Danyelo Mucilindi ca Nkalamu

Musankwa aumwi wakaba mwaami wa Babiloni wakalinga Dalyasi mwine Mediya. Dalyasi wakabona kwaamba ayi Danyelo wakalinga upuseneeko. Wakamupa mukuli wakutanjilila bantu balemekwa abuumbi mu Babiloni. Basankwa aba bakalinga kumunyumfwila munyono Danyelo, aboobo bakalinga kusuni kumucaya. Bakalinga kucishi ayi Danyelo alapaila kuli Yehova mankanda otatwe bushiku abushiku, aboobo bakalwiita Dalyasi ayi: ‘No baami, kulyeelete kubikwa mulawo wakwaamba ayi muntu uli woonse alyeelete kupaila kuli ndimwe nweenkabo. Uli woonse weshi akapwaye mulawo uyu alyeelete kuwaalwa mucilindi ca nkalamu.’ Dalyasi wakaukondwa muyeeyo uyu, akuusaina kuba mulawo.

Danyelo ndyaakanyumfwa sha mulawo uyu upya, wakaya kuŋanda yakwe. Wakaya pawindo akufukama akutalika kupaila kuli Yehova. Basankwa ba munyono bakamunjilila akumucana kaapaila. Bakacicila kuli Dalyasi akuya mukumulwiita ayi: ‘Danyelo wapwaya mulawo wanu. Alapaila kuli Lesa wakwe mankanda otatwe bushiku abushiku.’ Dalyasi wakalinga kumusuni Danyelo alimwi taakalinga kusuniiwo ayi afwe. Aboobo wakeelesha bushiku boonse kuyeeya mbweenga washitilisha Danyelo. Sombi nabibo mwaami taakalinga kucite nkusu shakwaalula mulawo ngwaakasaina kale. Wakatuma basebenshi bakwe kuya mukuwaala Danyelo mucilindi ca nkalamu.

Mashiku alya Dalyasi wakalisukama abuumbi pali Danyelo cakwaamba ayi taakwe koona. Aboobo macuunsa, wakacicila kucilindi akwiita Danyelo ayi: ‘Sa Lesa wako wakupulusha?’

Lyalo Dalyasi wakanyumfwa liswi lyakwe Danyelo! Wakaambila Dalyasi ayi: ‘Munjelo wakwe Yehova wacala milomo ya nkalamu. Tashikwe kundumaawo.’ Dalyasi wakakondwa abuumbi! Wakalwiita basebenshi bakwe kumukushaamo mucilindi. Danyelo ndyaakaswa mucilindi taapuwo nabi pomwi inkalamu mposhakamucisa. Lyalo mwaami wakaamba ayi: ‘Amubwese basankwa bakabekesha Danyelo akubawaala mucilindi ca nkalamu.’ Basankwa abo ndyebakawaalwa mucilindi, inkalamu shakabalya.

Lyalo Dalyasi wakatuma bakuya mukulwiita bantu ayi: ‘Muntu uli woonse alyeelete kuloonda Lesa wakwe Danyelo. Wakapulusha Danyelo ku nkalamu.’

Sa awebo ulapaila kuli Yehova bushiku abushiku bweenka mbuli Danyelo?