Yehova Mbwaakayuminisha Elija

Jesebelo ndyaakanyumfwa shakacitika ku bashinshimi bakwe Baali wakakalala abuumbi. Wakatuma bakuya mukulwiita Elija ayi: ‘Ciilo awebo ulaakufwa bweenka mbuli bashinshimi bakwe Baali.’ Elija wakaloonda abuumbi akucicila muluyanga. Wakapaila kuli Yehova ayi: ‘Yehova, ndalema abuumbi. Amuleke mfwebo.’ Mukwiinga wakalema, Elija wakanyumfwa tulo akoona mucimfule.

Munjelo wakesa mukumubusha akumwaambila ayi: ‘Buka ulye.’ Lyalo Elija wakabona shinkwa wakalinga pa mabwe alungula a maanshi mukaapu. Wakalya akunwa lyalo akoona alimwi. Munjelo wakamubusha alimwi akumwaambila ayi: ‘Lya, utoyandika nkusu kwaamba ayi ucikonshe kweenda.’ Aboobo Elija wakalya alimwi. Lyalo wakeenda nshiku 40 mashiku amalumwi, kuya mukushika ku Kalundu ka Olebu. Ndyaakashika Elija wakenjila mucimfwengo akoona. Sombi Yehova wakabandika anguwe. Wakamwiipusha ayi: ‘Ino utoocita nshi kuno Elija?’ Elija wakakumbula ayi: ‘Bene Isilaeli bapwaya cipangano ncemwakapanga ambabo. Bayakulula shipaililo shanu akucaya bashinshimi banu boonse. Ono anebo balisuni kuncaya.’

Yehova wakamulwiita ayi: ‘Koya ukeemikane pakalundu.’ Citaanshi, kwakesa muuwo ukali abuumbi. Lyalo inshi yakatalika kutenkaana alimwi kwakesa amulilo. Mukweelaako, Elija wakanyumfwa liswi lyakutepeta. Wakalifweka kumeenso akuya mukwiimikana pamulyango wa cimfwengo. Lyalo Yehova wakamwiipusha cakamupa kucica. Elija wakakumbula ayi: ‘Ndime ndacaalaawobo neenka.’ Sombi Yehova wakamulwiita ayi: ‘Toona kucaalabo weenka. Kuli bene Isilaeli bali 7,000 bacili kulubasu lwangu. Koya ukananike Elisha mbuli mushinshimi kwaamba ayi apyane ndiwe.’ Elija wakaya peenka apo akuya mukucita kweelana a Yehova mbwaakamulwiita. Sa utoobona ayi awebo Yehova inga wakucafwa na koocita nshaasuni ayi ucite? Ee, alaakukucafwa. Leka tubone cintu cimwi cakacitika ndyekwakalinga cilanga.