yotatwe. BaJuda bakalinga kumupatite Saulo alimwi bakalinga kusuni kumucaya. Sombi bamakwesu bakashiba nshobakalinga kusuni kumucita aboobo bakamucafwa kuswaamo mu tauni iyi. Bakamubika mu Basiketi akumupusha pacibulyango ca lubumbu lwa tauni iyi.

Saulo ndyaakaya ku Jelusalemu, wakeelesha kuya mulikoto lyabamakwesu. Sombi bakamuloonda. Lyalo shikwiiya umwi wakalinga kucite nkumbu, waliina lya Banabasi, wakatola Saulo kubatumwi akubasansulwiita ayi Saulo wakaaluka cancinencine. Saulo wakatalika kusebensa cankusu kushimikila makani abotu pomwi abamulibungano lyaku Jelusalemu. Mukuya kwaciindi bakatalika kumwiita ayi Paulo.