Jelusalemu Mboyakanyonyoolwa

Mankanda aanji bene Juda bakalinga kucileka kupaila Yehova, akutalika kupaila balesa bakubeca. Yehova wakeelesha kubacafwa kwa myaaka iinji. Wakatuma bashinshimi baanji kubacenjesha, sombi tabakwe kunyumfwa. Bakalinga kupensha akuseka bashinshimi. Ino Yehova wakacita buyani?

Nebukadinesa mwaami wa bene Babiloni wakalinga kukoma cishi comwi acomwi. Ciindi cakutaanguna ndyaakakoma Jelusalemu, wakacata Mwaami Jeoiyakini, bana bakwe, masoja, abaabo bacishi kabotu abuumbi kupanga shintu, akubatola ku Babiloni. Wakabwesa abuboni boonse bwakalinga mu tempele yakwe Yehova. Lyalo Nebukadinesa wakabika Sedekiya kuba mwaami wa bene Juda.

Pakutaanguna, Sedekiya wakalinga kunyumfwila mwaami wa bene Babiloni. Sombi bantu bamushishi shimwi shakalinga pafwiifwi abashinshimi bakubeca bakayuminisha Sedekiya kubukila Babiloni. Jelemiya wakamucenjesha ayi: ‘Na ukabukile Babiloni, bantu balaakucaikwa, kulaakuba nsala, amalwashi mu Juda.’

Pesule lyakweendelesha kwa myaaka 8, Sedekiya wakabukila mwaami waku Babiloni. Wakasenga bene Ijipiti kumucafwako. Lyalo Nebukadinesa wakatuma masoja akwe kuya mukulwana Jelusalemu, akushinguluka musena woonse. Jelemiya wakalwiita Sedekiya ayi: ‘Yehova waamba ayi na ulyaabe mumaansa abene Babiloni, webo abantu boonse mulaakupuluka. Sombi na ukabule kucita boobo, bene Babiloni balaakutenta Jelusalemu akukutola mubusha.’ Sedekiya wakaamba ayi: ‘Teshi ndyaabewo!’

Ndipakeenda mwaaka womwi a myeenshi 6, bene Babiloni bakapwaya lubumbu lwa Jelusalemu akutenta musena oonse. Bakatenta tempele, akucaya bantu baanji, lyalo akutola bamwi mubusha.

Sedekiya wakalobokaako ku Jelusalemu, sombi bene Babiloni bakamutandaanya. Bakamucatila pafwiifwi a Jeliko akumutola kuli Nebukadinesa. Mwaami uyu wakacaya bana bakwe Sedekiya basankwa alakwe kaalangilisha. Lyalo wakamutulula meenso akumubika mujeele, umo mwakafwita mukuya kwaciindi. Sombi Yehova wakashomesha bene Juda ayi: ‘Ndaakumuboosha ku Jelusalemu, pesule lya myaaka 70.’

Ino nciinshi cakalinga kusa mukucitika kubacanike bakatolwa mubusha ku Babiloni? Sa balaakutolelela kucita shiluleme pameenso akwe Yehova?