Likoto lya Masoja Akwe Yehova

Benadadi mwaami wa bene Silya taakwe kucileka kulwana bene Isilaeli. Sombi mushinshimi Elisha lyoonse wakalinga kucenjesha mwaami wa bene Isilaeli, aboobo wakalinga kucikonsha kucica. Benadadi wakasalawo kucata Elisha. Wakeshiba ayi Elisha ali ku Dotani, aboobo wakatuma likoto lya masoja abene Silya kwaamba ayi bamucaate.

Bene Silya bakesa ku Dotani mashiku. Bushiku bwakakonkelaawo, musebenshi wakwe Elisha ndyaakaswa pansengwe macuunsa, wakabona likoto linene lya masoja kalishingulukite musena woonse. Wakaloonda akoolobesha ayi: ‘Elisha, ino tutoocita buyani?’ Elisha wakamukumbula ayi: ‘Bali kulubasu lwesu mbaanji kwiinda bali kulubasu lwabo.’ Paciindi ici, Yehova wakalengesha musebenshi wakwe Elisha kubona mahoosi aanji ashikoci sha mulilo shiinji kashishingulukite musena woonse.

Bene Silya ndyebakalinga kusuni kumucata, Elisha wakapaila ayi: ‘Yehova ndasenga, amupofoshe meenso abo.’ Lyalo peenka apo, tabakwe kushiba nkobakalinga kubete nabi kwaamba ayi bakalinga kubona. Elisha wakabalwiita ayi: ‘Kuno teshi nkokumusena nkomutooyandoola. Amunkonkele mutole kumusankwa ngomutooyandoola.’ Lyalo Elisha wakabatola ku Samaliya uko kwakalinga kukala mwaami wa bene Isilaeli.

Bene Silya ndyebakesa mukushiba kumusena nkobakalinga, bakabula acakucita. Mwaami wa bene Isilaeli wakeepusha Elisha ayi: ‘Sa mbacaaye?’ Sa Elisha wakasebensesha coolwe ici kuboosha cishole kubantu aba bakalinga kusuni kumucaya? Sobwe. Elisha wakaamba ayi: ‘Mutabacaayi. Amubapebo shakulya akubaleka babooleleemo.’ Aboobo mwaami wa bene Isilaeli wakababambila shakulya shiinji, pesule akubaleka baboolaamo.