Mwaami Wakutaanguna wa Bene Isilaeli

Yehova wakalinga kutanjilila bene Isilaeli kwiinda muboomboloshi, sombi bakalinga kusuni kutanjililwa a mwaami. Bakaambila Samwelo ayi: ‘Shishi shoonse shili pafwiifwi andiswe shilicite bamaami. Aswebo tulisuni mwaami.’ Samwelo taakwe kusekelaamo, aboobo wakapaila kuli Yehova. Yehova wakaamba ayi: ‘Bantu tabakwe kukaka ndiwe, sombi bakaka ndime. Ubalwiite ayi inga baba a mwaami sombi mwaami uyo alaakusuna shintu shiinji kuswa kuli mbabo.’ Nacibi boobo, bantu bakaamba ayi: ‘Tacicite mulandu. Swebo tulisunibo mwaami!’

Yehova wakalwiita Samwelo ayi musankwa waliina lya Saulo ngweshi abe mwaami wakutaanguna. Saulo ndyaakafwakashila Samwelo ku Lama, Samwelo wakamunanika kuba mwaami kwiinda mukumutila mafuta pamutwi.

Lyalo Samwelo wakeeta bene Isilaeli boonse kwaamba ayi abatondeshe mwaami wabo mupya. Sombi tabakwe kumucana Saulo. Sa ulishi cakalengesha? Wakalinga kuyubite pakati kashintu. Ndyebakamucana bakamubwesa akumwiimika pakati ka bantu. Saulo wakalinga mulaamfu kwiinda boonse bakalingaawo. Alimwi wakalinga mubotu ciwa. Samwelo wakaamba ayi: ‘Ngooyo Yehova ngwasala.’ Bantu boonse bakoolobesha ayi: ‘Mwaami kaabukila buumi!’

Mwaami Saulo ndyaakatalikabo kweendelesha wakalinga kukutika kuli Samwelo akunyumfwila Yehova. Sombi wakaaluka. Kucakubonenaako, mwaami taakalinga kweelete kubenga milambu. Pabushiku bumwi, Samwelo wakalwiita Saulo ayi amulindile, sombi Samwelo wakacelwa kusa. Aboobo Saulo wakabenga milambu. Ino Samwelo wakacita buyani? Wakalwiita Saulo ayi: ‘Tookwe kucita kabotu, wacita Yehova nshaakakukasha.’ Ano sa Saulo wakeeyawo pacilubo ncaakacita?

Paciindi cimwi Saulo ndyaakaya mukulwana bene Amaleki, Samwelo wakamulwiita ayi akacaye bene Amaleki boonse. Sombi Saulo wakasalawo kutacaya mwaami Agagi. Yehova wakalwiita Samwelo ayi: ‘Saulo wangalukila alimwi tatonyumfwilawo.’ Samwelo wakakalala abuumbi akulwiita Saulo ayi: ‘Yehova alaakusala mwaami umwi ceebo totomunyumfwila.’ Samwelo ndyaakalinga kusuni kunooya, Saulo wakamucata mucakufwala lyalo cakufwala cakakwamuka. Lyalo Samwelo wakaambila Saulo ayi: ‘Yehova wakunyaya bwaami.’ Yehova wakalinga kusa mukupa bwaami kumuntu umwi wakalinga kumusuni alimwi wakalinga kumunyumfwila.