Yehova Mbwaakamukalikila Moyo Jona

Bene Asilya bakalinga kukala mu Ninife bakalinga kucita shintu shibiibi abuumbi. Yehova wakatuma Jona mushinshimi wakwe, kuya mukucenjesha bantu baku Ninife ayi bacileeke kucita shibiibi. Sombi Jona wakaloboka akuya kumusena umwi. Wakatanta bwaato bwakalinga kuya ku Tashishi.

Bwaato ndyebwakalinga pa lweenge, kwakesa muuwo unene abuumbi pamaanshi alimwi abo bakalinga kweensha bwaato bakaloonda abuumbi. Bakapaila kuli balesa babo akwiipusha ayi: ‘Ino nceebonshi ishi shitoocitika?’ Lyalo Jona wakabalwiita ayi: ‘Ndime ndalengesha. Ndaloboka ncito Yehova njaakantuma. Amungwaale mu lweenge, lyalo muuwo utokalikana.’ Beshikweensha bwaato tabakalinga kusuniiwo kumuwaala, sombi Jona wakabakakatisha. Ndyebakamuwaala mulweenge, muuwo wakakalikana.

Jona wakalinga kuyeeya ayi atoofwa. Ndyaakalinga kuya bupila, wakapaila kuli Yehova. Lyalo Yehova wakatuma ciswi cinene cakamumina, sombi taakwe kufwa. Kaali mumala mwa ciswi, Jona wakapaila ayi: ‘Ntoshomesha ayi lyoonse ndaakunomunyumfwila.’ Yehova wakashitilisha Jona mumala mwa ciswi kwanshiku shotatwe, lyalo ciswi cakamushipila kwitala.

Sa ubu Yehova mbwaakapulusha Jona, cakalinga kusansulula ayi taakalinga kweelete kuyaako ku Ninife? Sobwe. Yehova wakalwiita Jona alimwi ayi anooya. Paciindi ici, Jona wakanyumfwila. Wakaya ku Ninife akwaambila bantu bakalinga kucita shibiibi ayi: ‘Kwacaalabo nshiku 40, Ninife ilaakunyonyoolwa.’ Lyalo kwakacitika cintu Jona ncaatakalinga kuyeeyela, bantu baku Ninife bakanyumfwila kucenjesha kwakwe akucileka kucita shibiibi. Mwaami waku Ninife wakalwiita bantu ayi: ‘Amupaile kuli Lesa akucileka kucita shibiibi. Mpashi teshi atunyonyoole.’ Yehova ndyaakabona ayi bantu bacileka kucita shibiibi, taakwe kunyonyoola Ninife.

Jona wakakalala kwaamba ayi Yehova taakwe kunyonyoola Ninife. Ano yeeya paceeci: Yehova wakamukalikila moyo Jona akumunyumfwila nkumbu, sombi lakwe taakalinga kusuni kunyumfwila nkumbu bene Ninife. Muciindi cakucita boobo, wakaya mukukala pansengwe pa tauni ya Ninife mucimfule ca kasamu kaakalalite. Lyalo kasamu ako kakafwa, alimwi Jona wakakalala. Aboobo Yehova wakamwaambila ayi: ‘Wanyumfwila nkumbu kasamu aka kwiinda kunyumfwila nkumbu bene Ninife. Ndakabanyumfwila nkumbu akubapulusha.’ Ino nciinshi Yehova ncaakalinga kwiisha Jona? Wakalinga kumwiisha ayi bantu baku Ninife bakalinga kuyandika abuumbi kwiinda cishango cili coonse.