Bakakaka Kufukama

Ndipakeenda ciindi mwaami Nebukadinesa ndyaakalota ciloto ca cibumbwabumbwa, wakapanga cibumbwabumbwa cinene abuumbi ca golodi. Wakaciimika kumusena wiitwa ayi Dula akwiita balemekwa boonse bamu mucishi ca Babiloni, kwiilikaawo a Shadileki, Mishaki, a Abedinego, kwaamba ayi babungane kunembo lya ncico. Mwaami wakaamba ayi: ‘Na munyumfwe kulila kwa mapeenga, mitoolilo, atunkobele, mulyeelete kufukama akulambila cibumbwabumbwa! Uli woonse weshi abule kucita boobo, atowaalwa mu mulilo uyoosha.’ Sa bene Ebulu botatwe bakasumina kufukamina cibumbwabumbwa na bakakaka akulambila Yehova eenkabo?

Lyalo mwaami wakaambila beshikulisha nyimbo ayi balishe. Bantu boonse bakafukama akulambila cibumbwabumbwa kukushakobo Shadileki, Mishaki, a Abedinego. Basankwa bamwi bakababona akulwiita mwaami ayi: ‘Bene Ebulu botatwe balya bakaka kulambila cibumbwabumbwa.’ Nebukadinesa wakatuma wakuya mukubeeta lyalo wakabaambila ayi: ‘Ntomupa coolwe acimwi kwaamba ayi mulambile cibumbwabumbwa. Na mukake, ntoomuwaala mumulilo. Taakuwo lesa weenga wamupulusha mumaansaangu.’ Abalo bakakumbula ayi: ‘Tatutoyandikaawo akupekwa coolwe acimwi. Lesa wesu inga watupulusha. Ano nabi wabula kucita boobo, nobaami teshi tukalambilewo cibumbwabumbwa.’

Nebukadinesa wakakalala abuumbi. Wakalwiita basebenshi bakwe ayi: ‘Amusonsele mulilo kwaamba ayi ulungule mankanda ali 7 kwiinda mbouba lyoonse!’ Lyalo wakalwiita masoja akwe ayi: ‘Amubaange akubawaala mumulilo!’ Mulilo wakalungula abuumbi cakwaamba ayi masoja bakalinga kuwaala bene Ebulu botatwe bakapya akufwa. Nabi kwaamba ayi bakawaalamobo bene Ebulu botatwe mumulilo, Nebukadinesa ndyaakalangilisha wakabona bantu bali 4 kabeendaana mumulilo. Wakaloonda abuumbi akwiipusha basebenshi bakwe ayi: ‘Sa teshi basankwa botatwe mbotwaanga akubawaala mumulilo uyu? Ano ntoobona bali 4 alimwi womwi atooboneka anga ngu munjelo!’

Nebukadinesa wakasena pafwiifwi akoolobesha ayi: ‘Amuswe, mwebo nobasebenshi bakwe Lesa Wiinditewo!’ Bantu boonse bakakankamana ndyebakabona Shadileki, Mishaki, a Abedinego kabaswa mumulilo kwakubula kupyawo. Misusu yabo taikwe kubabuka, shakufwala shabo tashikwe kupya alimwi pamibili yabo tepakalinga kunyumfwikaawo a bweema bwa bwiishi.

Nebukadinesa wakaamba ayi: ‘Lesa wakwe Shadileki, Mishaki, a Abedinego ngu Lesa wiinditewo. Watuma munjelo wakwe kusa mukufuna basebenshi bakwe. Taakuwo lesa uli mbuli Lesa wabo.’

Sa awebo ulishinishite kutolelela kucita shiluleme pameenso akwe Yehova bweenka mbuli bene Ebulu botatwe?