Bwaami Bwakalinga Anga Ncisamu Cinene

Bushiku bumwi mashiku, Nebukadinesa wakalota ciloto ciloondesha. Wakeeta basongo bakwe kwaamba ayi bamusansulwiite. Sombi taakuwo wakacikonsha kucita boobo. Lyalo mukweelaako wakabandika a Danyelo.

Nebukadinesa wakalwiita Danyelo ayi: ‘Ndakalota cisamu. Cisamu ico cakakomena abuumbi kushika kwiculu. Bantu boonse mucishi ca panshi bakalinga kucibona. Cakalinga kucite matewu abotu abuumbi alimwi cakacata shisepo shiinji. Shinyama shamuluundu shakalinga kookeshesha mucimfule ca ncinco, atwalo tuyuni twakalinga kuyaka shiinswa mumisampi ya ncico. Lyalo munjelo wakaswa kwiculu. Wakoolobesha ayi: “Amutimbule cisamu ico, akukushako misampi ya ncinco. Sombi mushiye cishiki panshi kacaangitwe ceeni ya nshimbi a mukuba. Moyo wa cisamu ulaakucinja kuswa mubuntu akuba wacinyama kushikila shiindi shili 7 shikeende. Bantu boonse balaakushiba ayi Lesa ngo Mweendeleshi alimwi inga wapa bwaami kumuntu uli woonse ngwaasuni.”’

Yehova wakayubululwita Danyelo busansulushi bwa ciloto. Danyelo ndyaakashiba busansulushi bwa ciloto, wakaloonda. Wakaamba ayi: ‘O mwaami, naakwiinga cabota ciloto ico nicalinga kwaamba pa balwani banu, sombi citokwaamba pali ndimwe. Cisamu cinene cakatimbulwa ndimwe. Mulaakukushikwa pa bwaami, akuya mukukala muluundu akulya bwiisu bweenka mbuli cinyama ca muluundu. Ano mukwiinga munjelo waamba ayi mushiye cishiki panshi, mulaakuboolela alimwi pa bwaami.’

Ndipakeenda mwaaka womwi, bushiku bumwi Nebukadinesa kaaendaana peculu lya ŋanda ya bwaami, kaeebela Babiloni. Wakalyaamboosha ayi: ‘Amubone kukomena ndabala inene ya Babiloni iyo njendakayaka. Kutondesha nkusu shangu shoonse!’ Kaacilyaamboosha, kwakanyumfwika liswi kalyaamba kuswa kwiculu ayi: ‘Nebukadinesa! Bulya wanyaikwa nkusu shako sha bwaami.’

Lyalo peenkaapo, Nebukadinesa wakacinkuka akuba anga ncinyama ca muluundu. Wakatandaanishikwa kuswa muŋanda yakwe ya bwaami akunookala muluundu ashinyama. Misusu yakwe yakalaampa anga ngamapepe a mumbankwashi, aalo maala akwe anga ngamaala a cikupwi.

Ndipakeenda myaaka 7, Nebukadinesa wakaboolaamo alimwi mubuntu, alimwi Yehova wakamuboosha pa bwaami. Lyalo Nebukadinesa wakaamba ayi: ‘Ntolumbaisha Yehova, Mwaami wakwiculu. Ndashiba ano kwaamba ayi Yehova ngo Mweendeleshi. Alaceesha baabo balisumpula, alimwi inga wapa bwaami kumuntu uli woonse ngwaasuni.’