Shakacitika Pakalundu ka Kamelo

Baami baanji bakalinga kweendelesha mikowa 10 ya bene Isilaeli bakalinga kucita shintu shibiibi. Sombi Aabu lakwe wakeendaawo. Wakeeba mwanakashi mubiibi abuumbi wakalinga kupaila lesa wakubeca Baali. Mwanakashi uyu wakalinga Jesebelo. Aabu a Jesebelo bakalengesha bene Isilaeli baanji kunopaila Baali alimwi bakacaya abashinshimi bakwe Yehova. Ino Yehova wakacita buyani? Wakatuma mushinshimi Elija kutola makani kuli Aabu.

Elija wakalwiita Aabu ayi kulaakuba cilanga mu Isilaeli ceebo ca shintu shibiibi nshaakalinga kucita. Aboobo taakuwo cishango cakamena kwa myaaka iindilila yotatwe alimwi kwakalinga nsala. Lyalo paciindi cimwi Yehova wakatuma Elija alimwi kuli Aabu. Aabu ndyaakabona Elija wakaamba ayi: ‘Webo ulicite lipenshi! Ndiwe walengesha shoonse ishi.’ Elija wakakumbula ayi: ‘Teshi ndime ndakaleta cilanga. Webo ndiwe wakalengesha ceebo cakulambila Baali. Lwiita bantu boonse abashinshimi bakwe Baali baye pa Kalundu ka Kamelo.’

Bantu ndyebakabungana pakalundu, Elija wakaamba ayi: ‘Musalewo comwi. Na Yehova ngo Lesa wancine, amukonkele nguwe. Na ngu Baali amumukonkele. Sunu tutoomubona Lesa wancine. Bashinshimi bakwe Baali bali 450 babambe mulambu akupaila kuli lesa wabo, anebo ntoobamba mulambu akupaila kuli Yehova. Lesa eshi atume mulilo akutenta mulambu ngo Lesa wancine.’ Bantu boonse bakasumina.

Bashinshimi bakwe Baali bakabamba mulambu wabo. Bakapaila bushiku boonse kuli lesa wabo kabaamba ayi: ‘Baali amutukumbule!’ Baali uyo taakalinga kukumbulawo, aboobo Elija wakatalika kubaseka. Wakaamba ayi: ‘Kamooloma pakupaila. Mpashi woona, kutoyandika wakumubusha.’ Bashinshimi bakwe Baali bakalinga kupailabo kushikila macolesha. Sombi Baali taakwe kukumbulawo.

Elija wakabwesa mulambu wakwe akuubika pacipaililo akutilaawo maanshi. Lyalo wakapaila ayi: ‘O Yehova, acishibikwe kwaamba ayi ndimwe Lesa wancine.’ Lyalo peenka apo, Yehova wakatuma mulilo kuswa kwiculu akutenta mulambu. Bantu bakoolobesha ayi: ‘Yehova ngo Lesa wancine!’ Elija wakaamba ayi: ‘Amubacaate bashinshimi bakwe Baali!’ Pabushiku bulya, bashinshimi bakwe Baali bali 450 bakacaikwa.

Ndyekwakaboneka kalikumbi kaniini peculu lya lweenge, Elija wakaambila Aabu ayi: ‘Kutoosa mfula inene. Fwambaana tanta cikoci unooya kuŋanda.’ Paciindi ico mwiculu mwakashinkabo makumbi ashiya mbi, muuwo wakatalika kupuupa alimwi mfuula yakatalika kupokomoka. Lyalo cilanga cakamana. Cakufwambaana Aabu wakatanta cikoci cakwe. Elija alakwe kwiinda mulucafwo lwakwe Yehova wakacica kwiinda acikoci cakwe Aabu! Ano sa uku kwakalinga nkumana kwa mapensho akwe Elija oonse? Amuleke tubone.