Bwaami Bweshi Bukabule Kunyonyoolwa

Bushiku bumwi ciindi ca mashiku, Mwaami Nebukadinesa wakalota ciloto ncaatana kushiba kabotu. Wakalisukama abuumbi akwaalilwa koona. Wakeeta beshimajiki bakwe akubalwiita ayi: ‘Amundwiite ciloto ambocaamba.’ Bakamulwiita ayi: ‘Amutulwiite nshomwalota Nobaami.’ Sombi Nebukadinesa wakabakumbula ayi: ‘Taau! Mwebo nweenka amundwiite nshondalota, mukwiinga ntoomucaya na mwaalilwe.’ Alimwi bakamukumbula ayi: ‘Amutulwiitebo ciloto mbocalinga lyalo tutomusansulwiita.’ Wakabakumbula ayi: ‘Noonse mulisuni kuncenjeeka. Amundwiite ciloto mbocalinga!’ Bakalwiita mwaami ayi: ‘Taaku muntu weenga wacikonsha kucita boobo. Ncomusuni ayi tucite inga tacikonsheki.’

Nebukadinesa wakakalala abuumbi akwaamba ayi basongo boonse bacaikwe. Kwiilikaawo a Danyelo, Shadileki, Mishaki, a Abedinego. Danyelo wakasenga mwaami ayi abapeko ciindi. Lyalo lakwe ababye bakapaila kuli Yehova akusenga kwaamba ayi abacaafwe. Ino Yehova wakacita buyani?

Yehova wakatondesha Danyelo ciloto cakalota Nebukadinesa akumulwiita ncocaamba. Bushiku bwakakonkelawo, Danyelo wakaya kumusebenshi wa mwaami akumulwiita ayi: ‘Mutabacayi basankwa basongo. Inga ndacikonsha kusansulula ciloto ca mwaami.’ Musebenshi wakatola Danyelo ku mwaami Nebukadinesa. Danyelo wakaambila mwaami ayi: ‘Lesa wamutondesha sheshi shikacitike kunembo. Ciloto ncomwakalota cakalinga bobulya: mwakabona cibumbwabumbwa cinene abuumbi cakalinga kucite mutwi wa golodi, caamba amaansa sha silifa, lifumo amabelo sha mukuba, myeendo ya nshimbi ashimpanta sha nshimbi isenkene abulongo bwakutenta. Lyalo mwakabona libwe lyakatimbulwa kukalundu lyakooma kushimpanta sha cibumbwabumbwa. Lyalo cakapwayooka akubabo anga mbuungu ubo bwakaya amuuwo. Libwe ilyo lyakooma cibumbwabumbwa lyakaba kalundu kanene abuumbi akwisusha cishi coonse ca panshi.’

Lyalo Danyelo wakaambila mwaami ayi: ‘Ciloto canu ncocaamba nceeci: Bwaami bwanu ngo mutwi wa golodi. Silifa mbwaami bweshi bukakonkelewo. Lyalo kulaakuba bwaami bweshi bukabe anga ngu mukuba, ubo bweshi bukeendeleshe cishi coonse capanshi. Bwaami bweshi bukakonkelewo bulaakunooli buyumu anga ni nshimbi. Lyalo mukweelaako, kulaakuba bwaami butacatene, mumbasu shimwi bunanooli buyumu anga ni nshimbi, sombi mumbasu shimwi teshi bukayume bweenka mbuli bulongo. Libwe lyakesa mukuba kalundu mbwaami bwakwe Lesa. Bulaakunyonyoola malelo oonse akukala kwamuyayaya.’

Mwaami Nebukadinesa wakafukama cakushisha ciwa panshi kunembo lyakwe Danyelo. Wakaamba ayi: ‘Lesa wako ngowayubulula ciloto ici kuli ndiwe. Taakuwo Lesa uli mbuli nguwe.’ Muciindi cakucaya Danyelo, Nebukadinesa wakamubika kuba munene wa basongo boonse akumupa bweendeleshi kumusena umwi wa Babiloni. Sa waboona Yehova mbwaakakumbula mupailo wakwe Danyelo?