Mwaana wa Mukalubinje Mbwaakabushikwa

Ndyekwakalinga cilanga, Yehova wakaambila Elija ayi: ‘Koya ku Salefati. Mukalubinje alaakukupa shakulya.’ Elija ndyaakashika kuminjililo ya tauni iyi, wakabona mukalubinje mukandu kaatepa nkuni. Wakamusenga maanshi akunwa. Ndyaakalinga kuya mukuleta maanshi, Elija wakamwiita, akwaamba ayi: ‘Ntoosengaako a shinkwa.’ Sombi mukalubinje wakakumbula ayi: ‘Nshiciteewo shinkwa wakukupa. Ndicitebo tufulaulo atumafuta tuniini tukwanabo shakulya shangu amwanaangu.’ Elija wakalwiita mukalubinje ayi: ‘Yehova washomesha ayi na umpangile shinkwa, fulaulo amafuta ngoocite teshi shikamanewo.’

Aboobo mukalubinje wakaya mukupanga shinkwa akutolela mushinshimi wakwe Yehova. Bweenka Yehova mbwaakaamba, shakulya mukalubinje nshaakalinga kucite tashikwe kumanaawo paciindi ndyekwakalinga cilanga. Fulaulo amafuta akwe tashikwe kumanaawo.

Lyalo kwakacitika cintu cimwi cibiibi abuumbi. Mwaana musankwa wa mukalubinje wakaciswa akufwa. Mukalubinje wakasenga Elija kwaamba ayi amucaafwe. Elija wakabwesa mwaana uyo akuyaakwe mucipinda ca peculu muŋanda ya mukalubinje. Wakamooneka pabulo akupaila kuli Yehova ayi: ‘Yehova, ndasenga amubushe mwaana uyu.’ Sa ulishi ncocakabotela kwaamba ayi Yehova wakabusha mwaana uyu? Nceebo cakwaamba ayi paciindi cilya takwakalingaawo muntu Lesa ngwakabushawo kale. Alimwi mukalubinje uyu amwanaakwe tabakalinga bene Isilaeli.

Nacibo boobo, mwaana wakabuka akutalika kuyooya! Elija wakaambila mukalubinje ayi: ‘Amubone! Mwanaanu ngumuumi!’ Wakakondwa abuumbi akwaambila Elija ayi: ‘Ono ndashiiba ayi uli muntu wakwe Lesa, alimwi ayi Yehova alaambila muli ndiwe.’